مَتّی 24
24
نیشُونَلِ آخِرِ اِئی زمُونَ
1وخدی که عیسی اَژ معبد خداوند چیَ دَشت و داشتی مَچااَ ری، شاگردَلی یاهاتِنَ لای تا ساختمُونَلِ معبدَ وَبینی نیشُون بیَن. 2عیسی فِتیَه بینِن: «گِشتِ یانَلَ مِئِنینُون؟ حقیقتاً، وَبینِتُونَ موشِم، بَردی وَری بَردی تِرِك نِمَمینیَجا، بلکم گِشتِن مَرِمی.»
3وخدی عیسی نیشتیبی سر کواُیِ زِإیتین، شاگردَلی نُمِ خلوتی یاهاتِنَ لای، فِتِن: «وَهیمَ بوش کِ اِئی اتفاقَلَ مَکِ و نیشُونَه یاهاتِنِ تو و آخِرِ اِئی زمُونَ چیَ؟» 4عیسی جواُو داتی: «حُاواُسِتُون بو تا کسی گُمراه۟تُون نَکِ. 5چیکِ فِرَ کسَل وَنُومِ مِ مان و موشِن، ”مِ هرَ مسیحی کِم که با بای،“ و آیمَلِ فِرِاِئیَ گُمراهَ مَن. 6دربارَه جنگلَ مَشنِإینُون و چُاواِ جنگلَ وَگوشِتُونَ مَرَسی. امّا هراسُون نِن، چیکِ هُنَ اتفاقَلی با بِکِ، امّا هَنو وَآخِری نَرَسیَ. 7هَمیژ قومی وَضدِ قومِ تِرِك و مملکتی وَضدِ مملکت تِرِك مِرزِنِر و قِاَطیَل و زمینلرزَل نُمِ جااَلِ جورَجورَ مای. 8امّا گِشتِ یانَ فَقَد شروع دردِ زایمُونَ.
9نُمِ اَ زمُونَ هُمَلَ تسلیمَ مَن تا عذُو بیکیشینُون و هُمَلَ مَکُشِن. گِشتِ ملتَل اَراخاطرِ نُوم مِ اَژ هُمَ بیزارَ مِن. 10نُمِ اَ روژَلَ فِرَ کسَل اَژ ایمُونِ گُوژِن گِلَمیرِن، و خیانتَ مَکَنَ یَکتِرِک و اَژ یَکتِرِک بیزارَ مِن. 11پیغمبرَلِ دُرُوزِنِ فِرِاِئی مِرزِنِر، و فِرَ کسَلَ گُمراهَ مَن. 12اَراخاطرِ شَرَباری فِرِاِئی که مُاو، محبت آیمَلِ فِرِاِئی سردَ مُاو. 13امّا هر که تا آخِر پایار بِمینی، نجات پیا مَکِ. 14و اِئی مِزگِنا پاتشاهی نُمِ گِشتِ دینیا اعلومَ مُاو تا گواهی اَرا گِشتِ ملتَل بو. اِیندا آخِرکارَ مَرَسی.
15پس وخدی اَ کِفارَتدار نابودگری که دانیال پیغمبر اَژِنی قِصَ کِردیتی، نُمِ مکان مقدّس سر پا بینینُون - کسی که یَ مَخوانی حُاواُسی بو- 16اِیندا هر که ها نُمِ یهودیَه، بیهایَ کواُیَلَ؛ 17و هر که ها سر بُونِ مال، اَرا چیکِ با بیَریئِر، نایَ هار؛ 18و هر که ها سر زمین، اَرا گِرتِنِ عبااِ گُوژی گِلَنیری بایَرَ مال. 19هِرو اَرِ ژَنَلی که نُمِ اَ روژَلَ لَمِن پِرَ و دالی که اُویلَ شیرِن! 20دعا کَرِن که هیوإینِتُون نُمِ زِمِسُون یا نُمِ روژ شَمَه مقدّس نُاو. 21چیکِ نُمِ اَ زمُونَ هُنَ مُصیوَت کَلِنگی مَکِ که مِثادِ اَوَ اَژ اَ اوّلِ دینیا تا اَلُون اتفاق نَکَتیَ و هرگِسیژ نِمَکِ. 22اَگَر اَ روژَل کوتاه نِمیا، هیش بشری گُونِ سالم نِمَکِردیَ دری. امّا اَراخاطرِ آیمَلی که نیشُون بینَ، اَ روژَلَ کوتااَ مُاو.
23نُمِ اَ زمُونَ، اَگَر کسی وَبینِتُون بوشی، ”بورِن بینِن، اَ مسیحی که با بای اِیرَسَ!“ یا ”اَ مسیحی که با بای اُورَسَ!“ بُااُور نَن. 24چیکِ مسیحَلِ دُرُوزِن و پیغمبرَلِ دُرُوزِن مِرزِنِر، نیشُونَل و معجزَلِ کَلِنگی مَکَرِن تا اَگَر بو، حتی آیمَلی که نیشُون بینَ گُمراه کَن. 25نگاه کَن، وَرِ یَ وَبینِتُون فِتِم. 26پس اَگَر وَبینِتُون بوشِن، ”نگاه کَن اَوَ نُمِ بیُااُونَ“ نَچِنَ اُورَ و اَگَر بوشِن، ”نگاه کَن اَوَ ها نُمِ مال،“ بُااُور نَن. 27چیکِ هرَجورَ که تَشَوَرَق اَنُمِ شرق آسِمُون دیارَ مُاو و نوری تا غربَ مَرَسی، یاهاتِنِ کُرِ انسُونیژ هُنَ مُاو. 28هر جا لَشی بو، دالَلیژ اُورَ جمَع مِن.
