مَرقُس 1
1
یحیااِ تعمیددهندَه ریِ مسیحَ آمادَه مِ
1شروع خَوَرِ خوش دربارَه عیسی مسیح، کُرِ خدا.
2دُرُس هرَجورَ که نُمِ کِتُواِ اِشعیا پیغمبر نیسایَ:
«اِسگَ رسول گُوژِمَ وَرِ تو رِاَ مَم،
که اَوَ ریتَ وَرِ تو آمادَه مِ؛»
3«دَنگِ اَوَ که نُمِ بیُااُون هُاوارَ مِ:
”ریِ خداوند آمادَه کَن!
ریَلِ اَوَ راس کَن.“»
4یحیااِ تعمیددهندَه نُمِ بیُااُون ظاهر بی، اَرا مردم موعظَه مَکِردی تا اَرِ تواَ و بَشقِشِ گناهَلِن غسل تعمید تواَ بِگِرِن، 5گِشتِ مردم سرزمینِ یهودیَه و تمُوم مردمُونِ شهر اورشلیم مَچانَ لا اَوَ و گناهَلِ گُوژِن مَگِرتِنَ مِل و نُمِ رواِ اردن وَدَسِ اَوَ تعمیدَ مَگِرتِن. 6یحیی جِنِکی اَژ پشمِ شتِر مَکِردیَ وَر و کمربنی چرمی مَبَستیَ کمری، و قُلَ و حَسَلِ صحرا مُهاردی. 7اَوَ موعظَه مَکِردی و مِتی: «بعدِ مِ، کسی که قدرتی اَژ مِ بیشتِرَ مای و مِ حتی قابل نیم دولا بِم و بَنِ چارُقَلِ بَنی اَوَ وا کَم. 8مِ هُمَلَ وَآاُو غسل تعمید دامَ، امّا اَوَ وَروحالقدس تعمیدِتُونَ مِ.»
تعمید عیسی
9نُمِ اَ روژَلَ، عیسی اَژ شهرِ ناصرَه جلیل یاهات و نُمِ رواِ اردن اَژ دَسِ یحیی تعمید گِرتی. 10وخدی عیسی اَژ آاُو یاهاتَ دَشت، هرَلَزَ دیتی که آسِمُون وا بی و روح خدا مِثادِ کَمُوتَری یاهاتَ هار و نیشتیَ ری اَوَ. 11و دَنگی اَژ آسِمُون رَسی که «تو کُرِ عزیزِ مِنین و مِ اَژِنِت خیلی راضیِم.»
عیسی امتحُونَ مُاو
12روح خدا هرَلَزَ عیسااَ بِردیَ نُمِ بیُااُون. 13عیسی چل روژ نُمِ بیُااُون بی و شِطُون اَوَ امتحُونی مَکِردی. اَوَ اَنُمِ حیونَلِ وَشی سرَ مَکِردی و فرشتَلَ اَوَ خذمتَ مَکِردِنی.
عیسی خذمتیَ شروعَ مِ
14ایسا که یحیی دسگیر بی، عیسی چیَ منطقَه جلیل. اَوَ خَوَرِ خوشِ پاتشاهی خدااَ اعلومَ مَکِردی 15و مِتی: «دَ وخدی رَسیَ و پاتشاهی خدا نزیکَ. تواَ بِکَن و ایمُون بارِنَ اِئی خَوَرِ خوشَ.»
عیسی اوّلین شاگردَلیَ دَنگَ مِ
16وخدی عیسی اَژ پیلی دریاچَه جلیل ردَ میا، شَمعون و بِرااِئی آندریاسَ دیتی که تور مُاوشتِنَ نُمِ دریاچَه، چیکِ ماهیگیر بین. 17عیسی فِتیَه آنَ: «بورِنَ تُرِ مِ که هُمَلَ مَکَمَ صیادِ مردم.» 18آنَ هرَ مِقَ تورَلِ گُوژِنَ هیشتِنَ جا و چِنَ تُرِ اَوَ. 19وخدی عیسی یِ قِری چیَ جِلِتِر، یعقوب کُرِ زِبِدی و بِرااِئی یوحنااَ دیتی که نُمِ قایق تورَلِنَ روفواَ مَکِردِن. 20هرَلَزَ آنَلَ هَنا کِردیَ لا گُوژ و آنَ بُاواَ گُوژِن زِبِدی وَگَردِ کارگرَلِ نُمِ قایقَ وِل کِردِن و کَتِنَ ری و چِنَ دُمِ عیسی.
