مَتّی 25
25
مَثَل ده دختَرِ جِوو
1دِ او روز، پادشایی آسِمو مِثِ دَه تا باکِرَیَه كه چراغاشونِ وُرداشتِن، وُ وِ استِقبالِ داما رَفتِن دَر. 2پَینش نَفَر اَ اونا دونا وَ پَینش نفرِ دَیَشو نادوُ بییِن. 3باکِرِه آ نادوُ چراغاشونِ وُرداشتِن امّا وا خُیِشُو هوچ رِوغَن نَبُردِن. 4امّا دونا آ چراغای خُیِشونِ وا ظَرفای پر اَ روغَن بُردِن. 5وِرَ ایکه آمییَن داما طول کَشی، چشاشو سَنگین شیَ وُ خِوشو بُرد. 6دِ نِصفِه شُو صدا بُلنی شِنُفتِن كه مِگُفت: داما اینچُنَ! بَرید پیشوازِش! 7اوسِه تمامِ باکِره آ بیار شوئِن و چراغاشونِ آمادَه کِردِن. 8نادونا وِ دوناآ گُفتِن: یِقَری اَ روغَن خُیِتونِ وِ اِیما بَیید، وِرَ ایکه چراغا اِیما کور ما. 9امّا دوناآ وِشو گُفتِن: نِمیی ئیم وِرِ اییکه ایی رِوغَن وِرَ همَمو کافی نیسا بِهتَرَ بَرید وَ وِرَ خُیِتو اَ فِرُوشَندآ روغَن بَخَرید. 10امّا وَختی که اونا وِرَ خَریَنِ رِوغَن رفتَه ویین داما رَسِسِ وُ کِسایی که آمادَه بیِیِن، وا داما وِ مجلسِ عروسی داخل شُوئِن وُ در بَسَه شُد. 11بعد که او باکِره آ دیَر هَم،رَسِسِن،گُفتِن: ای آقا، ای آقا، دَرِنِ وِ رو اِیما وا کُ! 12امّا او وِشو گُفت: وِ راسی وِ شما مُئم، مَه شمانِه نِمشناسِم. 13پَ حواسِتُ با، وِرَ ایکه شما، نَه او روزِ مِینید وَ نَه ساعَتِشِه.
مَثَل سه غلام
14هَمیجور پادِشایی آسِمو مِثِ مردیَ كه ماخاس بَرَ سَفَر. خادِما خُیِشِه هِنا کرد وُ اموالِ خُیِشِه وِ اونا سِپُرد؛ 15وِ هَر کام وِ قَدِ توانِشو چیی دا وِ یکی پَینش کیسَه بزرگ طِلا دا که قدِ دسمُزدِ بیست سالِ یِه کارگَر بی، وُ وِ یکی دُو کیسَه بزرگ طِلا وُ وِ یکی دیَر یِه کیسَه بزرگ طِلا دا. اوسِه رایی سفر شد. 16مردی که پَینش کیسَه طِلا گِرفتَه وی فِورن رَفت وُ واش تِجارَت کِرد وُ پَینش کیسَه طِلا دیَر سُود کِرد. 17هَمیجور او که دُو کیسَه طِلا داشت، دُو کیسَه طِلا دیَرَم وِ دَس اُوُرد. 18امّا او که یِه کیسَه طِلا گِرفتَه وی رَفت وُ زِمینِ کَن وُ پولِ ارواوِشِ قایِم كِرد.
