مَتّی 28
28
زِنیبیِنِ عیسی
1بعدِ شَمَه مقدّس، دَمِ صُاِ اوّلین روژِ هفتَه، مریمِ مَجدَلیّه و اَ مریم تِرِك چِن مقبرَه بینِن. 2وَیِگِل زمینلرزَه سختی یاهات، چیکِ یَکی اَژ فرشتَلِ خداوند اَژ آسِمُون یاهاتَ هار و چیَ میل مقبرَه و بَردَ اَژ جِلِ اَوَ خِر داتیَ لا و نیشتیَ ری اَوَ. 3ری اَ فرشتَه مِثادِ برقِ آسِمُون مَدَرَشخا و جِنِکی مِثادِ ویَر، اِسپی بی. 4نگبُونَل وخدی اَوَ دین اَ ترس لَرزین و مِثادِ مِردیَلَ بین! 5اِیندا فرشتَه فِتیَه ژَنَلَ: «زَلَتُون نَچو! مَزانِم که هاینُونَ مینِ عیسااِئی که کیشااَر صلیب. 6اَوَ اِیرَ نییَه، چیکِ هرَجورَ که فِتیتی، زِنی بیَ! بورِن جائی که اَوَ هَتیبی، بینِن، 7پس زی بِچِن و بوشِنَ شاگردَلی که ”اَوَ اَژ مِردیَل زِنی بیَ و وِرَژ هُمَ مَچواَ جلیل و اُورَ اَوَ مِإینینُونی.“ اِسگَ فِتِمَ بینِتُون!» 8اِیندا ژَنَلَ وَترس و شادی فِرِاِئی، زی اَژ مقبرَه چِنَ دَشت وَدو چِنَ میلِ شاگردَلَ تا اِئی اتفاقَ وَبینِن خَوَر بیَن. 9یِ دفعه عیسی ریِریِ آنَ بی و فِتی: «سِلام!» ژَنَلَ یاهاتِنَ جِلِ و کَتِنَ ری پالی، اَوَ پَرَسین. 10اِیندا عیسی فِتیَه آنَ: «زَلَتُون نَچو! بِچِن و بوشِنَ بِرالِم که بِچِنَ جلیل. اُورَ مِ مِإینِن.»
گزارش نگبُونَل
11وخدی که ژَنَلَ نُمِ ری بین، بِری اَژ نگبُونَل چِنَ شهر، و گِشتِ اِئی اتفاقَلَ فِتِنَ رئیسَلِ کاهنَل. 12آنِإیژ بعدِ مشورَت وَگَردِ شیخَلِ قوم، پیلِ فِرِاِئی وَسربازَلَ داتِن، 13فِتِن: «بوشِنَ مردم، ”شاگردَلِ اَوَ وَشِ یاهاتِن و مِقِاِئیکه هیمَ نُمِ خو بیمُون، جنازَه اَوَ دُزین.“ 14و اَگَر اِئی خَوَرَ وَگوشِ والی بِرَسی، هیمَ گُوژِمُون اَوَ قانیَ مَکِإیمُونی تا اَرا هُمَ مشکلی نُاو.» 15پس آنَ پیلَ گِرتِن و مِطاقِبِ اَچیکِ فِتِنَ بینِن، انجوم داتِن. و اِئی داسِتُونَ تا اِیمِرو نُمِ یهودیَل جار کَتیَ.
مأموریت کَلِنگ
16اِیندا اَ یازَه شاگرد چِنَ جلیل، سر کواُاِئی که عیسی فِتیتَ بینِن. 17وخدی اُورَ عیسااَ دین، اَوَ پَرَسین. امّا بِری شِک کِردِن. 18اِیندا عیسی یاهاتَ نزیک و فِتیَه آنَ: «گِشتِ قدرت و اختیار نُمِ آسِمُون و ری زمین وَمِ دانَ. 19پس بِچِن وَگِشتِ قومَلَ، شاگردِ مِ بِکَرِن و آنَلَ وَنُومِ بُاواَ، کُر و روحالقدس غسلِ تعمید بیَن 20وَبینِن تعلیم بیَن تا گِشتِ چیَلی که وَهُمَ فرمُون دامَ بارِنَ جا. اِسگَ مِ هر روژ تا آخِرِ اِئی دینیا هامَ گَردِ هُمَ!»
Currently Selected:
مَتّی 28: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