29هرَلَزَ، بعد اَژ مُصیوَتِ اَ روژَلَ
”اَفْتُو تِریکَ مُاو
و مُو دَ نور نِمِ؛
ستارَلَ اَژ آسِمُونَ مَرِشِن،
و قدرتَل آسِمُونَل مانَ لَرزَ.“
30اِیندا نیشُونَه کُرِ انسُون نُمِ آسِمُون ظاهرَ مُاو و گِشتِ طایفَلِ دینیا شینَ مَکَن، و کُرِ انسُونَ مِإینِن که وَقدرت و جِلال کَلِنگ ری ابرَلِ آسِمُونَ مای. 31اَوَ فرشتَلِ گُوژیَ وَدَنگ کَلِنگِ شِپور، رِاَ مَکِ و آنَ نیشُونبیَلِ خدااَ اَژ چُوار گوشه دینیا اَژ یِلا آسِمُون تا اَلا تِرِك، دِرِ یَک جمَع مَن.
دارِ انجیر
32اَژ دارِ انجیر اِئی تعلیمَ یاد بِگِرِن: هرَ مِقِاِئیکه شاخَلِ اَوَ جونَه مِ و بَلْگَ مِ، مَفهمینُون که تااُسُون نزیکَ. 33هریجورَ، هر وخد اِئی چیَلَ بینینُون، مَفهمینُون که یاهاتِنِ اَوَ نزیکَ، بلکم ها دَمِ درَ. 34حقیقتاً، وَبینِتُونَ موشِم، تا گِشتِ یانَ اتفاق نَکِ، اِئی نسلَ اَژ بین نِمَچو. 35آسِمُون و زمین اَژ بینَ مَچو، امّا قِصَلِ مِ هرگِس اَژ بین نِمَچِن.
کَمَری مَنتِن اَرا گِلَهاردِنِ مسیحی که با بای
36امّا هیشکس اَ روژ و ساتَ نِمَزانی بِخِرَژ بُاواَ؛ حتی فرشتَلِ آسِمُون و کُریژ اَژ اَوَ باخَوَر نین. 37مِقِ یاهاتِنِ کُرِ انسُون، مِثادِ روژَلِ نوحَ مُاو. 38چیکِ نُمِ روژَلِ وِرَژ طوفُون، وِرَژ یَکه نوح بِچواَ نُمِ کَشتی، مردم مُهاردِن و هُرتَمَکیشان و ژَنَ مَگِرتِن و شیَ مَکِردِن 39و نِمَزِناستِن چَ مُاو تا اِئیکه طوفُون یاهات و گِشتِ آنَلَ اَگَردِ گُوژی بِردی. ظاهر بیِنِ کُرِ انسُونیژ هریجورَ مُاو. 40اَژ دو پییا که ها سر زمین، یَکی میَرِن و یَکی تِرِك مَمینیَ جا. 41و اَژ دو ژَن که وَگَردیَک اَسیُواَ مَن، یَکی میَرِن و یَکی تِرِك مَمینیَ جا. 42پس حُاواُسِتُون بو، چیکِ نِمَزانینُون خداوندِ هُمَ چِ روژیَ مای. 43یَ بِزانِن که اَگَر صُاُی۟ مالَ مَزِناستی دُز نُمِ چِ وخدی اَ شِاَ مای، مَمَنَ خَوَر و نِمِإیشتی اَژ نُمِ مالی چیئِی بِدُزِن. 44پس هُمِإیژ آمادَه بین، چیکِ کُرِ انسُون نُمِ ساتی مای که کَمَری نینُونی.
45پس اَ نُوکرِ باوفا و دُونا کیَه که اَربابی اَوَ وَسرپرسی حوزِ مالِ گُوژی ناتیِ تا سر وخد خوراکِ آنَلَ بیئَه بینِن؟ 46خَشالَ اَ نُوکرَ که وخدی اَربابی گِلَبیری اَوَ سرگرمِ اِئیکارَ بینی. 47حقیقتاً، وَبینِتُونَ موشِم که اَوَ مِاَ سرپرس گِشتِ مالِمِنال گُوژی. 48امّا اَگَر اَ نُوکرَ، شَرَبار بو و لا گُوژ فکِر کِ که ”اَربابِم دیر کِردِسی،“ 49و شروع کِ وَآزار داتِنِ هُمکارَلِ گُوژی و اَگَردِ آیمَلِ مَس مشغول هاردِن و هُرتداتِن بو، 50اِیندا اَربابی نُمِ روژی که کَمَری نییَه و نُمِ ساتی که اَژِنی باخَوَر نییَه، مای 51و اَوَ اَژ وسط مَکِتیَ دو کُت، مُاوژیتَر جایگاه ریاکارَل، جائی که گیری و دِنُونریچَسَ.»
Currently Selected:
مَتّی 24: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
