مَتّی 15
15
هَمیَت پاکیِ باطن
1اِیندا بِری اَژ شیخَلِ فرقَه فریسی و معلمَلِ تورات اَژ شهر اورشلیم یاهاتِنَ لا عیسی و فِتِن: 2«اَراچَ شاگردَلِت رسم و رسومِ شیخَلِمُونَ مَنِنَ ژیرِ پا؟ آنَ دَسَلِ گُوژِنَ وِرَژ غذا هاردِن نِمَشورِن!» 3عیسی جواُو داتی: «اَراچَ هُمَ اَراخاطرِ حفظ رسم و رسومِ گُوژِتُون، حُکمِ خدااَ مَنینُونَ ژیرِ پا؟ 4چیکِ خدا فِتِسی: ”حرمت بِنَنَ بُاواَ و داتُون“ و”هر که وَبُاواَ یا دا گُوژ دُشبین بِ، اَل۟وَتَه با کُشتَه بو.“ 5امّا هُمَ موشینُون اَگَر کسی وَبُاواَ یا دااِئی بوشی: ”هر کمکی که ممکن بی اَژ مِ وَبینِتُون بِرَسی، وَخفِ خدا کِردِمَ،“ 6إیجورَ، دَ وَبینی واجب نییَه حرمت بِنِاَ بُاواَ گُوژی. هر هُنَ هُمَ اَراخاطرِ حفظ رسم و رسومِ گُوژِتُون کلومِ خدا باطلَ مِإینُون. 7اِ ریاکارَل! اِشعیا پیغمبر دربارَه هُمَ چِ خو پیشگوئی کِردی وخدی که فِتی:
8”اِئی قومَ وَزُاُنِ گُوژِن
حرمت مَنِنَ مِ،
امّا دلِن اَژ مِ دیرَ.
9آنَ بیخودی مِ مَپَرَسِن،
و تعلیمِن چیئِی بِخِرِ
حُکمَلِ بشری نیَه.“»
10اِیندا اَ جمیَتَ هَنا کِردیَ لا گُوژی و فِتی: «گوش بیَن و بِفهمِن. 11اَچیکِ مَچواَ دَمِ آیم، اَوَ نِجس نِمَکِ، بلکم اَچیکِ اَژ دَمِ اَوَ مایَ دَشت، اَوَسَ که آیمَ نِجسَ مَکَری.» 12اِیندا شاگردَلَ یاهاتِنَ لا عیسی و فِتِن: «آیا مَزانین که اِئی قِصَت وَفریسیَلَ بَر هاردیِ؟» 13عیسی جواُو داتی: «هر نهالی که بُاواَ آسِمُونی مِ نکاشتیِسی، ریشی کَنَ مُاو. 14آنَلَ وَحالِ گُوژِن وِل کَن، آنَ رانِمالِ کورِن. اَگَر کوری آصاکیشِ کور تِرِك بو، هر دِك مَکَنَ نُمِ چاه.» 15پطرس فِتی: «معنی اِئی مَتَلَ اَرا هیمَ تِعریف کَ.» 16عیسی جواُو داتی: «یعنی هُمِإیژَ هَمینی درک نِمَکِإین؟ 17مَر نِمَزانینُون که هر چی اَژ دَمِتُون بِچواَ نُمِ، مَچواَ نُمِ لَمِتُون و بعد مَچواَ دَشت؟ 18امّا اَچیکِ اَژ دَم مایَ دَشت، اَژ دل مایَ دَشت، و یَسَ اَچیکِ آیمَ نِجسَ مَکَری. 19چیکِ اَژ دلَ که فکرَلِ گَن، آیم کُشتِن، زِنا، بیعصمتی، دُزی، شاهادَتِ دُرُو و بِتُم مایَ دَشت. 20یانَسَ که آیمَ نِجسَ مَکَری، نَه غذا هاردِن وَدَسِ نَشورا!»
