इब्रानी 12

परमेसर अपन होपोनकु के सुधराव कुआय

1नोःआँ चलते बिसवास रिनकु गोवाह, नुमिन बगरा तुंदरा आबु आला चौगिरदा एदनाआ, दो आबु मि-मियांड होना छेछेका वाला जिनीस आउर बबझाव वाला पाप के हटाव केते, 2अपन नजाईर के ईसु पखी टिकाव केते, धीरज से होना नीर रे मड़ांग बढ़ाव सेनाबु। आउर बिसवास रिनी अगुवा आउर सिसिध वाला ईसु पखी ताक जोहाव एकायाबु, हुनी हिजोअ वाला बेरा रे भेटाअः वाला सुख लःअय कुरूस रे दुख सहाव लःअय, आउर लाज रअः काइटको काय फिकीर लअः, आउर परमेसर आला राईज गदी रे जोम पखी सेन केते दुड़ूः नाय।

3हिना लःअय ईसु रे धेयानेपे, जे होड़ अनेःग हरते पापीकु आला नुमिन बिरोध सहाव लःअय, ची आबु हदियाव केते अलबु हिम्मत हराअ। 4आपे पाप लोः लड़ाई यअते कापे हुड़मुड़ाव ताना, ची आपे आला मयोम तू ताना। 5#अयु 5:17; बेव 3:11,12एतान आपे होना धरम पोथी रअः बचन के रिड़िःग केदापे?

जे आपे के अपन होपोन लकान समझाअ केनाय, “ए बाबु, परभु आला डांट-डपट के बेकार आलपे समझाव कोअ,

आउर हुनी आला ससाईत रे ढाढ़स आलपे हराव कोअ।

6एता लःअय ची परभु, जेके दुलार कुआय हुंकू के ससाईत कुआय,

आउर जेके होपोन बनाव कुआय हुंकू के टेंपा तरअः हुमाअ कुआय।”

7आपे दुख के सताव समझाव केते सहाव गुल तापे, परमेसर आपे के होपोन समझाव केते आपे लोः नोकान बेवहारेआय, हुंकू ओके होपोन हेके, जेके बाबा काय सताव कुआ? 8जदि आपे एटाअकु लकान ससाईत रेनअः भागी योआपे दो होना लकान ससाईत का भेटाआ दो आपे होपोन नालगे, बकिर बेलाज कामी तरअः सिरजाव उनकु ठहराव कोआपे। 9आउर जब ची आबु आली दुनिया रिनी बाबा होः आबु के सताव एमेआय, दो माईनीयाबु, एतान आतमा रिनी बाबा आला हक रे इरबु ताहिनोआ, जेकर से ची जिवीःड बु ताहिन! 10बाबाकु दो अपन सोंच रअः मोताबिक थोड़ेक दिन लःअय ससाईत कु एमे केना, बकिर परमेसर दो आबु आला फयदा लःअय गी ससाईत एमेआय, ची आबु होः हुनी आला पबितरता रे भागी योअबु। 11जब ससाईत भेटाअः बेरा दो बेस का आदायोआ, दुख रअः बात गी नेलोआ, रे होः गी जे होना के सहाव सहाव हेवाअ नाकु, तयोम हुंकू के सुख रअः गाती-गाती धरमिकता रअः बानी भेटाआ।

12 # जसा 35:3 हिना लःअय अपन अबड़ बाइंह के आउर दुबड़ मुकड़ी के केटे:गेपे! 13#बेव 4:26आउर सोझ होरा रे मड़ांग ते बढ़ाव सेनपे, ची जे बिसवास रे अबड़ आउर लंगड़ा आकु हुंकू आलकु नुर कोअ बकिर केटेगोअकु।

उपदेस आउर चेतावन

14जामेकु लोः मेल दोहोय पे, आउर होना पबितरता के नानाम लःअय कुरनीसेपे, एता लःअय ची बेगर पबितरता रे, ओके होः परभु के एरपे नेल दड़ीआ। 15#कन 29:18चौंवचित ताहिनपे, नोकान आलु हुयाव कोअ ची परमेसर आला दया तरअः लंका ताही जुनोअपे, चाहे जहान कठोर बात आपे के ठोकोर आदाकोअ, आउर ढ़ेर होड़कु के छितीर बिबितीर वाला झगड़ा रअः जाईर आलु उडुंग कोअ, आउर होना तरअः ढ़ेर होड़ आलकु असुध कोअ। 16#एहेः 25:29–34नोकान आलु हुयाव कोअ, ची जाहें होड़ बेलाज कामीकु चाहे एसाव लकान अधरमी आलकु कोअ, जे मिखेप रअः घोटो लःअय अनेःग आला पाठ होपोन हेके होना पद के आखरिंग केदाय। 17#एहेः 27:30–40आपे पड़ीआपे ची, हुनी तयोम आसीस नाम चहाव नेनाय, दो हुनी बे जुकूर नाय, आउर सिसकाव-सिसकाव इयाम-इयाम कोय लःअय, रे होः गी आपाते आला मन के काय रूवाड़ दाड़ी लआ।

