Matiu 24

Jisas e hua poro te Hare tapu raa ka heua

(Mak 13.1,2; Luk 21.5,6)

1Tevaa Jisas ni tiake te Hare tapu ka hano, naa disaipol aana ni hakanau ake i naa tiputipu naa hare i kinaa. 2Jisas hua ake ki laatou, “Koutou e kkite i naa mee katoo nei? Anau e hua atu i te hamaauri, tee hai hatu i kinei raa ka tiake ki taakoto i aruna telaa hatu, katoo raa ka riakina ki laro.”

Koutou raa ka rrono i naa naehe naa haeo

(Mak 13.3-13; Luk 21.7-19)

3Tevaa Jisas ni noho i aruna te Mouna Oliv, naa disaipol ni ooatu ki te ia hoko laatou no hiri ake teemuu i te ia, “Hua mai kaa i maatou, naa mee nei raa ka hhae i tevaa pehee? Maatou raa ka illoa pehee poro akoe ku taapiri ki au muri ma anei ko te hakaoti naa mee katoo?”

4Ku hua ake roo Jisas, “Mmata hakaraaoi, raa ka au he tama no kailehi ina koutou. 5Purima tama raa ka ooatu no hua kairrehi poroo, ‘Anau ko te Mesaea!’ ka kailehi ina purima naa tama. 6Koutou raa ka rrono i naa naehe naa haeo, koia koutou teeai ki mattaku. Naa mee peenei raa ka hhae, koia te hakaoti naa mee katoo koi taakoto ki au. 7Naa henua raa ka huhu ma naraa henua, naa mataapaa raa ka pakihi ka huhu ma naraa mataapaa. Raa kaa mee te hikkai ma te mahuke i naa kuana katoo. 8Naa mee katoo nei e mee pai ko te isu mua te tinae i tevaa te tamarikiriki hoou kuu mee ki heke.

9 # Mat 10.22. “I te vaa naa laatou raa ka tauhia koutou ka kavatu te taenaha ma te isu ki koutou, ku taaia roo koutou ka mmate. Naa tama naa henua katoo raa ka haekotia koutou e mee i koutou e tautari i te nau. 10Purima tama raa ka tiake te lootu no mee hakarria ka haekotia naraa tama. 11Anaa purima naa profet kairrehi raa ka hhae no kairehi ina purima naa tama. 12Naa tiputipu hakarria raa ka hamataku no haia roo te manava laoi naa tama laa ki teeai. 13#Mat 10.22.Koia koai i laatou e tauhi te lootu no tae ki te hakaoti raa ka hhao. 14Anaa te Rono Taurekareka te Mataapaa te Tama Hamataku raa ka huatia ki naa kuana katoo i te kerekere nei ki rrono naa tama katoo, ki oti naa te hakaoti naa mee katoo raa ka au.

Te mee hakariaria hamataku

(Mak 13.14-23; Luk 21.20-24)

15“Koutou raa ka kkite ʻte mee hakariaria hamatakuʼ e tuu i te kuana e tapu, ni hua ai profet Daniel.” (Te tama e varo naa hua nei ki maanatu hakaraaoi ki illoa ia heaa naa hua nei e hua ai.) 16“Naa tama koai e nnoho i Judia ki heheau ki naa mouna. 17#Luk 17.31.Te tama e noho i te tuaa hare tana hare ki teeai ki hepu ki laro no too he mee i loto tana hare. 18Te tama e hekau i tana uaka ki teeai ki hano muri ki tana hare no toomai tana kahukahu. 19Hakaaroha pehee i naa haahine tinnae ma naa haahine e mee naa tamarriki koi uu! 20Hakaruma ki te Tama Hamataku ki tee nani koutou te heheau hakataha i tevaa e haumakariri ma i te Sapat. 21#Rev 7.14.E mee i naa haeo i te vaa naa raa ka hamataku roo i aruna i naa haeo nii mee i te raa raa, kaamata mai tevaa te kerekere ni pena ina au loo nani i te laa nei. Mee raa ka tee hai haeo peenaa hoki i muri laa. 22Kime laa, te Tama Hamataku ni teeai ki hapotopoto naa laa naa, tee hai tama ni hhao ka ora, koia te Tama Hamataku kunaa hapotopoto naa laa naa e mee i te ia e maanatu i naa tama aana ni hakailona.

23“I te vaa naa kime he tama e hua atu i koutou poroo, ‘Mmata, ko ia te Mesaea!’ ma ki hua atu, ‘Koia i kinaa!’ koutou teeai ki hakarono ai. 24E mee naa Mesaea kairrehi ma naa profet kairrehi raa ka hhae atu no mee naa mirakol ki kailehi ina ai naa tama, naa tama hoki koai te Tama Hamataku ni hakailona, kime laatou e nani. 25Hakarono! Anau e hua atu mua naa hua nei i tevaa naa mee nei hikiai ai ki hhae mai.