ایمُون ژَنِ کَنعانی
21عیسی اَژ اُورَ چیَ دَشت و چیَ نُمِ منطقَه صور و صیدون. 22روژی ژَنی کَنعانی اَژ حوزِ اُورَ، یاهاتَ لای و داد کیشاتی: «اِ آقا، اِ کُرِ داوود، وَبینِم رحم کَ! دیوی دِتِمَ سخت اسیر کِردِسی.» 23امّا عیسی هیچ جواُو ناتی، تا اِئیکه شاگردَلَ یاهاتِنَ جِلِ و اَژِنی خواهش کِردِن، فِتِن: «اَوَ مِرخص کَ، چیکِ وَداد و هُاوار اَ دُمِ هیمَ مای.» 24عیسی جواُو داتی: «مِ فَقَد اَرا دینالِ گُمبیِ قوم اسرائیل رِ بیمَ.» 25امّا اَ ژَنَ یاهات و جِلِ اَوَ زُنی داتی و فِتی: «اِ آقا، کمکِم کَ!» 26عیسی جواُو داتی، فِتی: «نُونِ اُویلَل گِرتِن وَرِ سَگَل آاُوشتِن دُرُس نییَه.» 27ژَنَ فِتی: «اَرِ، اِ آقا، بااِئیحال حتی سَگَلیژ اَژ هُوردَ ریزَلی که اَژ سِفرَه صُاُی۟لِن مَکِ، میرِن!» 28اِیندا عیسی فِتیَه بینی: «اِ ژَن، ایمُونِت فِرَسَ! حاجَتِ تو بَرآاُوردَه بو!» و جُواَرجا دِتی شفا گِرتی.
غذا داتِن وَ چُوار هزار نفر
29عیسی اَژ اُورَ کَتَ ری و کنارِ دریاچَه جلیل چیَ ری، چیَ وِرازِ کواُاِئی و اُورَ نیشتی. 30جمیَت فِرِاِئی یاهاتِنَ لای وَگَردِ گُوژِن شَلَل و کورَل و فلجَل و لالَل و مریضَلِ تِرِك آاُوردِن، ناتِنَ جِلِ پالِ عیسی و اَوَ آنَلَ شفا داتی. 31مردم وخدی دین که لالَل قِصَ مَن، فلجَل آزا مِن، شَلَل ریَ مَچِن و کورَل مِإینِن، بِلِإیژِنِن یاهات و خدااِ اسرائیلَ جِلال داتِن.
32عیسی شاگردَلِ گُوژیَ هَنا کِردی و فِتی: «دلِم وَحالِ اِئی جمیَتَ مَسُوزی، چیکِ اِسگَ سه روژَ که هانَ گَردِ مِ و چیئِی اَرا هاردِن نِرِن. نِمِتِم آنَلَ وِرسِنی رُاُونَه کَم، گاسَن نُمِ ری اَژ حال بِچِن.» 33شاگردَلی فِتِن: «نُمِ هُنَ جااِ پَرتی اَکو مِتینیمُون نُون وَاندازَه کافی اَرا سیر کِردِنِ هُنَ جمیَتِ کَلِنگی جور کِإیمُون؟» 34عیسی پِرسیتی: «چَن نُون دیرینُون؟» فِتِن: «هفت نُون و چَن ماهی هُوردِلَ.» 35عیسی فِتیَه مردم تا بِنیشِنَر زمین. 36اِیندا هفت نُون و ماهیَلَ گِرتی و بعد اَژ شکر کِردِن، آنَلَ کُت کِردی و داتیَ شاگردَلِ گُوژی و آنِإیژ وَاَ جمیَتَ داتِن. 37گِشتِن هاردِن و سیر بین و شاگردَلَ هفت سَوَد پِر اَژ هُوردَ نُونَلی که مَنتی جمع کِردِن. 38نفرَلی که غذا هاردِن، بِخِرِ اَژ ژَنَل وَ اُویلَلِ چُوار هزار پییا بین. 39بعد اَژ یَ که عیسی مردمَ مِرخص کِردی، سُواُر قایق بی و چیَ منطقَه مَجَدان.
Currently Selected:
مَتّی 15: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
