कोलोसी 1

1पौलुस जे परमेसर आला मरजी मोताबिक ख्रीस्त ईसु आली प्रेरित हेके, हुनी आउर आबु आली बोको तिमुथियुस आला चिठी।

2ख्रीस्त रे कुलुस्से रे ताहिनोःकु बिसवासी बोकोकु आउर पबितर होड़कु आला लःअय, आबु आली बाबा परमेसर पखा तरअः आपे के दया आउर सानती भेटाव एकान।

धन्यवाद रअः बिनती

3आलिंग आपे लःअय बिनती यालिङ, जामा बेरा गी अपन परभु ईसु ख्रीस्त आली परम बाबा परमेसर आला धन्यवादे आलिंग। 4एता लःअय ची आले आयुम तदाले, ची ख्रीस्त ईसु रे आपे आला बिसवास एदनाआ, आउर जामा पबितर होड़कु तरअः पेरेम दोहोयापे। 5होना आसरा रअः चलते हुयाव ताना, जे आपे लःअय सिरमा रे बढ़ियाँः केन दोहो लअः एदनाआ, आउर जेकर बारे रे आपे पहिल रेगी सचा खभाईर माने कि बेस खभाईर रअः चलते आयुम चुकाव तदापे। 6जे लकान बेस खभाईर आपे दुबाःड़े हीःग थिना हिना लकान गोटा दुनिया रे दराआ। होना बेस खभाईर गोटा दुनिया रे जोअ आगुः दाय आउर बड़हाव तोराआ। आपे जे हिला तरअः बेस खभाईर आयुम लआपे आउर सचाई तरअः परमेसर आला दया के पाड़ी लआपे होना हिला तरअः होना आपे भीतर रे जोयोअ ताना आउर बड़हाअ ताना। 7#कोलो 4:12; फिल 1:23आपे के आबु आली दुलार परभु रे साँघे कामी वाला एपाफ्रास तरअः नुई आला सिकछा भेटाव ताना। इपफ्रास आपे लःअय ख्रीस्त आली बिसवास जुकूर धाँगड़ हेके। 8हुनी आबु के उदूः लःअय ची पबितर आतमा आपे रे इकिन पेरेम सिरजाव तदाय।

कुलोसी कु लःअय बिनती

9जे हिला तरअः आले नोःआँ आयुम तदाले, आले रोज दिन आपे लःअय बिनती एकायाले, आले परमेसर तरअः नोःआँ अरजी याले ची हुनी आपे के आतमा तरअः भरपुर लूर एमापे आउर समझ एमापे, जेकर रे आपे हुनी आला इकछा के पुरा समझाव दाड़ीपे। 10नोःआँ लकान आपे परभु जुकूर जिनगी बितायपे, जामा बात रे हुनी के खुस चिपे, आउर जमा बरन रअः बेस काम कामी एकायपे, आउर परमेसर आला गेयान रे बढ़ाव सेनपे। 11आपे परमेसर आला महिमा रअः सकती मोताबिक जामा बरन रअः सवांग नाम केते, मजगुत सेनपे। जेकर से खुसी ते जामे बरन तरअः धीरज आउर सहनसीलता के देखाव दाड़ीपे। 12आउर बाबा परमेसर के धन्यवाद एमा एकाई पे, जे आपे के नोःआँ लकान बनाव लेपेआय, ची आपे मरसल राईज रे ताहिन कु पबितर होड़कु लोः भागी बनाव तदाय। 13परमेसर आबु के अंधार रअः हक तरअः छोड़ाव केते, अपन दुलार होपोन आला राईज रे आगु लिबुआय। 14#इफि 1:7हुनी होपोन रअः चलते आबु आला उधार हुयाआ, माने कि आबु के पाप रअः छमा भेटाआ।