26 # Luk 17.23,24. “Kime he tama e hua atu ki koutou poroo, ‘Mmata, aia i te kuana tino kerekere,’ koutou teeai ki oo; ma kime laatou e hua atu poroo, ‘Mmata, aia e hakammuni i kinei,’ koutou teeai ki hakarono i naa hua naa. 27E mee i te Tama te Tama raa ka au pai te uila e tara te ura i te kaniva, kaamata i te anake loo nani i te laki. 28#Luk 17.37.Te kuana hea te huaitino mate e taakoto ai, naa manu e kaitama raa ka kkutu ai.

29 # Rev 6.12; Rev 6.13. “I muri koi naa haeo i naa laa naa,

te laa raa ka hano no pouri,

te marama raa ka teeai muri ki ura,

naa hetuu raa ka rruku iho i te vaelani,

anaa naa haiao i te vaelani raa ka nauetia.

30 # Rev 1.7. “I te vaa naa, naa hakailona te Tama te Tama raa ka hhae i te kaniva i aruna; anaa naa tama katoo i te kerekere nei raa ka ttani i tevaa laatou e kkite ai i te Tama te Tama e hano iho i aruna naa kaniva i te vaelani ma te haiao ma te huai te maahina. 31Ku hakauna roo aia naa ensol aana ka iriiri naa puu ka ttani hamattaku, ku oo roo laatou ki naa taha e haa te kerekere no hanaopo mai naa tama te Tama Hamataku ni hakailona i te taha hokotahi loo nani i telaa taha.

32“Mmata kaa i te laakau fik: I te vaa naa mataaraa aana ku kaamata kii mee naa tilotilo, koutou ku illoa poro tevaa te ua ku taapiri. 33Mee raa ka taakoto peenaa hoki. I te vaa koutou e kkite ai i naa mee nei e hhae, koutou ku illoa poro te Tama te Tama ku taapiri ki au. 34Anau e hua atu i te hamaauri, naa tama katoo e nnoho ora anei raa ka tee nani te mmate ki nani roo naa mee katoo nei e hhae. 35Te vaelani ma te kerekere raa ka oti, koia naa hua aaku e tee nani te oti.

Tee hai tama e iloa tevaa te Tama te Tama raa ka au ai

(Mak 13.32-37; Luk 17.26-30,34-36)

36“Tee hai tama e iloa i te laa ma te vaa te Tama te Tama raa ka au, naa ensol hoki i te vaelani e tee illoa, te Tama te Tama Hamataku e tee iloa, koia tino Tamana hokoia e iloa. 37Te au o te Tama te Tama raa ka taakoto pai heaa nii mee i tevaa Noah. 38I loto naa laa naa i tevaa te tai hikiai ai ki rohia naa henua, naa tama ni hekau ka kkai ka inu, naa taanata ma naa haahine ku avvana loo nani roo ki te vaa Noah ku hano no uru ki loto te vaka hamataku; 39koia laatou hikiai ki illoa heaa raa kaa mee i laatou loo nani roo ki te vaa te tai ni rrohi ka au no taahia laatou. Mee raa ka taakoto peenaa i tevaa te Tama te Tama e au ai. 40Toka rua taanata raa ka hekau i te uaka; te tama hokotahi raa ka tooa ma telaa tama ku tiake. 41Toka rua haahine raa ka ppena naa haraoa; te tama hokotahi raa ka tooa ma telaa tama raa ka tiake.

42“Mmata hakaraaoi koutou, koutou e teeai ki illoa i te laa te Ariki Hamataku autou raa ka au ai. 43#Luk 12.39,40.Kime te tama e mee tana hare e iloa i tevaa te tama kairaurau raa ka au ai, aia raa ka iloa ku noho ara roo ki tee nani ai te tama kairaurau te hhaa ka uru i tana hare. 44Koutou hoki ki aarere, i te Tama te Tama raa ka au i tevaa koutou e tee illoa ai.

Koai te tama e hekau hakaraaoi

(Luk 12.41-48)

45“Koai te tama e mee te maanatu taurekareka kaa mee hakaraaoi naa hekau? Aia ko te tama tana hamaatua e tukua ki urukau i ana tama e hekau, ku kavake roo naa kai laatou tonu i tevaa laatou ki too naa kai. 46Te tama hekau raa ka hiahia kime te hamaatua aana raa ka ahe ake loo kite i te ia e mee naa hekau naa. 47Anau e hua atu i te hamaauri, te hamaatua raa ka tukua aia ki urukau i naa mee katoo aana. 48Koia kime te tama hekau ku maanatu ka hua poroo, ‘Te hamaatua aaku e tee nani te au hakavave,’ 49ku kaamata roo ka tinai naa taanata ma naa haahine hekau, ku noho roo ka kai ka inu ma naa tama vvare, 50te hamaatua raa ka au muri i te laa hokotahi te tama hekau e tee aarere ai, ma tevaa aia e tee iloa ai. 51Aia raa ka tutuu tia ia pitopito ka tukua aia natahi ma naa tama hua kairrehi. I kinaa laatou raa ka ttani ma ka kkii laatou niho.

Currently Selected:

Matiu 24: NUR

Highlight

Compare

Copy