لوقا 3
3
یحیی آمادَه کُنَندَ را عیسی
1دِ پُونزَئُمین سالِ حكومتِ تیبِریوس امپراتورِ روم، وَختی که پُنتیوس پیلاتُس والی یهَودیَه بی، هیرودیس حاكمِ وُلاتِ جلیل، وُ بِرارِش فیلیپُس حاكمِ ایتوریَه وُ تراخونیتیس بی، وَ لیسانیوس حاكمِ آبِلینی بی، 2وَ حنا وُ قیافا هَم کاهِنا اَعظم بییِن، كلام خدا دِ بیاوُو وِ یحیی، پسر زكریا، نازِل شد. 3یحیی مِرَفت وِ سرَاسرِ نَواحیِ اَطرافِ رودخونهَ اُردُن وُ وِ مَردِم اعلام مِکرد که وِرِ آمُرزشِ گُناآشو تُوبَه کُنَن وُ تعمید بیرَن. 4هَموجور که دِ ایی بارَه دِ کِتاوِ اِشعَیای نَبی آمییَ که:
«دُنگِ اونِی که دِ بیاوُو حَوار مُکُنهَ
راءِ خداوند نِه آمادَه کنید!
راآی اونِه هموار کُنید
5تمام دَرِّه آ پر وُ تمام کُوآ وُ تَپِهآ یه دَس وُ هَموار مِشِن .
را آ کَج راس
وَ را آ چالَ پولَه،صاف مِشَن.
6اوسِه تمامیِ بَشَر نجاتِ خدا نِه مُویینَن.»
7یحیی رو وِ جَماعتی که وِرِ تَعمید گِرِفتِن میامان وَرِش مِگفت:«ای افعی زاده آچه کِسی وِتُو هُشدار دا تا اَ غَضبی که نوآتونَ بَگُریزید؟ 8پَ تُوبَه خُیِتو نِه وا کِردار وُ رَفتارِتُو، نِشُو بَیید وُ وَرِ خُیِتو نُوئید: ”بوآَ ایما ابراهیمَ.“ وِرِ ایکه وِ شما مُوئِم، خدا مِتُونهَ اَ ایی سنگا وِرَ ابراهیم بَچِه آیی دُرُس کُنَه. 9همی الانَم تیشَه وِ ریشَه دِرَختا هَشته شیَ. اَ ایی رو هَر درختی كِه میوۀ خو وِ وار نیارهَ مِوُرَیهَ وُ دِ آتِش اِناختهَ مِشهَ.»
10جماعت ازِش پُرسییِن: «پَ شی کنیم؟» 11یحیی جُواو دا: «اونی که دوتا لِواسِ دارَه، یِكیشِه بَیهَ وِ اونی که نَرهَ وَ هَر که غِذا دارَه، هَمی ایجور کُنَه.» 12جَزیهَ بَگیرا هَم آمان تا تعمید بِیرَن. اونا ازِش پُرسییِن: «اوسا ایما شی کنیم؟» 13یحیی دِ جُوآو گُفت: «بیشتَر اَ اوچی که مُقرر شیَ خَراج نَسُونید.» 14سَروازا هَم ازِش پُرسیین: «پَ اِیما، شی کنیم؟» وِاونا گُفت: «وِ زور اَ کِسی پول نَسُونید وَ وِ هوشکه تُهمتِ دُرو نَزِنید وَ وِ حَقِ خُیِتو راضی باید.»
15مَردِم وا اشتیاق چِش وِ را بییِن وَ وا خُیِشُو فکر مِکِردَن که آیا مُمکِنَ یحیی هَمو مسیحِ موعود با؟ 16جُواو یحیی وِ همه شو ایی بی: «مَه،شما نِه وا اُو تعمید مییِم اما یکی قَویتَر اَ مَه میا که مَه حَتی قابِل نیسِم بَنِ اُرسیاشِ وا کُنِم. او شما نِه وا روحالقدُس وُ آتِش تعمید مِییَه. 17او آشیرِ خُیِشِه دِ دَس دارَه وُ خَرمِنِ خُیِشِه پاک مُکُنَه وُ گَنِمِ نِه دِ اَمارِ خُیِش ذَخیرهَ مُکُنَه اَما کَنِه دِ آتِشی که هوچ خاموش نِما مِسوزُنهَ.»