18 # उइठ 19:16–22; 20:18–21; कन 4:11,12; 5:22–27 आपे नोकान बुरू लतार रे कापे सोदोर ताना, जेके आपे छुवांव दाड़ीआपे, होनाःड़े ना दो सिनाई बुरू रअः रिम्बिल रअः धिनकाअ सेंगेल एदनाआ आउर ना कड़िया रिम्बिल, ना घुंयघुंय अंधार आउर ना गर्ड़रा, 19आउर तुरही रअः साड़ीयोः आउर ना परमेसर आला जोर से हकाव दुबाःड़े हीःग नेनापे, जेके आयुम केते इसराइलीकु अरजीये केनाकु ची आउर गी आबु लोः अलुय कंहड़ी के। 20#उइठ 19:12,13एता लःअय ची जे आचु ताही लिकुआय होना के काकु सहाव दाड़ी लअः। “जदि जहनीअ जनवर होः होना बुरू के सेन केते छुवांवे आय दो हुनी के छेछोम गुजी।” 21#कन 9:19आउर होना दरसन नुमिन जोर भयभयान तहिना ची मुसा कंहड़ी लःअय “ईङ ढ़ेर बोरिंग आउर थरथराईङ।”

22बकिर आपे सियोन बुरु मड़ांग रे आउर जिवीःड परमेसर आला सहर सिरमा रअः जिरोसलेम रअः मड़ांग रे आउर हजारो-हजार दूतकु आला रिझ रेनअः सभा रे सोदोर तनापे। 23आउर परमेसर आलकु जेठ होपोनकु जेकर नुमू सिरमा रे लिखा लअः एदनाआ, सभा रे हीःग नेनाकु, जामेकु नेनेयाय वाला परमेसर मड़ांग रे आउर सिध लिनकु धरमीकु आला आतमा दुबाःड़े जेके बेगर पाप ठहराव लअः एदनाआ, 24#एहेः 4:10आउर नावाँ करार रेनअः बिचवाई ईसु आउर छिछिटकाव वाला होना मयोम दुबाःड़े हीःग नेनाकु, जे हाबिल आला मयोम तरअः होः बेस बचन कंहड़ीआय।

25 # उइठ 20:22 आउर आपे चौंचित ताहिनपे, क-कंहड़ी वाला आला बात के आयुम केते काईंग आयुम लअः लकान आलपे कोअ, एता लःअय ची जे होड़ जे बेरा नोःआँ धरती रे ताही नेनाकु, मुसा तरअः परमेसर आला चेतवन के का आयुम केते काकु बंचाव नेना, दो आबु के सिरमा तरअः चेतावन एम केते का आयुम केते, एता लकान बंचाव दाड़ी कोआबु?

26 # हागा 2:6 हिमीन बेरा दो हुनी आला सबद रे धरती हिलाव ना, बकिर नहाअः दो आउर मिखेप वादायाय “ईङ मिखेप धरती एकला कोवान, बकिर सिरमा केहोः हिलाव केईंग।” 27“आउर मीखेप” नोःआँ सबद नोःआँ दिसतारेआय ची जे जिनीस हिलाअः वाला हेके, होना सिरजाव लअः जिनीस रअः चलते टलाव कोआ, बकिर जे जिनीस का हिलाआ, होना एरे टलाआ। 28हिना लःअय जे आबु के राईज भेटाव ताना, होना के इरबु हिलाव दड़ीआ, हिना लःअय आबु के धन्यवाद एम ए-एका एदनाआ, आउर हुनी आला मरजी रअः मोताबिक भकती आउर बोर यअते परमेसर आला सेवा एकायपे। 29#कन 4:24एता लःअय ची आबु आली परमेसर जिजीराव वाला सेंगेल हेके।

Currently Selected:

इब्रानी 12: ASR

Highlight

Copy

Compare