Matiu 25
25
Te parapol i te hanahuru haahine
1 #
Luk 12.35. “I te vaa naa te Mataapaa te Vaelani raa ka taakoto pai ko te hanahuru haahine koai ni too naa ramu roro laatou ku ooatu roo ki loo ttiri ma te tanata kuu mee ki aavana. 2Toka rima i laatou e vvare ma telaa toka rima i laatou e illoa. 3Toka rima haahine vvare naa ni too naa ramu laatou koia laatou ni teeai ki too ni roro ma laatou. 4Toka rima haahine e illoa naa ni too naa roka roro ma naa ramu ka oo ma laatou. 5Te tanata e aavana naa e hainattaa te au, naa kanomata naa haahine ku taenaha i te hiimoe ku takkoto roo ka mmoe.
6“I te tuaapoo te tama ku varo ka hua poroo, ‘Koia, te tanata ki aavana! Oomai no ttiri ma ia!’ 7Ku mahhike roo naa haahine katoo no atiati laatou ramu. 8Naa hahine vvare naa ku hua ake ki naa haahine illoa, ‘Kamai ni roro ma maatou i naa roro autou, naa ramu maatou kuu mee ki mmate.’
9“Naa hahine e illoa naa hua ake, ‘Teeai, naa roro nei e tee nani i maatou ma koutou hoki. Hhuro no tavi ni roro ma koutou.’
10“Koia i tevaa laatou ni oo ki tavi naa roro laatou, te tanata ki aavana ku hanake. Naa hahine koai ni aarere naa ni oo ki loto ma ia ki te hainaakai ana te aavana. Ku ppui roo te totoka.
11 #
Luk 13.25. “Ki oti naa haahine ku oo ake no varovaro, ‘Te Ariki! Te Ariki! Taraki te totoka i maatou!’
12“Koia aia ku hua ake, ‘Anau e hua atu i te hamaauri, anau e tee iloa i koutou.’ ”
13Ku hakaoti roo Jisas naa hua aana ka hua ake, “Mmata hakaraaoi koutou, e mee i koutou e tee illoa i te laa ma te vaa.
Te parapol i te toka toru poe
(Luk 19.11-27)
14 #
Luk 19.11-27. “I te vaa naa te Mataapaa te Vaelani raa ka taakoto peenei: E mee te tama nii mee ki tiake tana kuana ka hano roo haare i naraa henua mmao; ku varoina roo naa poe aana no tukua roo laatou ki mmata ake i naa mee aana. 15Ku kavake roo ki laatou naa mani kol tautari i naa haiao ma naa iloa laatou taki tahi ki hekau ai: Te tama hokotahi aia kavake naa himata e rima naa mani kol, ki telaa tama aia kavake naa himata e lua naa mani kol, anaa ki telaa tama te himata hokotahi naa mani kol. Ku hano roo aia no haare. 16Te tama koai ni too naa himata e rima naa ni too ana mani no hekau ina roo no too naraa himata e rima naa mani kol. 17Peenaa hoki, te tama koai ni too naa himata e rua naa ni hekau ina ana mani naa no too roo naraa himata. 18Koia te tama koai ni too te himata hokotahi naa ni hano no keri roo te rua i te kerekere ku huu roo naa mani tana hamaatua.
19“Tevaa ku roroa ki oti naa, te hamaatua naa poe naa ku ahe ake muri loo noho roo ki mmata ka hakatonu naa mani aana ni kavake i laatou. 20Te poe koai ni too naa himata e rima naa ni too ake naraa himata e rima mani kol no hua ake, ‘Koe ni kamai naa himata e rima. Mmata kaa, anau ni hekau ina naa mani naa no nani naraa himata e rima.’
21“Te hamaatua aana hua ake, ‘Taurekareka roo, akoe he tama e hehekau hakaraaoi. Akoe ni mmata iho i naa momo mee, anei anau raa ka tukua koe ki mmata iho i purima naa mee. Au roo noho ka hiahia ma anau!’
22“Te tama ma naa himata e rua ku hanake no hua ake, ‘Koe ni kamai naa himata e rua. Mmata kaa, anau ni hekau ina naa mani naa no nani naraa himata e rua.’
23“Hua ake roo te hamaatua aana, ‘Taurekareka roo, akoe he tama e hehekau hakaraaoi. Akoe ni mmata iho i naa momo mee, anei anau raa ka tukua koe ki mmata iho i purima naa mee. Au roo noho ka hiahia ma anau!’
24“Ku hanake roo te tama ni too te himata hokotahi no hua ake, ‘Te hamaatua, anau e iloa i te koe he tama haeko, akoe e nani te too naa kai akoe ni teeai ki toki ma e nani te hanaopo naa hua laakau akoe ni teeai ki riaki naa hatu laakau. 25Ku mataku roo anau ka hano roo huu naa mani aau i loto te kerekere. Mmata, anei ko naa mani aau.’
