لوقا 4
4
عیسی اِمتحان مِشهَ
1عیسی پر شیَ وی اَ روحالقدُس وُ اَ رودخونهَ اُردُن وُریَشت وُ وِ هِدایتِ روحالقدُس رَفت وِ بیاوُو. 2دِ اونچو اِبلیس وِ مدت چِل رو اِمتحانِش کِرد. دِ او روزا چیی نَخُورد،وَختی او چل رو روزَه خِلاص شد . عیسی گُسنَش شد. 3اوسِه ابلیس وِش گُفت: «اَیَر تو پسر خدایی، وِ ایی سنگ بُ تا نُو بَشَ» 4عیسی جُواو دا: «دِ تورات نوشته شیَ کِه؛ آیِم فقط وِ نُو زِنَه نیسا»
5اوسِه ابلیس اونِه بُرد وِ جا بُلَنی وُ دِ یِه لحظهَ تمام مَملِکتا جهانِ وِش نِشُو دا، 6وُ وِش گُفت: «مَه تمام ایی اقتدار وُ شوکَتِ وُ جَلالِ اونانِ مییِم وِ تو وِرِ ایکه اینانِ بخشییَن وِ مَه وُ مُختارِم اونا نِه وِ هَر که بَخوام بَیَم. 7پَ اَیَر مَنِه بَپَرسی تمامِ ایی چیا مِشَه مالِ تو.» 8عیسی دِ جُوآو گُفت:«دِ تورات نوشته شیَ،
”خداوَند، خدای خُوتِه بَپَرس
وُ فقط اونِنِ عبادت کُ.“»
9او وَخت اِبلیس اونِه بُرد وِ شَرِ اورشلیم وُ هَشتِش رو بُلَن تَرین جا معبد خداوند وُ وِش گُفت: «اَیَر تو پسر خدایی خُیِتِه اَ اینچو بَناز دامو. 10وِرِ ایکه دِ زَبورِ داوود نوشته شیَ:
”دِ بارِۀ تو وِ فِرِشتِه آ خُیِش دستور مِیَه
تا مراقبِت بان.“
11”وُ اونا تونِه میرَن رو دَساشو
نَکُنَه پات بَخورَ وِ سنگی.“»
12عیسی دِ جُوآوِش گُفت: «دِ تورات آمیَ: ”خداوند، خدایِ خُیِتِه اِمتحان نَکُ“.» 13وَختی که ابلیس تمام ایی اِمتحانا نِه تَمُوم کِرد، اونِه تا مَجالِ دیَری هَشت وُ رَفت.
شروع خدمتِ عیسی دِ جلیل
14عیسی وِا قدرت روح القدُوس وُریَشت وِ وُلاتِ جلیل وُ آوازَهش پیچِس، دِ سراسرِ اَطرافِ او وُلات. 15او دِ کنیسِه آ ، اونانِ تعلیم مِدا وَ همَه اَزِش تعریف مِکِردَن.
رَد کِردَن عیسی دِ شَرِ ناصِرَه
16عیسی رَفت وِ شَرِ ناصرَه، که د اونچو بزرگ شیَ وی وَ دِ روزِ شَبات، مطابق عادتش آما وِ كنیسَه وَ وُریسا تا کَلام خدا نِه بَخونَه. 17طومارِ اِشعَیای نبی نِه دان دَسِش. عیسی طومارِ نِه وا کِرد وُ بخشینِه پیا کِرد که فرمایش مُکُنَه:
18«روح خداوند درون مَنَه
وِرِ ایکه مَه انتخاب شییَم
تا خَوَرِ خُوشِ پادشایی خدا نِه وِ فُقَرا اعلام کُنِم.
او مَنِه فِرسیَ تا رَهائی نِه وِ اَسیرا اعلام کُنِم
وَ وِ کورا خَوَر بییِم که هَنی چِش دار مِشَن
او مَنِه فِرسیَ تا سِتمکَشا نِه آزاد کُنِم
19وَ سالِ لطفِ خداوند نِه اعلام کُنِم.»
