مَتّی 26
26
نَشقَه کُشتِنِ عیسی
1وخدی عیسی گِشتِ اِئی قِصَلَ تمُوم کِردی، فِتیَه شاگردَلِ گُوژی: 2«مَزانینُون که دو روژِ تِرِك، عِد پِسَخَ مَرَسی و کُرِ انسُونَ تحویلَ مَن تا بیکیشینیَر صلیب.»
3اِیندا رئیسَلِ کاهنَل و شیخَلِ قوم نُمِ کاخِ کاهنِ اعظم که قیافا نُوم داشتی، جمع بین 4وَگَردیَک مشورَت کِردِن که چُطِر وَکَلَک عیسااَ دسگیر کَن و بُکُشِنی. 5امّا مِتِن: «نُمِ روژَلِ عِد نَکِإیم، ناخُاو مردم بِرِشِنِنَ یَک.»
عیسی نُمِ وِلِتِ بیتعَنْیا
6اَمِقَ که عیسی نُمِ وِلِتِ بیتعَنْیا نُمِ مالِ شَمعونِ جذامی بی، 7یِ ژَنی وَگَردِ ظرفِ مَرمَری اَژ عطر خیلی قیمتی یاهاتَ لای و مِقِاِئیکه عیسی سر سِفرَه نیشتیبی، عطرَ رِشُونیَ ری سر عیسی. 8شاگردَلَ وخدی یَ دین آگِر اَژ سرِن چی، فِتِن: 9«اَراچَ یَ حیفِ میلَ مَکِإینی؟ چیکِ اِئی عطرَ میا وَپیلِ فِرِاِئی فروت و پیلیَ ماتیمُونَ فقیرَلَ.» 10عیسی فهمی، فِتی: «اَراچَ اِئی ژَنَ اَذیَتَ مَکِإینُونی؟ اَوَ کارِ خواِئی در حقِ مِ کِردِسی. 11فقیرَلَ همیشَه اَگَردِ گُوژِتُون دیرینُون، امّا مِ همیشَه نِرینُون. 12اِئی ژَنَ وَرِشُونِنِ اِئی عطرَ ری بدنِ مِ، اَصِل مِ اَرا کفنِدفن آمادَه کِردِسی. 13حقیقتاً وَبینِتُونَ موشِم، نُمِ گِشتِ دینیا، هر جا که اِئی مِزگِنا بیَن، کارِ اِئی ژَنیژَ وَیادِ اَوَ تِعریفَ مَن.»
خیانت یهودا
14اِیندا یهودااِ اَسخَریوطی که یَکی اَژ دُوازَه شاگرد بی، چیَ لا رئیسَلِ کاهنَل 15فِتی: «چَ وَبینِمَ مِإینُون اَگَر عیسااَ تسلیم هُمَ کَم؟» آنَ سی سکَه نقرَه وَبینی دان. 16اَژَدُما، یهودا مینِ فِرصتی بی تا عیسااَ تسلیم کِ.
شُمِ آخِر
17نُمِ اوّلین روژِ عِد فطیر که هرَ عِد پِسَخَ، شاگردَلَ یاهاتِنَ لا عیسی و پِرسین: «اَکو مِت تا اَرِنِت تیارِک بینیمُون تا شُمِ پِسَخَ بیرین؟» 18اَوَ فِتیَه بینِن که نُمِ شهر، بِچِنَ لا فِلُون کس و بوشِنَ بینی: «استاد موشی: ”وخدِ مِ نزیکَ. رسم پِسَخَ مَخوام وَگَردِ شاگردَلِم نُمِ مالِ تو بارِمَ جا.“» 19شاگردَلَ هرَجورَ که عیسی فِتیتی، کِردِن و پِسَخَ تیارِک دین.
