مَتّی 24
24
نِشونی آخر ایی دنیا
1عیسی اَ معبد خدا آما دَر،داشت وِ را خُیِش مِرفت شایِرداش آمان وَرِش تا ساختِمونا مَعبَدِ نِه وِش نِشو بَیَن. 2عیسی وِشو گفت: «هَمه اینانِ مُویینید؟ وِ راسی وِ شما مُوئِم ، ایی بنا آ جوری مِرُممَه که سنگی رو سنگی دیَر نِمِمُونهَ،بلکه هَمَشو مِریزَن.»
3وَختی که عیسی رو كُوءِ زِیتُو نِشِسَ وی شایِرداش دِ خَلوت آمان وَرِش گُفتِن: «وِ اِیما بُ ایی اتِفاقا چه وخت مِفتَه وُ نشُونه آ آمین تُو وُ آخرِ زِمان شیَ؟» 4عیسی وِشو گُفت: «حَواسِتو با تا کِسی شمانِ اَ را وِ دَر نَکُنه. 5وِرَ ایکه خیلیا وِ اسم مَه میان وُ مُوئَن: ”مَه مسیحِ موعودِم،“ وُ خِیلیانِه اَ را وِ دَر مُکُنن. 6هَمیجور دِبارَ جنگا مِشنوئید وُ خَوَرِ جَنگا وِ گوشِتو مِرِسَه . امّا پَریشُو نَوایید وِرَ ایکه اینا اتفاق مِفتَه، امّا هَنی آخِرِ کار نَرَسِسَه. 7مِلَتی وِ ضِدِ مِلَتِ دیَر وُ مملِکَتی وِ ضِدِ مملِکَتی دیَر وُرمیسَن. وُ قَحطی آ و زِمی لَرزیا دِ جایا جور وا جور اِتِفاق مِفتَه. 8امّا همه اینا فقط شروع دردِ زایمانَ.
9دِ او زِمان شُمانِه تسلیمِ دُشمَنا مُکُنن تا عذاوِ زیادی بُوینیید وُ شُمانِه مُکُشَن. تَمام مِلَتا وِرَ خاطرِ اسم مَه اَ شُما نفرت پیا مُکُنن. 10دِ او روزا خِیِلیا اَ ایمان خُیِشُو وُرمیَردَن وُ وِ هم خیانت مُکُنن وُ اَ هم نفرت پیا مُکُنن. 11انبیا دُورویی زیادی وُرمِیسَن، وُ عدۀ زیادینِ گمرا مُکُنن. 12شِرارَت انقد زیاد مِشهَ که مُحَبتِه خیلیا وِ هَم سَرد مِشَه . 13امّا هرکَه تا آخِر طاقت بیارَه نِجات پیا مُکُنهَ. 14وَ ایی خَوَرِ خوشِ پادشایی دِ سَراسَر دُنیا اعلام مِشَه تا تَمامِ مِلَتا اَ او وا خَور بان،اوسِه دنیا وِ آخِر مِرَسَه.
15پَ هَمی که شما او چیی که دانیالِ نَبی پیشگوئی کِرد، یعنی ”ویران گر مَکروهِنِ“ دِ مَكانِ مقدّس وایسییَ بوئینید، 16هر که دِ سرزِمین یهودیَه هِسا، وِ کوُءآ فرار کُنَه، 17وُ هر که سَرِ بونِ خونَه با وِرَ وُرداشتَنِه چیِی، دامو نیا، 18وُ هر که سَرِ زِمی با وِرَ وُرداشتِنِ لِواسِ وِ خونَه وُرنیَردَ. 19وای وِ حال زَنایی که دِ او زِمان حاملَه هِسِن وُ یا زَنا شیردِه! 20دعا کنید كه فرار شما دِ زِمِسُو یا دِ روزِ شَبّات نَوا ، 21وِرَ ایکه دِ او زِمان وِ اوجورمُصیبَتِ سختی گِرِفتار مِشید که ایجور چیی اَ اَوَلِ دنیا تا ایسِه اتفاق نِفتاَ وُ هوچ وَختَم اتفاق نِمَفتَه. 22اَیَر او روزا کوتاه نِمِشُد هوچ بَشَری جُونِه سالم وِ دَر نِمِوُرد. امّا وِ خاطر برگزیدِآ خدا او روزا کوتاه مِشَه.
23دِ او زِمان اَیَر کِسی وِ شما بُئَه، ”سیل کُنید مسیحِ موعود اینچونَ“ یا ”مسیحِ موعود اونچُونَ!“ باور نَكُنید. 24وِرَ ایکه خیلیا اَ دُرو وِ اسمِ مسیح وَ یا انبیا وُرمیسَن، مُعجِزات یا نشونه آ بزرگی وِ ظُهور میارَن تا اَیَر بَتونَن حَتی بَرگُزیدآ نَم گمرا کُنن. 25سیل کنید، مَه شِمانِه اَ زوتَر واخور کِردَم.
