مَتّی 6
6
صدقَه داتِن
1«حُاواُسِتُون بو، که کارَلِ خواِتُونَ جِلِ کَمَلِ مردم انجوم نَن، وَاِئی نیت که هُمَلَ بینِن، وَگرنَه لا بُاواِ گُوژِتُون که نُمِ آسِمُونَ، اَجری نِرینُون.
2پس وخدی که صدقَه مِإینُون، جار نَن، هُنَ که ریاکارَل نُمِ کنیسَلَ و کوچَلَ مَکَن تا مردم اَژ آنَ تِعریف کَن. حقیقتاً، وَهُمَ موشِم، یانَ اَجرِ گُوژِنَ گِرتِنَ. 3پس وخدی تو صدقَه مِإین، جوری بِکَ که دَسِ چپِت اَژ اَچیکِ دَسِ راسِتَ مَکَری، باخَوَر نُاو، 4تا صدقَه تو نُمِ خفا بو؛ اِیندا بُاواِ آسِمُونی تو که خفااَ مِإینی، وَبینِت اَجرَ مِ.
دعا
5وخدی که دعااَ مَکِإین، مِثادِ ریاکارَل نُاو، چیکِ دوس دیرِن نُمِ کنیسَلَ و سر کوچَلَ بوسِن، دعا کَرِن تا مردم آنَلَ بینِن. حقیقتاً، وَهُمَ موشِم، یانَ اَجرِ گُوژِنَ گِرتِنَ. 6امّا تو، وخدی که دعااَ مَکَرین بِچو نُمِ اُتاقِت، درَ بین و لا بُاواِ گُوژِت که نُمِ خفااَ، دعا کَ. اِیندا بُاواِ آسِمُونی تو که خفااَ مِإینی، وَبینِت اَجرَ مِ.
7هَمیژ، مِقِ دعا کِردِن، یِسرَه وِردَلِ پیچ نوشِن، هُنَ که قومَلِ بِتپرَس مَکَرِن، چیکِ لاگُوژِن فکِرَ مَن اَگَر یِسرَه وِرد بوشِن، دعالِن قبولَ مُاو. 8پس مِثادِ آنَ نِإینُون، چیکِ بُاواِ آسِمُونی هُمَ وِرَژ اِئیکه اَژینی بِخواینُون، اِتیاجَلِتُونَ مَزانی.
9پس هُمَ هُنَ دعا کَرِن:
اِ بُاواَاِ هیمَ که هاینَ نُمِ آسِمُون،
نُوم تو مقدّس بو.
10پاتشاهی تو بای.
خواس تو، هُنَ که نُمِ آسِمُون انجومَ مُاو،
ریِ زمینیژ وَانجوم بِرَسی.
11نُونِ روژی هیمَلَ
اِیمِرو بیئَه بینِمُون.
12قَرضَلِ هیمَلَ بِبَشق،
هُنَ که هیمِإیژ قَرضدارَلِ گُوژِمُونَ
مَبَشقیمُون.
13و هیمَلَ امتحُون نَکَ،
بلکم اَژ اَ شریر،
هیمَلَ آزادِمُون کَ.
چیکِ پاتشاهی و قدرت و جِلال،
تا ابد هِنِ تونَ. آمین
14چیکِ اَگَر خطااَلَ آیمَلِ تِرِك بِبَشقینُون، بُاواِ آسِمُونی هُمِإیژ هُمَلَ مَبَشقی. 15امّا اَگَر خطااَل آیمَلِ تِرِك نَبَشقینُون، بُاواِ هُمِإیژ خطااَل هُمَلَ نِمَبَشقی.
روژی
16وخدی که روژیَ مَگِرینُون، مِثادِ ریاکارَل پِل۟مِژِن نِن، چیکِ آنَ پِتِلِچِنَ آاُوزُنَ مَن، تا لا آیمَلِ تِرِك، گُوژِنَ روژیدار نیشُون بیَن. حقیقتاً، وَهُمَ موشِم، که اَجرِ گُوژِنَ گِرتِنَ. 17امّا وخدی تو روژیَ مَگِرین، رین بِمالَ سر گُوژِت و نُمِریِ گُوژِتَ بُشور 18تا اَرا آیمَلِ تِرِك دیار نُاو که هاینَ روژی، بلکم اَرا بُاواَ آسِمُونی تو که نُمِ خفااَ، و بُاواِ آسِمُونی تو که خفااَ مِإینی، وَبینِت اَجرَ مِ.