شفااِ پییائی که روح گَن داشتی
21آنَ چِنَ شهرِ کَفَرناحوم. وخدی روژِ شَمَه مقدّس رَسی، عیسی هرَلَزَ چیَ نُمِ کنیسه و شروع کِردیَ تعلیم داتِن. 22مردم اَژ تعلیم داتِنی بِلِإیژِنِن یاهات، چیکِ وَقدرت و اختیار تعلیمَ ماتی، نَه مِثادِ معلمَلِ تورات. 23هرَ مِقَ، نُمِ کنیسه آنَ پییائی بی که روحِ گَن داشتی. اَوَ داد کیشاتی: 24«عیسااِ ناصری، چکار دیرینَ هیمَ؟ یعنی یاهاتینَ هیمَلَ نابود کِإین؟ مَزانِم تو کیإین! تو اَ قدّوسِ خدائین!» 25امّا عیسی تَشَر داتیَ اَ روحِ گَنَ و فِتی: «دَنگِت نای و اَژِنی بواَ دَشت!» 26اِیندا روحِ گَنَ اَ پییااَ آاُوتیتَ تشنُج، وَنعره اَژِنی یاهاتَ دَشت. 27گِشتِ مردم اَخِنگَ بِلِإیژِنِن یاهات که مَپِرسانَ یَکتِرِک: «یَ چِ کَ؟ چِ تعلیم جدید و چِ قدرت و اختیاری! اَوَ حتی وَروحَلِ گَنیژ فرمُونَ مِ و آنَ اَژِنی فرمُونَ میَرِن.» 28پس طولی نَکیشاتی که نُوم اَوَ اِ سرتاسرِ منطقَه جلیل کَتَ سر زُاُنِ مردم.
عیسی آیمَلِ فِرِاِئی شفااَ مِ
29عیسی هرَلَزَ اَژ کنیسه یاهاتَ دَشت، وَگَردِ یعقوب و یوحنا چیَ مالِ شَمعون و آندریاس. 30هَسیرَه شَمعون تب داشتی و کَتی نُمِ جابُونی. آنَ هرَلَزَ عیسااَ اَژ حالی باخَوَر کِردِن. 31پس عیسی چیَ بُلُنِ سری و دَسی گِرتی و بُلُنگ کِردیتی. تب ژَنَ قطع بی و شروع کِردیَ میمُونداری اَژِنِن.
32ایوارَه، ایسا که اَفْتُو نیشت، گِشتِ مریضَل و آیمَلِ دیوزدَه آاُوردِنَ لا عیسی. 33مردم شهر گِشتِن دَمِ درِ اَ مالَ جمع بین! 34عیسی آیمَلِ فِرِاِئی که وَمرضَلِ جورَجور دچار بین، شفا داتی و هَمیژ دیوَلِ فِرِاِئی کِردیَ دَشت، امّا نِإیشتی دیوَلَ قِصِاِئی بِکَن، چیکِ دیوَلَ مَزِناستِن اَوَ کیَه.
دعااِ عیسی نُمِ خلوت
35دَمِ صُ که هُوا هَنو تِریک بی، عیسی وِرزااِر و اَژ مالَ چیَ دَشت و چیَ جا پَرت و خلوتی و اُورَ شروع کِردیَ دعا کِردِن. 36شَمعون و هُمراهَلی مینِ اَوَ کِردِن. 37وخدی پیا کِردِنی، فِتِنَ بینی: «کلکس هانَ مینِ تو!» 38عیسی فِتیَه بینِن: «بورِن بِچیمُونَ نُمِ وِلِتَلِ دِرِوَر تا اُوریژَ موعظَه کَم، چیکِ اَرا خاطرِ یَ یاهاتِمَ.» 39پس عیسی کَتَ ری، نُمِ گِشتِ منطقَه جلیل نُمِ کنیسَلِن موعظَه مَکِردی و دیوَلَ مَکِردیَ دَشت.
شفا پییااِ جذامی
40پییائی جذامی یاهاتَ لا عیسی، زُنی داتی لالِکااَ بینی و فِتی: «اَگَر بِخواین، مِتِنین شفام بِإین.» 41عیسی دلی اَرِنی سُوت، دَسی دیریژ کِردی، دَس ناتیَ قِ اَ پییا و فِتی: «مِم، شفا بِگِر!» 42هرَلَزَ، جذام اَژِنی چیَ دَشت و شفا گِرتی. 43عیسی هرَلَزَ مِرخصی کِردی و اَوَ قَدَخَ کِردی 44و فِتَ بینی: «حُاواُسِت بو که دربارَه یَ وَکسی چیئِی نوشین؛ بلکم بِچو و گُوژِتَ وَکاهن نیشُون بیئَه و اَرا شفا گِرتِنِ گُوژِت، اَ پیشکَشی که موسی پیغمبر امر کِردِسی تقدیم کَ تا اَرِنِن شاهادَتی بو که تو شفا گِرتینَ.» 45امّا اَ پییا وخدی چیَ دَشت، دربارَه یَ قِصَ کِردی و اِئی خَوَرَ جار داتی. جوریکه عیسی دَ نِتِنِستی آشکارا بایَ نُمِ شهر، بلکم نُمِ جااَلِ پَرتی دیرَژ شهر مَمینا. بااِئیحال مردم اَژ کل جا ماهاتِنَ لای.
Currently Selected:
مَرقُس 1: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
