कोलोसी 2

1ईङ चहाईङ ची आपे नोःआँ पड़ीपे ची ईङ आपे लःअय, लौदीकिया रिनकु बिसवासीकु आउर हुंकू जामाकु लःअय, जे ईङ आला होड़ो रअः मेःड मुहांड़ के ओका हिला होः काकु नेल तदा, मुरुक कठोर मेहनाईत एकायीङ, 2जेकर से ची हुंकू आला मन रे संतवाना तहिन, पेरेम रे मि-जामुक तहिनोअ कु, आउर हुंकू पुरा समझ रअः पुरा धन जे जामा गेयान तरअः भेटाआ, हुंकू लःअय भेटाव एकान आउर परमेसर आला भेद के चिनहा दाड़ीकु जे ख्रीस्त हेके। 3होना रे लुर आउर गेयान रअः जामा कोठा उकु उना एदनाआ।

4ईङ नोःआँ निआँ लःअय कंहड़ीः दिंग ची जाहें होड़ आपे के लो-लोभाव लकान बात रे धोखा आलकु एम के। 5ईङ होड़ो तरअः आपे तरअः लंका ताहिन रे होः गी मन तरअः आपे लोः इदानिङा आउर ईङ के नोःआँ आपे आला जिनगी रअः अनुससन आउर ख्रीस्त रे आपे आला मजगुत बिसवास नेल केते खुस इदानिङा।

6आपे ख्रीस्त ईसु के परभु रअः भेस रे अपनाव तदियापे। हिना लःअय हिनी लोः मिलाव केते जिनगी रे चलाअ पे। 7हिनी रे आपे आला जाईर सबे आउर नेव मजगुत हुयाअः, आपे के जे बिसवास रअः सिकछा भेटाव ताना, हिना रे मजगुत ताहिनोः पे आउर आपे आला कुठी रे धन्यवाद रअः बिनती एकाय पे।

8चौंवचित ताहिन पे नोकान आलु हुयाव कोअ ची जाहें आपे के नोकान बेकार आउर धोखा एमोः वाला गेयान रअः दोवारा बहकाव पे, जे होड़कु आला मारी सिकछा मोताबिक एदनाआ आउर ख्रीस्त रे कोवान, बकिर दुनिया रअः जिनीस मोताबिक एदनाआ। 9एता लःअय ची ख्रीस्त आला मनवा होड़ो रे परमेसर खुदे भरल-पुरल लोः बसाआय। 10आउर ख्रीस्त रे स्थिर ताही केते आपे पेरेःग बनाव तनापे, ख्रीस्त दुनिया रअः जामा सासक आउर हाकिमकु आला बोहोअ हेके।

11हिना रे आपे आला खतना होः हुयाव ताना। होना खतना तीः तरअः काकु इयाया, होना खतना ख्रीस्त आला हेके, जेकर चलते पाप होड़ो के अड़गु केते गिड़ी गोअ तआकु। 12#रोमी 6:4आपे बतिस्मा बेरा ख्रीस्त लोः तेपेःड लेपेआकु आउर हुनी लोः साँघे जिवीःड-बिरीःड होः तदपेआय, एता लःअय ची आपे परमेसर आला सामर्थ्य रे बिसवास लआपे, जे हुनी के गोएःग केते जिवीःड थिलयाय। 13#इफि 2:1–5आपे आला गुनाह रअः चलते आउर अपन होड़ो रअः खतना रअः घटी रअः चलते गोएःग तहिनापे। परमेसर ख्रीस्त लोः जिवीःड-बिरीःड तदपेआय आउर आबु आला जामा पाप के छमा लःअय। 14#इफि 2:15हुनी कनहुन रअः होना चिठी के, जे आबु आला नुमू रे आउर बिरुध रे ताहिना, होना के मेटाव लःअय आउर कुरूस रे ठोकाव रअः दोवारा होना के आबु तरअः हटाव लःअय। 15ख्रीस्त अपन कुरूस रअः चलते आध्यात्मिक सासक कु आउर हाकिमकु आला सकती के आड़गु केदाय, आउर अपन जिताअः लःअय तोल लिनकु रअः भेस रे अपन पछली-पछली इदी लिकुआय।

होड़कु आला सिकछा आउर हुनी आला बनाव लअः कनहुन रे आलपे चलाअ

16 # रोमी 14:1–6 हिना लःअय जाहें के होः नोःआँ हक कनोआँ ची होना जोजोम-नुनू, परब, नावाँ चानु चाहे सथाअ हिला रअः बारे रे आपे रे दोस लगायाय। 17एता लःअय ची नोःआँ कुन जामा हिजोः वाला बात कुन रेनअः उम्बुल हेके। असलीयत दो ख्रीस्त गी हेके। 18आम अपन के नोकान होड़कु रअः चलते अपन पुरस्कार तरअः आलुम बाई कोअ, जे नकली तपस्या, सिरमादूतकु आला पुजा रे लगाल एदानिया। नोकान होड़ जामा बेरा होना दिव्य दर्सन रअः डींगेआकु। आउर अपन दुनिया रअः सोंच तरअः पेरेःग ताहिनोआय। 19#इफि 4:16हुनी अपने आप ख्रीस्त रअः अधीन रे काय तहिनोआ जे खास हेके जे जोड़ान आउर नस तरअः मेसा उईङ केते पुरा होड़ो रअः उपकारेआय, आउर जेके परमेसर पखा बढ़ाव चिआय।

20जदि आपे ख्रीस्त लोः गोएःग केते दुनिया रअः मारी सिकछा तरअः छुटकाराः नापे, दो आपे नोःआँ लकान एता लःअय आचरने आपे मानाअपे, जे लकान आपे आला जिनगी नहाअः जगुत दुनिया रअः अधीन रे एदनाआ? 21“होना के तीः तरअः आलपे सःब के, होना के आलपे चखाव के, चाहे होना के आलपे छुवाँव के?” 22नोःआँ जामा मनवाकु आला हुकूम आउर सिकछा हेके। नोकान जिनीस, जे काम रे आगुयाकु दो नास जुनोआ। 23अपन मनमना सधना, झुठा दीनता आउर कठोर तपस्या रअः चलते गेयान रअः देखावा दो हुयाआ, बकिर नोःआँ होड़ो रअः इकछा के रोरोकाव रे नोःआँ कुन रअः एतान होः फयदा कनोआँ।

Currently Selected:

कोलोसी 2: ASR

Highlight

Copy

Compare