26پَ اَیَر وِ شما بُئَن ، ”او دِ بیاوُونَ“ وِ اونچو نَرید. وُ اَیَر بُئَن، ”او مینِ خونیَه“ باور نَكُنید. 27وِرِ ایی که هَموجور که صاعقَه دِ شرق آسِمو مِزِنَه وُ نورِش تا وِ غرب مِرَسهَ،آمیَن پسرِ انسانَم هَموجور مِشَه 28هرجا لاشهای با، لاشخورا دِاونچِو جَمع مِشَن.»
آمییَن پسر انسان
29جا وِ جا بَعدِ او مُصیبَتا
اَفتُو تاریک ما
وُ ماه دیَه نور نِمیَه
سِتارِه آ اَ آسِمو مِرِزَن دامو
وُ قدرَتای آسِمُونی وِ لرزَ دِر میان.
30اوسِه نِشونَه پسر انسان دِ آسِمو ظاهر ما وُ تَمامِ طایفه آ دنیا مِکوئَن وِ سینَه خُیِشو وُ پسر انسان نِه مُویینَن كه وا قُدرَت وُ جَلالِ عظیم،رو ابرای آسِمو میایَ. 31او فرشتِه آ خُیِشِه وا صدای بُلَنِ سورِنا مِفِرسهَ وُ اونا برگزیدِآ خدانِه اَ چار گوشِۀ جهان اَ او سَرِ آسِمو تا ایی سَرِ آسِمو ،دورِ هم جمع مُکُنن.
درخت اَنجیل
32اَ دِرختِ اَنجیل ایی دَرسِ یاد بِیرید: هَمی که شاخه آش جِوُونهَ زا وُ بَلگ دا مِفَمید كه تُواِسُو نَزیکَه. 33وُ هَمیجور، هَمی که ایی چیانِه بُوینیید مِفَمید كه آخِرِ ایی دنیا نَزیکَه،بلکه وایسیَ دَمِ دَر ، 34وِراسی وِ شما مُوئِم،تا تمام اینا اِتفاق نِفتَه،ایی نسل اَ بین نِمِرَ. 35آسِمُونُو زِمی اَ بین مِرَ امّا صُوَتا مَه هوچ وَخت اَ بین نِمِرَ.
انتِظار وِرَ وُریَشتِنِ مَسیح موعود
36اَما دِبارَه او رُوز وُ او ساعَت وِ شما مُوئِم که هوشکَه جُز بُوآ، او روز وُ ساعت نِه نِمِنَه حتی فِرشته آ آسِمو وُ حتی پسر هم اَزِش خَوَر نَرَن. 37زِمانِ آمییَن پسر انسان، مِثِ روزگار نوحَ، 38دِ روزای قبلِ توفان قبلِ ایکه نوح بَرَ مین كَشتی مَردِم مِخوردِن وُ مِنوشین وُ زَ میرفتِن وُ شویَر مِکِردن . 39وُ نِمِنِسِن چی دِ پیشَه. تا ایکه توفان آما وُ هَمَه نِه وا خُیِش بُرد. آمیَنِ پسر انسان هم هَمیجور مِشه. 40اَ دُوتا مرد كه سَرِ زِمینَن یكی گِرفتَه مِشَه وُ یکی مِمونَه. 41وُ اَ دُوتا زَ كه آَسیو مُکُنَن یکی گِرفتَه مِشَه وُ یکی مِمونَه. 42پَ حواسِتُ با، وِرَ ایکه نِمِنید خداوندِ شما چِه روزی میایَ. 43اینِنِ بَنِسَواید که اَیَر صاحوِ خونَه مینِس دُز دِ چِه ساعتی اَ شُو میایهَ بیار مِمُون وُ نِمَشت دُز بَرَ مینِ خونَش. 44پَ شُمانَم آمادَه باید وِرَ ایکه پسر انسان دِ ساعتی میایَه كه انتظارِشِه نَرید.
45پَ او خادِم وفادار وُ دونا كیهَ که ارواوِش اونِ وِ سرپرَسی خادِما دیَرِش هَشتَ وا تا غِذا اونانِ وِ مُوقع بَیهَ؟ 46خُوشالِ او خادِم که وَختی ارواوِش وُرمیَردَ اونِه مَشغولِ کار بُوینهَ. 47وِ راسی وِ شما موئِم، که اونِ مَلَ وِ رو تمامِ مایَملَکِ خُیِش. 48امّا اَیَر او خادِم شَرور با وُ وا خُیِش گُمُوُکُنه که ارواوِش دیر کِردَ، 49وُ همکارا خُیِشِه آزار بَیهَ وُ وا عِرَقی شِراویا مشغول خوردنُ نوشییَن با، 50اوسِه دِ روزی که او خادِم انتظار نَرَ وُ دِ ساعتی که خَوَر نَرَ ارواوِش میا. 51وُ اونِه اَ مینجا دُو تیکهَ مُکُنه وُ اونِه وا ریاکارا دِ یِه جا مِنازهَ جایی که گورگَه وُ دِنو قِروچیَه.
Currently Selected:
مَتّی 24: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
