مَتّی 17
17
نُمِریِ عیسی عوضَ مُاو
1بعدِ شَش روژ، عیسی، پطرس و یعقوب و یوحنااَ که بِرااِ یعقوب بی، گِرتی و آنَلَ وَگَردِ گُوژی بِردیَ وِرازِ کواُیِ بُلُنگی. 2اُورَ، جِلِ آنَ، نُمِریِ عیسی عوض بی: نُمِرِیاِئی مِثادِ اَفْتُو مَدَرَشخا و جِنِکی مِثادِ نور، اِسپی بی. 3هرَ مِقَ، موسی و ایلیااِ پیغمبر جِلِ کَمَلِ آنَ ظاهر بین که اَگَردِ عیسی قِصَ مَکِردِن. 4پطرس فِتیَه عیسی: «اِ آقا، بیِنِ هیمَ اِیرَ خواَ. اَگَر بِخواین، سه کولااَ مَسازِم، یَکی اَرا تو، یَکی اَرا موسی و یَکیژی اَرا ایلیا.» 5هَنو اِئی قِصَ وَزُاُنِ پطرس بی که وَیِگِل ابری نورانی ری آنَ سا آاُوتی وَدَنگی اَژ ابر رَسی که: «یَسَ کُرِ عزیزِم که اَژ اَوَ خیلی راضیِم؛ گوش بِنَ بینی!» 6وخدی شاگردَلَ اِئی دَنگَ، شِنَفتِن اَخِنگَ زَلَن چی که وَری، کَتِنَر زمین. 7امّا عیسی چیَ نزیکِ آنَ و دَس ناتیَر قِن و فِتی: «وِرزِنِر و زَلَتُون نَچو!» 8وخدی کَمَلِ گُوژِنَ وا کِردِن، بِخِرِ عیسی کسی نِإین.
9وخدی که اَژ کواُی۟ ماهاتِنَ هار، عیسی فرمُون داتیَ بینِن: «اَچیکِ دینُونَ اَرا کسی نوشِن، تا وخدی که کُرِ انسُون اَژ مِردیَل زِنی بو.» 10شاگردَلَ اَژ عیسی پِرسین: «اَراچَ معلمَلِ تورات موشِن که اوّل با ایلیا بای؟» 11عیسی جواُو داتی: «اَل۟وَتَه که ایلیا مای و گِشتِ چیَ دُرُسَ مَکَری. 12امّا وَهُمَ موشِم که ایلیا یاهاتیَ و اَوَ نَشناختِن و هر چی خواستِن وَبینی کِردِن. و إیجورَ کُرِ انسُونیژ وَدَسِ آنَ عذُواَ مَکیشی.» 13اِیندا شاگردَلَ فهمین که دربارَه یحیااِ تعمیددهندَه قِصَ مَکِاَ بینِن.
شفا کُرِ دیوزدَه
14وخدی یاهاتِنَ لا جمیَت، پییائی نزیک بیَ عیسی و جِلِ اَوَ زُنی داتی و فِتی: 15«اِ آقا، وَکُرِمِ رحم کَ. اَوَ تشنُجیَ و فِرَ عذُواَ مَکیشی. بیشتِر وخدَل مَکِاَ نُمِ آگِر و آاُو. 16اَوَ آاُوردِمَ لا شاگردَلِت، امّا نِتِنِستِن شفااِئی دَنی.» 17عیسی جواُو داتی: «اِئی نسلِ بیایمُون و منحرف، تا کِ با وَگَردِ هُمَ بیم؟ تا کِ با تحملِتُون کَم؟ اَوَ بارِنَ لا مِ.» 18پس عیسی تَشَر داتیَ دیوَ و دیوَ اَژ کُرَ چیَ دَشت و اَوَ جُواَرجا شفا گِرتی. 19اِیندا شاگردَلَ یاهاتِنَ لا عیسی و نُمِ خلوت اَژِنی پِرسین: «اَراچَ هیمَ نِتِنِستیمُون اَ دیوَ بِکِإیمُونَ دَشت؟» 20عیسی جواُو داتی: «وَخاطرِ یَ که ایمُونِتُون کَمَ. حقیقتاً، وَبینِتُونَ موشِم اَگَر ایمُونی وَهوردِلِاِئیِ دُونی خردل داشتینُون، مِتِنینُون وَاِئی کواُیَ بوشینُون ”اَژ اِیرَ وَاُورَ جُواَرجا بو“ و جُواَرجااَ مُاو و هیش کاری اَرا هُمَ محال نییَه. 21[امّا اِئی جنس دیوَ بِخِرَژ روژی و دعا کِردِن نِمَچواَ دَشت.]»
پیشگوئی دُوارَه عیسی اَرا مرگ و زِنی بینِ گُوژی
22مِقِاِئیکه نُمِ جلیل دِرِ یَک جمع بین، عیسی فِتیَه بینِن: «کُرِ انسُون وَدَسِ مردم تسلیمَ مُاو. 23و آنَ اَوَ مَکُشِن و اَوَ نُمِ روژِ سوّم زِنیَ مُاو.» و شاگردَلَ خیلی پریشُون بین.
سکَه نُمِ دَمِ ماهی
24بعد اِئیکه عیسی و شاگردَلی رَسینَ شهر کَفَرناحوم، مأمورَلِ گِرتِنِ مالیاتِ دو دِرْهَمیِ معبدِ یهود، یاهاتِنَ لا پطرس و فِتِن: «یعنی استادِ هُمَ مالیات معبد نِمِ؟» 25اَوَ جواُو داتی: «اَل۟وَتَه که مِ!» وخدی پطرس یاهاتَ نُمِ مال، وَرِ یَکه اَوَ چیئِی بوشی، عیسی فِتیَه بینی: «اِ شَمعون، پاتشاهَل دینیا اَژ چِ کسَلی خراج یا مالیاتَ مَگِرِن؟ اَژ اُویلَل گُوژِن یا اَژ غریبَلَ؟ چَ موشین؟» 26پطرس جواُو داتی: «اَژ غریبَلَ.» عیسی فِتیَه اَوَ: «پس اُویلَل معافِن! 27امّا اَرا یَ که آنَلَ نَرَنجونیمُون، بِچو لِ دریاچَه و قُلابی بُاوژ. اوّلین ماهی که گِرتین، دَمی وا کَ. سکَه چُوار دِرْهَمی پیااَ مِإین. وَگَردِ اَوَ سهمِ مِ و گُوژِتَ بیئَه بینِن.»
Currently Selected:
مَتّی 17: NLV
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
