OMAYELETUMBULO 15
15
1Enyamukulo litalala tali kandula po oupyuhandu, ndelenee ondjovo ikukutu tai tukulula ehandu. 2Elaka lovanongo tali hepaulula eshiivo loshili, ndelenee okanya kovashima taka fuluka oulai. 3Omesho Omwene e li apeshe, ndele taa tale nokudidilika ava vai naava vawa. 4Elaka lipu olo omuti womwenyo, ndelenee lo ngeenge li noipupulu tali holola omufya womomhepo. 5Elai tali dini outekuduliko waxe, ndelenee ou ta tambula ehanyeno, ota ka ninga omunongo. 6Meumbo lomuyuki omu nemona linene, ndelenee oikongwa yomuhenakalunga tai hanaunwa po. 7Omilungu dovanongo tadi kunu eshiivo, ndelenee omutima womushima inau yuka. 8Eyambo lomuhenakalunga olo oixuna koshipala shOmwene, ndelenee eindilo lomuyuki Ye te li hokwa. 9Okweenda kwomuhenakalunga okwo oixuna koshipala shOmwene, ndelenee ou ta lalakanene ouyuki, Ye e mu hole. 10Ou ta yapuka mo mondjila ota hangika kehandukilo lidjuu. Ou ta tondo ehanyeno ta ka fya. 11Oshovafi nonhele yehanauno oya yeuluka koshipala shOmwene, unene hano omitima dovana vovanhu. 12Omusheki ina hala okupukululwa komunhu, ita i kovanaendunge. 13Omutima u nehafo tau yelifa oshipala, ndelenee ouyehame womutima tau nyikifa omhepo oluhodi. 14Omutima womunaendunge tau kongo eshiivo, ndelenee okanya kovashima taka endaenda noulai. 15Omafiku aeshe omufininikwa omai, ndelenee omutima tau hafe, otau dana oshivilo alushe. 16Oshipewa shinini mokutila Omwene shi dule omamona mahapu noupyakadi wao. 17Evelelo lombidi pe nohole li dule etomeno lohove ya ondoka ndele po pe netondafano. 18Omulumenhu omuhandunhu ta pendula eemhata, ndelenee omutalanheni ta anuna eemhata. 19Ondjila yomundede oyo ya fa omangade omano, ndelenee elila lovayuki la kokolwa. 20Omona ta hafifa xe, nomunhu omushima ta dini ina. 21Oulai oo enyakuko lovahenandunge, ndelenee omulumenhu omunaendunge ota ende a yuka. 22Apa pehe nomapukululo, eemhangela tadi nyonauka, ndelenee apa pe novapukululi vahapu, do tadi wanifwa. 23Omulumenhu ta hafele enyamukulo lomokanya kaye; ondjovo oiwa ngahelipi pefimbo layo! 24Ondjila yomwenyo yomunaendunge tai twala pombada, onghee hano ta dulu okukukuma oshovafi shokoshi. 25Omwene ta hanauna po eumbo lovalinenepeki, ndelenee ta pameke ongaba yomufiyekadi. 26Eemhangela dovanawii oixuna koshipala shOmwene, ndelenee eendjovo doukaume oda yela. 27Ou te likongele eliko loipupulu, ota hanauna po eumbo laye. Ndele ou ha tondo ombubo, ota kala nomwenyo. 28Omutima womuyuki otau diladila osho tau shi nyamukula, ndelenee okanya kovahenakalunga taka fulukifa oinima ii. 29Omwene e li kokule novahenakalunga, ndelenee ta udu eindilo lovayuki. 30Omesho taa vilima, otaa hafifa omutima, nondaka iwa oyo omungo momakipa. 31Okutwi taku udu ehanyeno lokomwenyo, otaku kala mokati kovanongo. 32Ou ta ekeleshi outekuduliko, ota dini okukalamwenyo kwaye mwene, ndelenee ou ta pwilikine epukululo, ote likongele eendunge. 33Okutila Omwene okwo outekuduliko tau eta ounongo; nelininipiko tali tetekele efimano.
Currently Selected:
OMAYELETUMBULO 15: OKYB
Highlight
Copy
Compare
Share
Want to have your highlights saved across all your devices? Sign up or sign in
Oshikwanyama Bible Revised © Bible Society of Namibia, 2008, 2012.
