OMAYELETUMBULO 16
16
1Eemhangela domutima odomunhu, ndelenee enyamukulo lelaka tali di kOmwene. 2Eendjila adishe domulumenhu oda yela momesho aye, ndelenee Omwene ta konakona eemhepo. 3Oilonga yoye i yandja kOmwene, opo nee eemhangela doye tadi ka wanifwa. 4Oinima aishe Omwene e i lilongelela, nosho yo omuhenakalunga okwe mu shitila efiku lomupya. 5Keshe ou e nomutima we linenepeka, ye oixuna koshipala shOmwene. Oshili, ye ita ka kala ita handukilwa. 6Okunyona taku yavelelwa nohole noudiinini, nomokutila Omwene omunhu ta kukuma owii. 7Eendjila domulumenhu ngeenge tadi wapalele Omwene, Ye ote mu anuna novatondadi vaye. 8Oshipewa shinini pamwe nouyuki shi dule ouhapu womaliko pamwe noipupulu. 9Omutima womunhu tau diladila ondjila yaye, ndelenee Omwene ta endifa eenghatu daye. 10Etokolo leendjovo li li komilungu dohamba. Moihokolola okanya kayo itaka popi oipupulu. 11Oshiyelekifondjele noshiyelekifo sha yuka tashi di kOmwene, oiyelekifomanya yomokakutu oyo oshilonga shaye. 12Oshilonga shouhenakalunga oixuna koshipala sheehamba, osheshi olukalwapangelo tali pamekwa kouyuki. 13Eehamba da hokwa omilungu di nouyuki, ndele di hole ava hava popi oinima yoshili. 14Oupyuhandu wohamba u li ngaashi ovatumwa vefyo, ndelenee omulumenhu omuyuki ote u lotifa. 15Mouyelele woshipala shohamba omu nomwenyo, nokuhokwa kwayo okwo ngaashi oshilemo shodula mokwenye. 16Okulilikolela ounongo ku dule unene oshingoldo nokulikongela eendunge ku dule oshisiliveli. 17Ondjila yovayuki tai kukuma owii, naau ta pashukile okweenda kwaye, ota amene omwenyo waye. 18Ounhwa tau tetekele ehanauno, nelinenepeko tali tetekele epunduko. 19Okukala omunini mokati kovalininipiki ku dule okutukulilafana oihakanwa pamwe novalinenepeki. 20Ou ta diinine ondjovo, ote ke limonena ouwa. Naau te lineekele Omwene, ye omunelao. 21Ou e nomutima u nounongo, ota ifanwa omunaendunge, nounyenye womilungu tau hapupalifa elongo. 22Eendunge domunaendunge odo ofifiya yomwenyo kuye, ndelenee outekuduliko womalai oo oulai.
23Omutima womunongo tau mu nongopeke mokanya kaye ndele tau hapupalifa elongo lomilungu daye. 24Eendjovo doukaume di li ngaashi oshikuki shomaadi eenyiki; ounyenye komwenyo nevelulo lomakipa. 25Ope nondjila tai talwa komunhu oya yuka ndelenee exulilo layo eendjila defyo. 26Ondjala yomulongi tai mu longifa, osheshi edimo laye tali mu fininike. 27Omukatalume ota fe elambo loshiponga, nokomilungu daye oku na omundilo wa xwama. 28Omulumenhu e nekonda ta kunu eemhata, nomulundili ta tukaula ookaume. 29Omulumenhu omukolokoshi ta hongaula mukwao ndele te mu twala nondjila ihe fi iwa. 30Ou ta fifikinifa omesho aye, ota diladila ekengelelo, ou ta umike omilungu daye, okwa ninga nokuli owii. 31Eenghwakutoka odo oshishani shefimano. Otashi monika mondjila youyuki. 32Omutalanheni e dule omuladi. Ndele ou te lipangele, e dule ou a teya oshilando. 33Oshihoololifo tashi ekelwa mekolo, etokolo lasho tali di alushe kOmwene.
Currently Selected:
OMAYELETUMBULO 16: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
