مَتّی 8
8
شفااِ پییااِ جذامی
1وخدی عیسی اَژ کواُی۟ یاهاتَ هار، جمیَت فِرِاِئی کَتِنَ دُمی. 2نُمِ اِئی لَزَ پییائی جذامی یاهاتَ لا عیسی و جِلِ اَوَ زُنی داتی و فِتی: «اِ خداوند، اَگَر بِخواین مِتِنین شفام بِإین.» 3عیسی دَسیَ دیریژ کِردی و دَس ناتیتَ قِئِی و فِتی: «مِم؛ شفا بِگِر!» هرَلَزَ، اَژ جذام شفا گِرتی. 4اِیندا عیسی فِتیَه بینی: «حُاواُسِت بو که وَکسی چیئِی نوشین، امّا بِچواَ لا کاهن معبد، گُوژِتَ نیشُون بیئَه و پیشکَشی که موسی پیغمبر دستور داسی، تقدیم کَ تا اَرِنِن شاهادَتی بو که تو شفا گِرتینَ.»
ایمُون یِ اَفسرِ رومی
5وخدی عیسی یاهاتَ نُمِ شهر کَفَرناحوم، یِ اَفسرِ رومی یاهاتَ لای وَالتماس 6فِتیَه بینی: «اِ آقا، خذمتکارِم فلج نُمِ مال کَتیَ و عذُواِ فِرِاِئی مَکیشی.» 7عیسی فِتیَه اَوَ: «مِ مام و اَوَ شفااَ مَم.» 8اَفسرَ جواُو داتی: «اِ آقا، لائق نیم که باینَ ژیرِ سقفِ مالِ مِ. فَقَد قِصِاِئی بوش که خذمتکارِم شفااَ مَگِری. 9چیکِ مِ گُوژِم پییاإیکِم که هامَ ژیرِ فرمُون کسی. سَروازَلیژی ژیرِ فرمُونِ گُوژِم دیرِم. وَیَکی موشِم”بِچو،“ مَچو وَیَکی تِرِك موشِم ”بو،“ مای. وَغلام گُوژِم موشِم ”یَ بِکَ،“ هرَ کارَ مَکِ.» 10عیسی وخدی قِصَلِ اَوَ شِنَفتی، بِلِإیژِنی یاهات وَکسَلی که اَگَردیَ ماهاتِن، فِتی: «حقیقتاً، وَبینِتُونَ موشِم، هُنَ ایمُونی حتی نُمِ اسرائیلیژ نِإیمَ. 11وَبینِتُونَ موشِم که فِرَ کسَل اَژ شرق و غربَ مان و نُمِ پاتشاهی آسِمُون اَگَردِ ابراهیم و اسحاق و یعقوب مَنیشِنَ سر یِ سِفرَه، 12امّا اُویلَلِ اِئی پاتشاهیَ مُااُوژِنِنیَ نُمِ تِریکی دَشت، جائی که گیری و دِنُونریچَسَ.» 13اِیندا عیسی فِتیَه اَفسرَ: «بِچو! مِطاقِبِ ایمُونِت اَرِنِت بو.» و هرَلَزَ خذمتکار اَوَ شفا گِرتی.
عیسی فِرَ کسَل شفااَ مِ
14وخدی عیسی چیَ مالِ پطرس، هَسیرَه اَوَ دیتی که تب کِردیِ و کَتَسَ نُمِ جابُونی. 15عیسی دَسِ ناتیَ قِ دَسِ اَ ژَنَ و تبی قطع بی. اِیندا اَوَ وِرزااِر و شروع کِردیَ خذمت کِردِنِ اَژ عیسی.
16با ایوارَه، آیمَلِ فِرِاِئی اَژ دیوزدَلَ آاُوردِنَ لای و اَوَ وَکلومِ گُوژی روحَلِ گَنَ اَژ آنَ کِردیَ دَشت و گِشتِ مریضَلَ شفا داتی، 17هریجورَ، پیشگوئی اِشعیا پیغمبر وَانجوم رَسی که:
«اَوَ ضعفَلَ هیمَلَ بِردیِر
و مرضَلِ هیمَلَ گِرتیَ کول.»