18وِ ایی ترتیب یحیی وا نصیحتیا زیادِ دیَری خَوَرِ خُوشِه پادشایی خدا نِه وِ مرَدِمِ اعلام مِکرد. 19اما هیرودیسِ حاکِم، که یحیی اونِه وِ خاطر زَنِ برارش هیرودیا، وَ تمام شِرارتاش توبیخ کِردَ وی، 20یحیی نِه اِناخت دِ زندان وُ هَمی جور خطایِ دیَری هَشت رو خَطاآش.
تعمیدِ عیسی
21وَختی که مَردِم همه تعمید میرفتِن وُ عیسی هَم تعمید گرِفته وی وُ دعا مِکِرد آسِمُو وا شُد، 22وُ روحالقدُس وِ شکلِ جسمانی، مِثِ کَفتری نِشِس روش وُ صدایی اَ آسِمُو وُریسا که: «تو پسر عزیز مَنی. وُ مَه ازِت راضیِم.»
شَجَرَنامه عیسی
23عیسی نَزیکِ سی سال داشت که خدمتِ خُیِشِه شروع کِرد. او وِ خیال مَردِم پسر یوسف بی، وُ یوسف پسر هِلی، 24هِلی پسر مَتّات، مَتّات پسر لاوی، لاوی پسر مِلكی، مِلکی پسر یَنا، یَنا پسر یوسف، 25یوسف پسر مَتاتیا، مَتاتیا پسر عاموس، عاموس پسر ناحوم، ناحوم پسر حِسْلی، حِسْلی پسر نَجَی، 26نَجَی پسر مَعَت، مَعَت پسر مَتاتیا، مَتاتیا پسر سِمِعین، سِمِعین پسر یُسِک، یُسِک پسر یهودا، 27یهودا پسر یوحَنان، یوحَنان پسر ریسا، ریسا پسر زِروبابِل، زِروبابِل پسر شِئَلتی ئیل، شِئَلتی ئیل پسر نیری، 28نیری پسر مِلكی، مِلکی پسر اَدی، اَدی پسر قوصام، قوصام پسر اِلمادام، اِلمادام پسر عیر، 29عیر پسر یوشع، یوشع پسر اِلعازار، اِلعازار پسر یوریم، یوریم پسر مَتّات، مَتّات پسر لاوی، 30لاوی پسر شَمعون، شَمعون پسر یهودا، یهودا پسر یوسف، یوسف پسر یونام، یونام پسر اِلیاقیم، 31اِلیاقیم پسر مِلیا، ملیا پسر مِنا، مِنا پسر مَتاتا، مَتاتا پسر ناتان، ناتان پسر داوود، 32داوود پسر یَسا، یَسا پسر عُوبید، عُوبید پسر بوعَز، بوعَز پسر سَلمون، سَلمون پسر نَحشُون، 33نَحشُون پسر عمیناداب، عمیناداب پسر رام، رام پسر حِصرون، حِصرُون پسر فِرِص، فِرِص پسر یهودا، 34یهودا پسر یعقوب، یَعقوب پسر اسحاق، اسحاق پسر ابراهیم، ابراهیم پسر تارَح، تارح پسر ناحور، 35ناحور پسر سِروج، سِروج پسر رِعو، رِعو پسر فِلِج، فِلِج پسر عِبِر، عِبِر پسر شِلَخ، 36شِلَخ پسر قینان، قینان پسر اَرفَكشاد، اَرفَکشاد پسر سام، سام پسر نوح، نُوح پسر لَمِک، 37لَمِک پسر مَتوشالَح، مَتُوشالَح پسر خَنُوخ، خَنوخ پسر یارِد، یارِد پسر مَهَلَلئیل، مَهَلَلئیل پسر قینان، 38قینان پسر اَنوش، اَنوش پسر شِیث، شِیث پسر آدم وَ آدم پسر خدا بی.
Currently Selected:
لوقا 3: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
