OMAYELETUMBULO 17
17
1Oshipambu shomungome mukukutu pamwe nombili, shi dule ongudu yomayambo i yadi oililo pamwe neemhata. 2Omupiya omunaendunge ta ka pangela omudalwa omumati omupwidi, ndele ta ka tukulila ovadalwa ovalumenhu efyuululo. 3Onhelekelo koshingoldo, nediko koshisiliveli, ndelenee Omwene ta yelifa omitima. 4Omunawii ta pwilikine omulungu u noipupulu, nomunaipupulu ta pwilikine elaka lii. 5Ou ta sheke ohepele, ota dini Omushiti wayo. Ou ta hafele oshiponga, ita ka kala ita handukilwa. 6Ovatekulu vo oshidingo shovakulupe nefimano lovana olo xe yavo. 7Eendjovo doukulunhu itadi wapalele elai, hano eendjovo doipupulu tadi wapalele ngahelipi ohamba. 8Okawe ke nondilo oko ombubo momesho amwene wako. Keshe apa ta ende, e nelao. 9Ou ta tuvike etauluko, ota kongo ohole, ndelenee ou ta tongolola vali eendjovo, ta tukaula ookaume. 10Epukululo tali longo momunaendunge li dule omadengo efele elai. 11Oshimhulu tashi kongo ashike oshiponga, ndelenee omutumwa ehe nonghenda te mu tuminwa. 12Okushakeneka emwangha la kufwa koumwanghona valo, oku dule okushakeneka elai moulai walo. 13Ou ta alulile ouwa owii, owii itau ka efa eumbo laye. 14Ehovelo leshilafano olo ngaashi omeva taa panuka, onghee hano, efa eemhata fimbo oo inaa panuka. 15Ou ta yukipalifa omuhenakalunga ndele ta vele omuyuki ombedi, vo aveshe oixuna koshipala shOmwene. 16Oimaliwa yokulikongela ounongo oi noshilonga shashike meke lelai? Shaashi ehe neendunge okulikongela eendunge. 17Kaume oku na ohole alushe, nomumwaina ta dalwa, a kwafe moluhepo. 18Ou ta yandje eke ndele a ninga omuponhele woifuta, ye omunhu ehe neendunge. 19Ou e hole eemhata e hole yo etauluko. Ou te liningile oshivelo shile, te likongele ehanauno. 20Ou e nomutima inau yuka, ita mono ouwa. Nelaka loipupulu otali wile momupya. 21Elai tali etele omudali walo oluhodi, naxe yelai ke nehafo. 22Omutima u nehafo tau kwafa mokuveluka, ndelenee omhepo yoluhodi tai kukutike omakipa. 23Omuhenakalunga ta tambula ombubo konhulo yamukwao a pengife eendjila douyuki. 24Omunaendunge e nounongo komesho yaye, ndelenee omesho elai taa lengaalenga ominghulo dedu. 25Omona omushima ye oluhodi laxe, nouyehame munene waau e mu dala. 26Owii nokuli ngeenge ou ehe nombedi, ta futifwa. Okudenga ovanamadina itaku wapala. 27Ou ta pangele eendjovo daye, ye e neshiivo. Ndele ou e nomhepo ya pama, ye omulumenhu e neendunge. 28Elai yo, ngeenge tali mwena, otali talwa lo omunaendunge. Ngeenge tali umike omilungu dalo, tali talwa olo li neendunge.
Currently Selected:
OMAYELETUMBULO 17: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
