مَتّی 7
7
قضاوت نَکَن
1«قضاوت نَکَن تا وَهُمِإیژ قضاوت نُاو. 2چیکِ هرَجورَ که وَآیمَلِ تِرِك قضاوت بِکِإینُون، وَهُمِإیژَ قضاوتَ مُاو و وَهر پِئمُونَه که مَپِئیمُونِن، اَرا هُمِإیژ پِئمُونَه مُاو. 3اَراچَ پَلِ کیَه نُمِ کَمِ بِراتَ مِإینین، امّا تیرِ چواِئی که نُمِ کَمِ گُوژِت دیرین، تشقیص نِمِإین؟ 4یا چُطِر مِتِنین بوشینَ بِرات، ”بیلَ تا پَلِ کیَه اَنُمِ کَمِت بارِمَ دَشت“ وخدی تیرِ چواِئیَ نُمِ کَمِ گُوژِت دیرین؟ 5اِ ریاکار، اوّل تیرِ چواَ اَژ کَمِ گُوژِت بارَ دَشت، اِیندا بیتِرَ مِإینین تا اَژ کَمِ بِرات پَلِ کیَه بارینَ دَشت.
6اَچیکِ مقدّسَ، نِنَ سَگَلِ ولگَرد و مِرواریدَلِ گُوژِتُونَ نُااُوژِن جِلِ خوکَلَ، ناخُاو آنَلَ پایمال بِکِنی و گِلَبیرِن و تیکَتیکَتُون کَن.
بِخوان، بِجورِن، بِکواِن
7بِخوان، که مِنَ بینِتُون؛ بِجورِن، که پیااَ مَکِإینُون؛ بِکواِن، که درَ وَریتُون وازَ مُاو. 8چیکِ هر که بِخوای، وَدَسَ ماری و هر که بِجوری، پیااَ مَکِ و هر که بِکواِئی درَ وَریاِئی وازَ مُاو. 9کُمُنی اَژ هُمَ اَگَر کُری اَژِنی نُون بِخوای، بَردی مِتَ بینی؟ 10یا اَگَر ماهی بِخوای، ماری مِتَ بینی؟ 11اِسگَ اَگَر هُمَ که شَرَبارینُون، مَزانینُون که چُطِر وَاُویلَلِ گُوژِتُون خَلئَتی خو با بِإینُون، چَنی بیشتِر بُاواَ هُمَ که هُاواَ نُمِ آسِمُون چیَلِ خواَ مَبَشقیَ آنَلی که اَژِنی بِخوان. 12پس وَگَردِ مردم هرَجورَ رفتار کَن که مَخواینُون اَگَردِ هُمِإیژ رفتار کَن. یَسَ خلاصَه تورات و نیوِیشتَلِ پیغمبرَل.
ری زندَگی
13اَژ درِ تنگ بورِنَ نُمِ، چیکِ وِشایَ اَ درَ و پیَنَ اَ ریَ که آخِری مَرَسیَ نابودی و فِرَ کسَلی هَن که مانَ نُمِ اَوَ. 14امّا تنگَ اَ درَ و سختَ اَ ریَ که آخِریَ مَرَسیَ زندَگی، و کسَلی که اَوَ پیااَ مَن، کَمِن.
دارِ و میواِئی
15اَژ پیغمبرَلِ دُرُوزِن دیر بین. آنَ نُمِ جِنِکِ میَ مانَ لا هُمَ، امّا باطنِن گرگَلِ درَندَن. 16آنَلَ اَژ میوَلِنَ مَشناسینُون. آیا اَاُنیر اَژ بِتَه خار و انجیر اَژ علف هرز مَچِنِن؟ 17پس هریجورَ، هر دارِ خواِئی میوه خواِئی ماری، امّا دارِ گَن میوه گَنَ ماری. 18دارِ خو نِمِتِنی میوه گَنی بِ، و دارِ گَنیژ نِمِتِنی میوه خواِئی باری. 19هر داری که میوه خواِئی ناری، مِرِنی و مَکِ نُمِ آگِر. 20هریجورَ، هُمَ آنَلَ اَژ میوَلِن مَشناسینُون.
21نَه هر که مِنَ "خداوند، خداوند" هَنا کِ مَچواَ نُمِ پاتشاهی آسِمُون، بلکم اَوَ که خواس بُاواِ مِ که نُمِ آسِمُونَ باریَ جا. 22نُمِ اَ روژَ فِرَ کسَل موشِنَ مِ: ”خداوند، خداوند، مَر وَنُومِ تو نبوت نَکِردیمُون؟ مَر وَنُومِ تو دیوَلَ تارِمُون نَکِرد؟ مَر وَنُومِ تو معجزَلِ فِرِاِئی انجوم نایمُون؟“ 23امّا وَبینِن اعلومَ مَم، ”هرگِس هُمَلَ نَشناختِمَ. اَژ مِ دیر بِن، اِ گَنَکارَل!“
معمار دُونا وَ معمار نادُون
24پس هر که اِئی قِصَلِمَ بِشنِ وَآنَ عمل کِ، مِثادِ پییااِ دُونااِئی کَ که پِ مالِ گُوژیَ وَری تختَه سنگی آاُوتیِ. 25بارِش بُاری و سیل کَتَ ری و باد یاهات و زور آاُوتیئَر مالَ، نَرِما چیکِ پِئی ری تختَه سنگی بی. 26امّا هر که اِئی قِصَلِمَ بِشنِ وَآنَ عمل نَکِ، مِثادِ پییااِ نادُونی کَ که پِ مالِ گُوژیَ وَری شین آاُوتیِ. 27بارِش بُاری و سیل کَتَ ری و باد یاهات و زور آاُوتیئَر مالَ، رِما، و خَراُواِئیِ اَوَ فِرَ بی!»
28وخدی عیسی اِئی قِصَلَ تمُوم کِردی، مردم اَژ تعلیم داتِن اَوَ بِلِإیژِنِن بی، 29چیکِ وَقدرت و اختیار تعلیمَ ماتی، نَه مِثادِ معلمین تورات.
Currently Selected:
مَتّی 7: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