20شِ بی و عیسی وَگَردِ دُوازَه شاگردِ گُوژی سر سِفرَه نیشتی. 21مِقِ شُم هاردِن، عیسی فِتی: «حقیقتاً، وَبینِتُونَ موشِم، یَکی اَژ هُمَ مِ تسلیم دشمنَ مِ.» 22شاگردَلَ خیلی ناراحت بین و یَکییَکی اَژِنی پِرسین: «اَوَ مِنِم، اِ آقا؟» 23عیسی جواُو داتی: «اَوَ که دَسِ گُوژی وَگَردِ مِ مَنِاَ نُمِ دِری، هر اَوَ مِ تسلیمَ مِ. 24کُرِ انسُون هرَجورَ که دربارَه اَوَ نُمِ کِتُواَلِ مقدّس نیسایَ، مَچو، امّا هِرو اَرِ اَوَ که کُرِ انسُونَ تسلیم دشمنَ مِ. اَرِ اَوَ بیتِر بی که هرگِس وَدینیا نِماهات.» 25اِیندا یهودا، هرَ اَوَ که عیسااَ تسلیمَ مِ، جواُو داتی: «استاد، اَوَ مِنِم؟» عیسی جواُو داتی: «تو گُوژِت فِتین!»
26مِقِاِئیکه هَنو سرگرمِ هاردِن بین، عیسی نُونَ گِرتی و بعد اَژ شکر کِردِن، کُت کِردی و داتیَ شاگردَلَ و فِتی: «بِگِرِن، بیرِن؛ یَسَ بدنِ مِ.» 27اِیندا جُمَ گِرتی و بعد اَژ شکر کِردِن اَوَ داتیَ شاگردَلَ و فِتی: «گِشتِتُون اَژ یَ هُرتبیکیشِن. 28یَسَ خُوینِ مِ اَرا عَهتِ [جدید] که اَراخاطرِ بَشقِشِ گناهَلِ فِرَ کسَل مَرِشی. 29وَبینِتُونَ موشِم که اَژ اِئی ثمرِ اَاُنیر دَ هُرتنِمَم تا روژی که اَوَ اَگَردِ هُمَ نُمِ پاتشاهی بُاواَ گُوژِم، تازَه هُرتبیکیشِم.»
30اِیندا بعدِ سرود خوانتِن، کَتِنَ ری، چِنَ وِیرِ کواُیِ زِإیتین.
پیشگوئی حاشا کِردِن پطرس
31اِیندا عیسی فِتیَه آنَ: «اِیمْشِ گِشتِتُون مِ وِلَ مَکِإینُون. چیکِ نُمِ کِتُواَلِ مقدّس نیسایَ،
”مِمَر شُااُونَ
و دینالِ گلَه مَچوچِنَ یَک.“
32امّا بعدِ یَ که زِنی بیم، جِلِتِرَژ هُمَ مَچِمَ جلیل.» 33پطرس جواُو داتی: «حتی اَگَر گِشتِن، تو وِل کَن، مِ هرگِس وِلِت نِمَکَم.» 34عیسی فِتیَه بینی: «حقیقتاً وَبینِتَ موشِم که هر اِیمْشِ، وِرَژ یَ که دَنگِ کَلَشیرَ بای، سه گِل تو مِ حاشااَ مِإین!» 35امّا پطرس فِتی: «حتی اَگَر لازم بو وَگَردِ تو بِمِرِم، حاشات نِمَکَم.» باقیِ شاگردَلیژ هُنَ فِتِن.