20بعد عیسی طومارِ نِه پیچُن وُ اونِ دا وِ دَسِ خادِم كنیسَه وُ نِشِس. دِ حالی که همَه دِ کنیسَه سیلِش مِکِردَن. 21عیسی وِاونا ایجور گُفت: «امرو ایی نوشتۀ مقدس، هَمو مِوُقَع که وِش گوش مِداین وِ اَنجام رَسِس.» 22همَه اَ عیسی تعریف مِکِردَن وُ اَ کَلامش که پر اَ فیض بی حیرو شیَ ویِن وَ مِگُفتِن: «مَیَر ای پسر یوسف نیسا؟» 23عیسی وِاونا گُفت: «بی شک ایی مَثلِ نِه وِرَ مَه مییارید که ای طبیب خُیِتِه شَفا بَ! او چیائی که شِنُفتِیم دِ کَفَرناحوم کِردی دِ اینچو دِ شَرِ خُیِت هَم انجام بَ.» 24اوسِه عیسی گُفت: «وِ راسی، وِ شما مُوئِم که هوچ پیغمَری نِه دِ وُلاتِ خُیِش قَوول نِمُکُنَن. 25وِ راسی وِ شما مُوئِم، بیوه زنای زیادی دِ زِمان ایلیای نبی دِ اسرائیل بییِن، اوموقع که دَرِ آسِمُو، سِه سال و نیم بَسهَ شیَ وی وُ قَحطی سَختی تمام او سَرزِمینِ گرفتَه وی، 26اما ایلیا نبی وَرِ هوچ کامِشو فِرسیَه نَشُد، مَیَر وَرِ بیوه ای دِ شَرِ صَرِفَه دِ سرزِمینِ صیدُون. 27دِ زِمان اِلیشَع نبی هَم جُذامیا زیادی دِ اسرائیل بییِن، اما هوچ کامِشو جُذامِشُو خُو نَشُد مَیَر نَعمانِ سُریانی.» 28او وَخت تمام اونایی که دِ كنیسَه بییِن، اَ شِنُفتَن ایی صُوَتا خشمگین شوئِن، 29وُ وُریسان، اونِه اَ شَر کَشیِن دَر وُ بُردِن لُوءِ کُوئی که شَر روش ساخته شیَ وی تا اونِه اَ اونچو بَنازَن دامو. 30اما او اَ مینِشُو رَد شد وُ رَفت.
شفای مرد دیو زیَه
31او وَخت عیسی رَفت وِ كفرناحوم، شَری دِ وُلاتِ جلیل، وَ دِ روزِ شَبات شروع کِرد وِ تعلیم دیَن وِ مَردِم. 32اونا اَ تعالیمِش حیرَت زیَه شوئِن وِرِ ایکه کلامِش اقتدار داشت. 33اما دِ كنیسَه، مرد دیو زیه ایی بی، كِه روحِ پلید داشت. او وا دُنگی بُلن حَوار کِرد: 34«ای عیسیِ ناصری، تو وا ایما چه کار داری؟ آیا آمییی نابُودِمُو کُنی؟ مینِم که تو کی هِسی تو او قدوسِ خدایی!» 35اما عیسی تَشَر زا وِ روحِ پلید وُ گُفت: «حرف نَزِ وُ ازِش بَرو دَر!» او وَخت او دیو، او مردِنِه دِ وَرِ چِشِ همَه کُفتِش زِمی، وُ بدون ایکه بِلایی بیارَ سَرِش، اَزِش آما دَر. 36مَردِم همَه خَشکِشو زا وَ وِ هم مِگُفتن: «ایی چِه کَلامیَ؟ او وا اقتدار وُ قدرت وِ ارواح پلید دستور مییَه وُ اونا میان دَر!» 37وِ ای ترتیب خَوَرِ کارای عیسی پیچِس دِ تمام او وُلات.
شفای خُسوره ما پطرس
38او وَخت عیسی كنیسَه نِه ترک کِردُ رَفت وِ خونهَ شَمعون. خُسوره ما شَمعون طُوءِ سَختی داشت. پَ، اَ عیسی خواسِن كمکِش کُنَه. 39عیسی وایسا بالا سَرِ او زَ وُ توپِس وِ طُوء، وُ طُوءِ او زَ قطع شُد، وَ فِورَن وُریسا وُ شروع کِرد وِ پذیرایی کِردَن اَ اونا.
40دَم ایوارَه هَمه اونایی که مریضایی وا مِرَضا جور وا جور داشتِن، اُوُردِنِشُو وَرِ عیسی، وُ اونَم دس هَشت دِ قَ یکی یکیشو وُ شَفاشُو دا. 41دیوا ئَم اَ خیلیا دِرامان دَر وُ وا جیغ و وِلنگ مِگُفتِن: «تو پسر خدایی!» اما عیسی وِشو مِتوپِسُ اجازه حرف زیَن وِشو نِمِدا، وِرِ ایکه اونا مینِسِن او مسیحِ موعودَ.
تعلیم دیَنِ عیسی دِ کَنیسَه آ
42صُوِ زوعیسی رَفت وِ جا پِرتی دور اَ مَردِم. اما مَردِم دِ دُمش بییِن وُ آمان دِ جایی که عیسی بی وُ تَقلا کِردَن که نَلَن عیسی اَ وَرِشو بَرَ. 43امّا عیسی وِاونا گُفت: «مَه باید خَوَرِ خُوشِ پادشایی خدا نِه وِ شَرا دیَری هَم بَیِم.چون وِرَ هَمی فِرسیَ شیَم.» 44پَ او دِ کنیسِه آ وُلاتِ یهودیَه پیغام خدا نِه وِ مَردِم اعلام مِکِرد.
Currently Selected:
لوقا 4: NLBB
Highlight
Copy
Compare
Share
Want to have your highlights saved across all your devices? Sign up or sign in
@ 2026 Korpu Company