قیمت مرید عیسی بیِن
18وخدی عیسی دیتی جمیَت فِرِاِئی دِری گِرتِنَ، فرمُون داتی: «بِچیمُون اَ کُنِ دریاچَه.» 19اِیندا یَکی اَژ معلمَلِ تورات یاهاتَ لای و فِتی: «اِ استاد، بِچینَ هر جا، مامَ دُمِت.» 20عیسی جواُو داتی: «روآلَ لُونَه دیرِن و مِرخَلِ هُوا آشیونَه دیرِن، امّا کُرِ انسُون جااِ سر ناتِن نِری.» 21شاگردی تِرِك فِتیَه اَوَ: «اِ آقا، اوّل اجازَه بیئَه مِ تا بِچِم بُاواَمَ بِنِمَ نُمِ قِر، اِیندا بامَ لات.» 22امّا عیسی فِتیَه اَوَ: «بواَ دُمِ مِ و بیلَ مِردیَل، مِردیَلِ گُوژِنَ بِنِنَ نُمِ قِر.»
آرُوم کِردِنِ توفُون دریاچَه
23اِیندا عیسی سُواُر قایقی بی و شاگردَلیژ چِنَ دُمی. 24یِ گِل توفُونِ سختی یاهات، جوری که نزیک بی موجَلَ قایقَ غرق کَن. امّا عیسی نُمِ خُاو بی. 25اِیندا شاگردَلَ یاهاتِن اَوَ کِردِنَ خَوَر و فِتِن: «اِ آقا، نجاتِمُون بیئَه، دیریم اَژ بینَ مَچیمُون!» 26عیسی جواُو داتی: «اِ کَماِیمونَل، اَراچَ هُنَ زَلَتَراق بینُونَ؟» اِیندا وِرزااِر تَشَر داتیتَر باد و موجَلِ دریاچَه و گِشتِن آرُومِن گِرت. 27اَ پییالَ بِلِإیژِنِن یاهات اَژ یَکتِرِک پِرسین: «یَ چُطِر آیمی کَ؟ حتی باد و موجَلیژ اَژِنی فرمُونَ میَرِن!»
شفا دو پییا دیوزدَه
28وخدی که عیسی رَسیَ سرزمین جَدَریَل، اَ کُنِ دریاچَه، ریِریِ دو پییائی بین که دیو داشتِن و اَ قِرِسُون ماتِنَ دَشت. اَ دواَ اَخِنگَ وَشی بین که هیشکس نِمِتِنیستی اَژ اَ ریَ رد بو. 29آنَ داد کیشان: «تو چَتَ هیمَ مِ، اِ کُرِ خدا؟ یعنی اِیرَ یاهاتینَ تا وِرَژ اَ مِقِاِئیکه با بو، عذُواِمُون بِإین؟» 30کمی دیرتِرَژ آنَ گلَه کَلِنگی اَژ خوکَلَ داشتِن غذااَ مُهاردِن. 31دیوَل وَالتماس فِتِنَ عیسی: «اَگَر مَخواین تارِمُون کِإین، رِاِمُون کَ نُمِ گلَه خوکَلَ.» 32عیسی فِتیَه بینِن: «بِچِن!» اِیندا دیوَلَ چِنَ دَشت و چِنَ نُمِ خوکَلَ و گِشتِ گلَه اَژ سرَلیژِ تپَه هیواینَ نُمِ دریاچَه و نُمِ آاُو غرق بین. 33آنَلی که مِتَجی خوکَلَ بین، هیواین، چِنَ نُمِ شهر و گِشتِ اِئی چیَلَ، مخصوصاً اَچیکِ اَرا اَ دیوزدَلَ اتفاق کَتی، تِعریف کِردِن. 34اِیندا گِشتِ مردم شهر اَرا دیدَنی عیسی یاهاتِنَ دَشت و وخدی اَوَ دین لالِکانَ بینی که منطقَه آنَلَ بِإیلیَجا بِچو.
Currently Selected:
مَتّی 8: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
