مَتّی 16
16
تقاضا نیشُونَه آسِمُونی
1شیخَلِ فرقَه فریسی و صَدّوقی یاهاتِنَ لا عیسی تا اَوَ امتحُون کَن. وَاِئی نیت اَژ اَوَ خواستِن تا نیشُونَه آسِمُونی وَبینِن نیشُون بِ. 2عیسی جواُو داتیَ آنَ: «با ایوارَه، موشینُون ”هُوا خواَ مُاو، چیکِ آسِمُون قرمزَ“ 3و دَمِ صُ موشینُون ”اِیمِرو هُوا خَراُواَ مُاو، چیکِ آسِمُون قرمز و گِرایَ.“ هُمَ خواَ مَزانینُون چُطِر اَژ ری آسِمُون معنی کِإینُون، امّا نِمِتِنینُون نیشُونَه زمُونَلَ معنی کِإینُون! 4نسلِ شَرَبار و زِناکار نیشُونَه مِتِن، امّا نیشُونَه وَبینِن نیشُون نِمَن بِخِرَژ نیشُونَه یونسِ پیغمبر.» پس آنَلَ هیشتَجا و اَژ اُورَ چی.
حَمیرتُرش فریسیَل و صَدّوقیَل
5وخدی شاگردَلَ چِنَ اَکُنِ دریاچَه، وِیرِن چی اَگَردِ گُوژِن نُون بیَرِنِر. 6عیسی فِتیَه آنَ: «هوشیار بینُون و اَژ حَمیرتُرش فریسیَل و صَدّوقیَل دیری کَن.» 7اِیندا شاگردَلَ اَنُمِ گُوژِن بحث کِردِن، مِتِن: «چیکِ اَگَردِ گُوژِمُون نُون نُااُوردیمُونَ، هُنَ موشی.» 8عیسی یَ فهمی و فِتیَه بینِن: «اِ سُس ایمُونَل، اَراچَ سر یَکه نُون نیرینُون وَگَردیَک بحثَ مَکِإینُون؟ 9یعنی هَمینی نفهمینُون؟ مَر وِیرِتُون نِمای اَ پنج نُون و پنج هزار نفر و چَن سَوَدی که جمع کِردینُون؟ 10یا اَ هفت نُون و چُوار هزار نفر و چَن سَوَدی که جمع کِردینُون؟ 11پس اَراچَ نِمَفَمینُون که دربارَه نُون قِصَ نِمَم؟ بلکم فِتِم که حُاواُسِتُون وَحَمیرتُرش فریسیَل و صَدّوقیَل بو.» 12اِیندا شاگردَلَ فهمین که وَگَردِ آنَ دربارَه تعلیم فریسیَل و صَدّوقیَل هُشتار داتیِ، نَه دربارَه حَمیرتُرش نُون.
اعتراف پطرس دربارَه مسیح
13وخدی عیسی رَسیَ منطقَه قیصریۀ فیلیپی، اَژ شاگردَلِ گُوژی پِرسیتی: «وَنظر مردم، کُرِ انسُون کیَه؟» 14آنَ جواُو داتِن: «بِری موشِن یحیااِ تعمیددهندَه. بِری تِرِك موشِن ایلیا پیغمبرَ، و بِریژی موشِن اِرمیا یا یَکی اَژ پیغمبرَلَسَ.» 15عیسی پِرسیتی: «هُمَ چَ موشینُون؟ وَنظر هُمَ مِ کیِم؟» 16شَمعون پطرس جواُو داتی: «تو هرَ مسیحین که با بای، کُرِ خدااِ زِنی!» 17عیسی فِتی: «خَشالَ بینِت، اِ شَمعون، کُرِ یونا! چیکِ اِئی حقیقتَ گوشت و خُوین اَرا تو آشکار نَکِردیِ، بلکم بُاواَ مِ که نُمِ آسِمُونَ یَ آشکار کِردی. 18مِنیژَ موشِم که تو پطرسین یعنی کَمَر، و مِ ریِ اِئی کَمَر، کلیسا گُوژِمَ مُاوژِم و دروازَلِ جَندِم وَبینی پیروز نِمِن. 19کیلیلَلِ پاتشاهی آسِمُون مِمَ بینِت. اَچیکِ ری زمین بِإنین، نُمِ آسِمُون بَسَ مُاو و اَچیکِ ری زمین وا کِإین، نُمِ آسِمُون وازَ مُاو.» 20اِیندا عیسی شاگردَلِ گُوژیَ قَدَخَ کِردی که وَهیشکس نوشِن اَوَ مسیحَ.
پیشگوئی عیسی دربارَه مرگ و زِنیبیِنی
21اَژ اَ دُما عیسی شروع کِردیَ آشکار کِردِنِ اِئی حقیقتَ وَشاگردَلِ گُوژی، که لازمَ بِچواَ اورشلیم و اُورَ اَژ شیخَل و رئیسَلِ کاهنَلِ معبدِ یهود و معلمَلِ تورات عذُواِ فِرِاِئی بینی و کُشتَه بو و نُمِ روژِ سوّم زِنی بو. 22امّا پطرس اَوَ بِردیَ سیکی وَتَشر فِتیَه بینی: «دیرِگُونِت، اِ آقا! خدا نَکِ هُنَ چیئِی هرگِس اَرا تو اتفاق بِکِ.» 23عیسی ری گیردُونی، فِتیَه بینی: «اَ جِلِ ریم بِچو اَلا، اِ شِطُون! تو هاینَ جِلِ ری مِ، چیکِ فکرَلِ تو انسُونیَ نَه خدائی.»
24اِیندا ری کِردیَ شاگردَلَ و فِتی: «اَگَر کسی بِخوای اَژ دُمِ مِ بای، با گُوژیَ حاشا کِ، صلیبِ گُوژیَ بِگِریَ کول و اَ تورِ مِ بای. 25چیکِ هر که بِخوای گُونِ گُوژیَ نجات بِ، اَوَ اَژ دَسَ مِ؛ امّا هر که اَراخاطرِ مِ گُونِ گُوژیَ اَژ دَس بِ، دُوارَه اَوَ ماریَ دَس. 26اَرا انسُون چِ فایدَه دیری که گِشتِ دینیا بیَری، امّا گُونِ گُوژیَ بِبازی؟ انسُون جَمَزِ گُونِ گُوژ چَ مِتِنی بِ؟
27چیکِ کُرِ انسُون نُمِ جِلال بُاواَ گُوژی وَگَردِ فرشتَلی مای و اَ مِقَ وَهر کسیَ مِطاقِبِ کارَلی اَجرَ مِ. 28حقیقتاً، وَبینِتُونَ موشِم، بِری اِیرَ هوسانَ که تا کُرِ انسُونَ نِإینِن که نُمِ پاتشاهیِ گُوژی مای، طُمِ مرگ نِمَچِشِن.»
Currently Selected:
مَتّی 16: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