ख्रीस्त आला दिसतारोः रे, परमेसर आला दिसतारोः

15ख्रीस्त का नेलोअः परमेसर रअः मुठान तेकर पुरा सृस्टि रिनी पाहलौठा हेके। 16एता लःअय ची जामा हिनी आला हक तरअः सिरजाव ताना। जे कुछ सिरमा रे एदनाआ आउर ओत रे एदनाआ, चाहे नेलोः ताना चाहे का नेलोः ताना, चाहे राईज गदी, चाहे परभुता, चाहे जाहें सासक आउर चाहे अधिकारी, जामा जिनीस हिनी दोवारा बनाव लअः एदनाआ आउर हिनी लःअय गी बनाव लअः हेके। 17हिनी जामा तरअः पहिल ताहिनाय, हिनी आला सवांग तरअः जामा जिनीस बनाल ताहिनोआँ। 18#इफि 1:22,23निआँ होड़ो, माने कि कलीसिया रअः बोहोअ हिनी हेके। हिनी अखरी हेके आउर गोएःग उनकु रे जिवीःड बिरिडोः वाला कु रे पहिला हिनी हेके जेकर से जामा रे परधान ठहराए। 19एता लःअय ची परमेसर चहाव नेनाय ची हुनी रे अपन जामा भरल-पुराल बसाव ताहिनोः। 20#इफि 2:16ख्रीस्त कुरूस रे जे मयोम तु लःअय, होना रअः चलते परमेसर सानती एम लःअय, नोकान केते परमेसर हिना चलते जामा जिनीस रअः, चाहे होना ओत रे होः चाहे सिरमा रेनअः, आनेःग लोः मेल लःअय।

बिसवास रे मजगुत बनाव ताहिन पे

21मि बेरा तहिना जब आपे अपन सोंच आउर गादुस कामी रअः चलते परमेसर तरअः लंका ताहिनापे आउर हुनी आली बैरी ताहिनापे। 22बकिर नहाअः ख्रीस्त आला होड़ो गोजोअः रअः चलते परमेसर आपे के खुद अपन रे मेल लःअय, जेकर से ची आपे के अपन दुबाःड़े पबितर आउर बेकासुर बनाव केते, आगु दाड़ीपे। 23जदि आपे बिसवास रे केटेःग बनाल ताहिनोआपे आउर होना बेस खभाईर रअः आसरा के जेके आपे आयुम तदापे होना के आलपे बाई के, जेकर परचार सिरमा रअः लतार रेनअः जामा सिरजाव लआ के सुनाव लआकु, आउर जेकर धाँगड़ ईङ पौलुस बनाव नेनिङ।

कलीसिया लःअय पौलुस आला कामी

24निमिन बेरा ईङ आपे लःअय ईङ जे दुख उठायीङ, होना रअः चलते खुस इदानिङा। ख्रीस्त अपन होड़ो चाहे कलीसिया लःअय जे दुख उठाव तदाय, होना रे जे घटी-बिसी हुयाव ताना, ईङ होना के अपन होड़ो रे पुरायीङ। 25परमेसर आपे आला फयदा लःअय ईङ के जे हुकूम एम तदाय, हिना जोजना मोताबिक ईङ हुनी आली मियांड धाँगड़ बनाव तानिङ। जेकर से ईङ परमेसर आला खभाईर के पुरा प्रचारेईङ। 26माने कि होना भेद सुनाव ऊपेईंग, जे जुग चाहे जुग-जुग जगुत उकू ताहिना आउर नहाअः हुंकू पबितर होड़कु लःअय दिसतार लआ एदनाआ। 27परमेसर हुंकू के दे-देखाव चहाव नेनाय ची एटाअः जाईतकु रे नोःआँ भेद रअः इकिन महिमा रअः किमाईत एतान हेके, होना भेद नोःआँ हेके ची ख्रीस्त आपे रअः ताला रे इदानियाँ आउर होना रे आपे आला महिमा रअः परचार रअः आसरा एदनाआ। 28ईङ हिनी ख्रीस्त आला परचारे ईङ, जामा होड़ के उपदेस एमा कुईङ आउर जामा होड़ के पूरा गेयान रअः सिकछा एमा कुईङ, जेकर से ची ईङ जामा होड़कु के ख्रीस्त रे सिध बनाअः जगुत सोदोर दाड़ी कुईङ। 29होना उद्देस्य के पु-पुरती लःअय ईङ हुंकू आला सवांग तरअः, जे ईङ के सवांग एमेआय, कठिन कामी यआते जुरुजुट लगाव ताहीनोईङ।

Currently Selected:

कोलोसी 1: ASR

Highlight

Copy

Compare