19«بعدِ مدتِ طولانی، اروابِ او خادِما وُریَشت و اَ اونا حِساو خواس. 20مردی که پَینش کیسَه طِلا گرفتَه وی پَینش کیسَه طلا دیَرم وا خُیِش اُوُرد و گفُت: ”ارواب، وِ مَه پَینش کیسَه طِلا سِپُردی، اینم پَینش کیسَه طِلا دیَر که سُود کِردَمَ.“ 21ارواب وِش گُفت: ”آفرین، ای خادِم خُو وُ وفادار! ایسِه که دِ چیا کَم وفادار بیِیِئ، چیا بیشتَری وِ تُو مِسپارم. بیا و دِ خوشی اَروابِ خُیِت شَریک با!“ 22خادِمی که دُو کیسَه طِلا گِرِفتهَ وی جِلُو آما و گفُت: ”ارواب، تو وِ مَه دُو کیسَه طِلا سِپُردی، اینم دُو کیسَه طِلا دیَر که سُود کِردَمَ.“ 23ارواب وِش گُفت: ”آفرین، ای خادِم خُو وُ وفادار! ایسِه که دِ چیا کَم وفادار بیِیِئ، چیا بیشتری وِ تُو مِسپارم. بیا و دِ شادی ارواب خُیِت شَریک با!“ 24او وَخت خادِمی كه یَه کیسَ طِلا گرِفته وی نَزیک آما و گفُت: ”ارواب، وِرَ ایکه مینِسِم مرد سَخگیری هِسی اَ جایی که نَکاشتیَ دِرو مُکنی وُ اَ جایی که دُو نَپاشییی مَحصول جمع مُکُنی 25مَه زَلَم رفت وُ رَفتِم پول تُونِه دِ زِمی قایِم كِردِم. بَفرما،اینَم پولت!“ 26امّا ارواب وِش گفت: ”ای خادِم شَرور وُ تَنبل! تُو كه مینِسی اَ جایی كه نَکاشتِمَ دِرو مُکُنِم و اَ جایی که دُو نَپاشیَم جمع مُکُنِم. 27پَ تُو باید پول مَنِه وِ صرّافا مِدای تا وَختی اَ سَفر وُرمیَردِم اونِ وا سُودِش پَس بیرِم. 28او یَه کیسَه طِلانِه اَ او بَسونید وُ وِ او كه ده کیسَه طِلا دارَه بَیید. 29وِرِ ایکه،هر كَه دارَه، وِش بیشتَر دادَ مِشهَ تا بیشتَر داشتَوا امّا وِ او كه نَرهَ اونیَم که دارَه ازِش گِرِفته مِشهَ. 30ایی خادِم بیفایدَنِه بَنازید دَر، دِ مینِ تاریکی. جایی که گورگَه وُ دِنُو قِروچیَه.“
روزِ داوری
31وَختی که پسر انسان وا جَلال خُیِش واردِ تمام فِرشته آ بیایهَ،رو تختِ پر جلالِ خُیِش مِنیشیهَ. 32وُ تمام مِلَتا دِ بِراوَرِ او حاضر مِشَن وَ او مِثِ چوپونی كه گوسوَنانِ اَ بُزا سَوا مُکُنَه مَردِمِنِ وِ دُو دَسَه تقسیم مُکُنهَ. 33گوسوَنانِ دِ سمتِ راس وُ بُزانِ دِ سمت چپِ خُیِش قِرار مِیَه. 34اوسِه پادشا وِ اونا كه دِ سمتِ راس اونَن مُئَه: ”بیاید ای کِسایی که اَ جانِوِ بواَ مَه برِكت گِرِفتِید او پادشاییِ كه اَ شروعِ دُنیا وِرَ شما آمادَه شیَ وِ اِرث بُورید. 35وِرَ ایکه گُسنهَ بییِم، وِ مَه خوراک داید تشنَه بییِم، وِ مَه آو داید غَریو بییِم، وِ مَه جا داید. 36لُخت بییِم، وُ مَنِ پُوشونید، مریض بییِم، عیادَتِم کِردید، دِ زندان بیِیِم،آمایین وِ دیدارِم.“ 37او وَخت آیما صالح مُئَن: ”ای خداوند کِی تُونِه گُسنه دییِم كه وِ تُو خوراک داییم یا تشنَه دییِیم که وِ تُو آو داییم؟ 38چه موقع تُنِه غَریو دیییِم که وِت جا داییم یا لخت دییِیم که تُونِه پُوشُنیم؟ 39چه موقع تُنِه مریض یا دِ زِندان دییِم کِه آمییِم وِ دیدارِت؟“ 40پادشا دِ جُواو مُئَه: ”وِ راسی وِ شما مُئِم، او چیائی که وِرَ یکی اَ کُوچِوکتَرین بِرارای مَه كِردید وِ راسی وِرَ مَه كِردید.“ 41اوسِه وِ اونا كه دِ سمتِ چپِ اونَن مُوئَه: ”ای مَلعُونا اَ مَه دور باید وُ بَرید دِ آتِش اَبَدی،كه وِرَ ابلیس وُ فِرشته آش آمادَه شیَ. 42وِرَ ایکه گُسنه بییِم، وِ مَه خوراک نَدایید تشنَه بییِم، آو نَدایید 43غَریو بییِم، جایی وِم نَدایید، لخت بییِم، مَنه نپُوشُنید مریض وُ زِندانی بییِم، وِ دیدارِم نیامایین.“ 44اوسِه اونا وِش جُواو میَن: ”ای آقا چه وَخت تُونِه گُسنه وُ تشنَه وُ غَریو وُ لخت وُ مریض وُ دِ زندان دییِم وُ وِت خدمت نَکِردِیم؟“ 45دِ جُواو اونا مُئَه: ”وِ راسی وِ شما مُوئِم، او چیائی که وِرَ یکی اَ ایی كُوچوکتَرا نكِردِید، وِ راسی وِرَ مَه نكِردِید.“ 46پَ ایی آیِمیا مِرَن وِ مینِ عِذاوِ اَبدی ،امّا آیِمیا صالح مِرَن وِ مینِ حیاتِ اَبَدی.»
Currently Selected:
مَتّی 25: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