باخِ جِتْسیمانی
36اِیندا عیسی وَگَردِ شاگردَلِ گُوژ چیَ جائی وَنُومِ جِتْسیمانی و فِتیَه آنَ: «اِیرَ بِنیشِن تا مِ بِچِمَ اُورَ، دعا کَم.» 37پطرس و دو کُرِ زِبِدیَ وَگَردِ گُوژی بِردی و خُصَدار و پریشُون بی، 38فِتیَه آنَ: «اَخِنگَ گُونِم خُصَه دیری، که وَحالِ مِردِن کَتِمَ. اِیرَ بِمینِن و اَگَردِ مِ بوسِنَ خَوَر.» 39اِیندا قِری چیَ جِلِتِر و ریئی ناتیَر خاک و دعا کِردی: «اِ بُاواَم، اَگَر مُاو اِئی جُمَ اَژ مِ بُاوژَ اَلا، امّا نَه چیئِی کِ مِ مَخوام، بلکم اَچیکِ تو مَخواین، بو.» 40اِیندا گِلَهاردیَ لا شاگردَلِ گُوژ و آنَلَ دیتی هانَ خُاو. و فِتیَه پطرس: «یعنی نِمِتِنیستینُون ساتی وَگَردِ مِ بوسینُونَ خَوَر؟ 41بوسِنَ خَوَر و دعا بِکَن تا نَکِإینُونَ نُمِ امتحُون. روح مَخوای، امّا جسم قوت نِری.» 42اِیندا عیسی یِگِل تِرِك چی و دعا کِردی: «اِ بُاواَم، اَگَر ری تِرِکی نییَه بِخِرِ یَ که اِئی جُمَ بیرِم، پس اَچیکِ تو مَخواین، بو.» 43وخدی گِلَهاردی، آنَلَ اَدُوارَه دیتی که هانَ خُاو، چیکِ کَمَلِن سنگین بی. 44اِیندا یِگِل تِرِك آنَلَ وَحالِ گُوژِن هیشتیَ جا و چی و اَرا سوّمین بار هرَ دعااَ اَدُوارَه کِردی. 45اِیندا یاهاتَ لا شاگردَلَ و فِتیَه بینِن: «یعنی هَنو هاینُونَ خُاو و استراحتَ مَکِإینُون؟ نگاه کَن اَ ساتَ که با بای، رَسیَ که کُرِ انسُون وَدَسِ گناهکارَل تسلیم بو. 46وِرزِنِر بِچیمُون. نگاه کَن، اِسگَ اَوَ که وَبینِم خیانتَ مَکِ، رَسی.»
عیسی دسگیرَ مُاو
47عیسی هَنو قِصَ مَکِردی که یهودا، یَکی اَژ اَ دُوازَه نفر، اَگَردِ قُشونِ کَلِنگی وَگَردِ گُرز و شمشیر، اَژ لا رئیسَلِ کاهنَل و شیخَلِ قوم، اَژ ری رَسین. 48کسی که وَعیسی خیانت کِردی، نیشُونَه داتیبی وَهُمراهَلِ گُوژی و فِتیتی: «اَوَ که ماچَ مِمی، هر اَوَسَ؛ اَوَ بِگِرِن.» 49اِیندا هرَلَزَ چیَ نزیکِ عیسی و فِتی: «سِلام، استاد!» و اَوَ ماچ کِردی. 50عیسی فِتیَه بینی: «اِ رفیق، کاری که اَرا اَوَ یاهاتینَ، بِکَ.» اِیندا اَ آیمَلَ یاهاتِنَ جِلِ، رِشانَ سر عیسی و اَوَ گِرتِنی. 51نُمِ اِئی وخدَ، یَکی اَژ هُمراهَلِ عیسی دَس بِردیَ شمشیر، شمشیرَ کیشاتی و یِ ضرپَه داتیئَر خذمتکارِ کاهنِ اعظم و گوشیَ بِریتی. 52امّا عیسی فِتیَه بینی: «شمشیر گُوژِتَ غلاف کَ؛ چیکِ هر که شمشیر بیکيشی، وَشمشیریژ کُشتَه مُاو. 53یعنی گِمُونَ مَکِإین نِمِتِنِم هر اِسگَ اَژ بُاواِ گُوژِم بِخوام که بیشتِرَژ دُوازَه لشکر فرشتَه اَرا کمکِم رِ کِ؟ 54امّا اَگَر إیجورَ بو چُطِر پیشگوئیَلِ کِتُواَلِ مقدّس انجومَ مُاو که موشی اِئی چیَلَ با اتفاق بِکِ؟» 55اَمِقَ، عیسی فِتیَه اَ جمیَتَ: «مَر مِ راهزَنِم که وَگَردِ گُرز و شمشیر اَرا گِرتِنِم یاهاتینُونَ؟ مِ هر روژ نُمِ معبد مَنیشتِم و تعلیمَ ماتِم و مِنَ نَگِرتینُون. 56امّا گِشتِ یانَ اتفاق کَت تا پیشگوئیَلِ پیغمبرَل نُمِ کِتُواَلِ مقدّس انجوم بِگِری.» اِیندا گِشتِ شاگردَلَ اَوَ هیشتِنَ جا، هیواین.