گنج نُمِ آسِمُون
19ری زمین گنج جمع نَکَرِن، جائی که پیت و زنگ، ضِرَدَ مَرَسِنی و دُزَلَ مانَ نُمِ و اَوَ مَدُزِنی. 20بلکم گنجِ گُوژِتُونَ نُمِ آسِمُون جمع بِکَرِن، اُورَ که پیت و زنگ ضِرَد نِمَرَسُونی و دُزَل نِمانَ نُمِ و اَوَ نِمَدُزِنی. 21چیکِ هر جا گنجِتَ، دلِتیژ هُاواَ اُورَ.
22کَم، چراخِ بدنَ. اَگَر کَمِت سالم بو، گِشتِ بدنِت رُوشِنَ مُاو. 23امّا اَگَر کَمِت گَن بو، تِریکی گِشتِ بدنِتَ مَگِری. پس اَگَر نوری که نُمِ تواَ تِریکیَ، چِ تِریکیِ کَلِنگی کَ!
24هیشکس نِمِتینی دو اَربابَ خذمت کِ، چیکِ یا اَژ یَکی بیزارَ مُاو و یا اَ یَکی تِرِكَ دوسی دیری، و یا گُون فِدا یَکیَ مُاو و اَ یَکیتِریژَ خوارَ مَکِتی. نِمِتِنینُون هَم خدااَ خذمت کِإینُون هَمیژ پیل.
دلواپَس نِإینُون
25پس وَبینِتُونَ موشِم، دلواپَسِ زندَگی گُوژِتُون نِن که چَ بیرینُون یا چَ هُرتبیکیشینُون، و نَه دلواپَسِ بدنِ گُوژِتُون که چَ بِکِإینُونَ وَرِتُون. مَر زندَگی اَژ غذا و بدن اَژ جِنِک مِهمتِر نییَه؟ 26نگاه کَنَ پرندَلِ آسِمُون که نَه مَکارِن و نَه دِرِاَ مَن و نَه جمَع مَکَنَ نُمِ اَمبار، بااِئیحال بُاواَ آسِمُونی هُمَ روزِقِ آنَلَ مِ. مَر هُمَ خیلی ارزشدارتِرَژ آنَ نینُون؟ 27کیَه اَژ هُمَ که بِتِنی وَدلواپسی، ساتی وَعمر گُوژ اضافَه کِ؟
28و اَراچَ اَرا جِنِک دلواپَسینُون؟ نگاه کَنَ گُلَلِ بیُااُون که چُطِر کَلِنگَ مِن؛ نَه زحمتَ مَکیشِن و نَه مَرِسِن. 29بااِئیحال وَبینِتُونَ موشِم که حتی سُلیمُونِ پاتشاهیژ وَگِشتِ شکوه و جِلالی مِثادِ یَکی اَژ آنَ هُنَ مرتب نِإی. 30پس اَگَر خدا علفِ بیُااُونَ که اِیمِرو هَس و دَمِسی مُاوژِنَ نُمِ گُواَر، هُنَ مَپوشُنی، مَر هُمَلَ، اِ سُسایمُونَل، بیتِرَژ یَ نِمَپوشُنی؟
31پس دلواپَس نِن و نوشِن چَ بیریمُون یا چَ هُرتبیکیشیمُون و یا چَ بِکِإیمُونَ وَر. 32چیکِ قومَلِ بِتپرَس، هانَ دُمِ هُنَ چیَلی، امّا بُاواَ آسِمُونی هُمَ مَزانی که وَگِشتِ یانَ اِتیاج دیرینُون. 33بلکم اوّل مینِ پاتشاهیِ خدا و عدالت اَوَ بین، اِیندا گِشتِ یانِإیژ وَبینِتُون عطااَ مُاو. 34پس دلواپَسِ دَمِسی نِن، چیکِ دَمِسی دلواپَسی گُوژی دیری. سختیَلِ اِیمِرو اَرا اِیمِرو بَسَ!»
Currently Selected:
مَتّی 6: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