محاکمَه نُمِ ری شورا یهود
57آنَ که عیسااَ گِرتیبین، اَوَ بِردِنَ لا قیافا، کاهنِ اعظم. اُورَ معلمَلِ تورات و شیخَل جمع بین. 58امّا پطرس اَژ دیر چیَ دُمِ عیسی تا رَسیَ حیاطِ مالِ کاهنِ اعظم. اِیندا چیَ نُمِ و نیشتیَ لا نگبُونَلَ تا بینی کار وَکواَ مَرَسی. 59رئیسَلِ کاهنَل و گِشتِ اهلِ شورا یهود اَ دُمِ یَ بین که شاهادَتِ دُرُواِئی وَضدِ عیسی پیا کَن تا اَوَ بُکُشِنی؛ 60امّا هرچَن شاهدَلِ دُرُوزِنِ فِرِاِئی یاهاتِنَ جِلِ، هُنَ چیئِی پیا نِإی. آخِرسَر دو نفر یاهاتِنَ جِلِ 61فِتِن: «اِئی پییا فِتِسی، ”مِ مِتِنِم معبدِ خداوند بِرِمُونِم و نُمِ سِ روژ اَوَ اَژ نُو بِسازِم.“» 62اِیندا کاهنِ اعظم وِرزااِر و فِتیَه عیسی: «هیچ جواُواِئی نِرین؟ یَ چیَ که وَضدِ تو شاهادَتَ مَن؟» 63امّا عیسی هرَجورَ ساکت مَنت. کاهنِ اعظم فِتیَه بینی: «وَ خدااِ زِنی قَسَمِتَ مَم که اَگَر تو هرَ مسیحین که با بای، کُرِ خدا، وَهیمَ بوش؟» 64عیسی جواُو داتی: «تو گُوژِت فِتین! وَبینِتُونَ موشِم که اَژیرَدُما کُرِ انسُونَ مِإینینُون که وَدَسِ راسِ خدااِ قادر نیشتیَ و ری ابرَلِ آسِمُونَ مای.» 65اِیندا کاهنِ اعظم یَخَه گُوژی چاک داتی و فِتی: «کِفِر کِردی! دَ چه شاهدی مَخواینُون؟ اِسگَ که کِفِر اَوَ شِنَفتینُون، 66حُکم هُمَ چیَ؟» جواُو داتِن، فِتِن: «سِزااِئی مِردِنَ!» 67اِیندا تُف کِردِنَ ریِ عیسی، اَوَ کتک داتِنی. بِریژی کَشیدَ دانَرِنی، 68مِتِن: «اِ مسیح، نبوت کَ و بوش کی داتیئَر بینِت؟»
حاشا کِردِن پطرس
69اَمِقَ پطرس وَدرِ مالَ، نُمِ حیاط نیشتیبی که یِ کلفتی یاهاتَ لای و فِتی: «تونیژ وَگَردِ عیسااِ جلیلی بین!» 70امّا اَوَ جِلِ گِشتِن حاشا کِردی و فِتی: «نِمَزانِم چَ موشین!» 71اِیندا چیَ طرف دَمِ درِ مالَ. اُورَ کلفتی تِرِك، اَوَ دیتی و فِتیَه آیمَلی که اُورَ بین: «اِئی پییاإیژ وَگَردِ عیسااِ ناصری بی!» 72پطرس اِئی گِلیژ حاشا کِردی، قَسَم هاردی که «مِ اِئی پییااَ نِمَشناسِم.» 73گِلی تِرِك، آیمَلی که اُورَ هوسااُوین، یاهاتِنَ جِلِ و فِتِنَ پطرس: «شِکی نییَه که تونیژ یَکی اَژ آنِإینَ! اَژ قِصَ کِردِنِت دیارَ جلیلیکین!» 74اِیندا پطرس شروع کِردیَ لعنت کِردِنِ گُوژی و قَسَم هاردی، فِتی: «اِئی پییااَ نِمَشناسِم!» هرَلَزَ کَلَشیرَ خوانتی. 75اِیندا پطرس قِصَلِ عیسی آاُوردیَ وِیر که فِتیتَ بینی: « وِرَژ یَ که دَنگِ کَلَشیرَ بای، سه گِل تو مِ حاشااَ مِإین!» پس چیَ دَشت بورَبوری ناتی گیرا.
Currently Selected:
مَتّی 26: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