26“Hua ake roo te hamaatua aana, ‘Akoe he poe hakariaria ka kaunataa! Akoe ni iloa poro anau e nani te too naa kai anau ni teeai ki toki ma e nani te hanaopo naa hua anau ni teeai ki riaki naa hatu. 27Ai kuaa koe ku tee ppono naa mani aaku ki taakoto ka hekau ake i loto te benk, ki ahe mai nau roo hhana taku mani ma telaa mani i aruna?!’
28“Ku hua ake roo te hamaatua ki naa tama i kinaa, ‘Too te himata mani kol i te ia no kavake ki te tama e mee te hanahuru himata mani kol. 29#Mat 13.12; Mak 4.25; Luk 8.18.Naa tama katoo koai e hai mee, anau raa ka kavake naraa mee hoki i aruna ki tamaki katoo roo naa mee laatou; koia koai naa tama e tee hai mee, ai kiaa ni tama mee pehee e nnoho ma laatou, raa ka tooa hakataha i laatou. 30#Mat 8.12; 22.13; Luk 13.28.Tiria te poe hakariaria nei ki haho i te pouri, te kuana aia raa ka tani ka kkii ana niho.’
Naa tama e ttonu ku vaaea i naa tama takahara
31 #
Mat 16.27;
Mat 19.28. “Tevaa te Tama te Tama e au pai he Kini ma naa ensol katoo aana, aia raa ka noho i aruna tana parepare i loto te maahina te vaelani. 32Naa tama i naa henua katoo raa ka hakkutu ria i mua aana. Ku vaea roo laatou i te hiaoa raena, pai ko naa tama e anaana naa sipsip e vvae naa sipsip i naa meme. 33Aia raa ka tuku naa tama e ttonu i tana rima maua anaa naraa tama i tana rima maui.
34“Te Kini raa ka hua ake ki naa tama i tana rima maua poroo, ‘Oomai, koutou koai e haia hakaraaoi ina taku Tamana; oomai no nnoho i te Mataapaa te Tama Hamataku ni aarere ma autou i te kaamata roo te kerekere nei. 35Anau ni hii kai, anaa koutou ni kamai naa kai aaku ka kai, anau ni hii inu, anaa koutou ni kamai naa vai ka inu anau, anau ni haare pai he horau, anaa koutou ni too anau ki naa hare autou. 36Anau ni tee hai hiapo ki tara, anaa koutou ni kamai taku hiapo ka tara; anau ni maki, anaa koutou ni anaana ina anau; anau ni karapuhi, anaa koutou ni oomai no mmata i te nau.’
37“Naa tama e ttonu raa ka hhiri ake ki te ia, ‘Te Ariki, he vaa pehee maatou ni kkite i te koe e hii kai ku haanai roo maatou akoe, ma akoe ni hii inu ku haa inu roo maatou akoe? 38He vaa pehee maatou ni kkite i te koe he horau ku varoina roo koe ki loto naa hare maatou, ma akoe ni tee hai hiapo ku hakatara ina roo akoe? 39He vaa pehee maatou ni kkite i te koe e maki ma ni karapuhi ku ooatu roo maatou no mmata i te koe?’
40“Te Kini raa ka hua ake, ‘Anau e hua atu i te hamaauri, ni taurreka pehee koutou nii mee i ni tama punarikiriki i naa kave aaku nei, koutou nii mee i te nau.’
41“Ku hua ake roo aia ki naa tama i tana rima tee iloa, ‘Hakattaha i te nau, koutou koai ku nnoho i te hat'roto te Tama Hamataku! Herruhi ki loto te ahi e ura i naa vaa katoo, ni aarere mo te anana hakariaria ma naa ensol aana. 42Anau ni hii kai, koia koutou ni tee haanai anau, anau ni hii inu koia koutou ni tee haa inu anau, 43anau ni noho pai he horau, koia koutou ni tee varoina anau ki naa hare autou, anau ni tee hai hiapo, koia koutou ni tee hakatara anau, anau ni maki ka karapuhi, koia koutou ni tee mmata mai i te nau.’
44“Laatou raa ka hhiri ake hoki poroo, ‘Te Ariki, he vaa pehee maatou ni kkite i te koe e hii kai ka hii inu, ma he horau, ma e tee hai hiapo, ma e maki, ma e karapuhi, ku teeai roo maatou ki huia koe?’
45“Te Kini raa ka hua ake, ‘Anau e hua atu ki koutou i te hamaauri, ni mee pehee koutou ni ten'taa te mee i he tama punarikiriki i naa tama nei, koutou ni ten'taa te mee i te nau hoki.’ 46Anaa laatou raa ka hakauna ki oo no hhau te isu hamataku e taakoto i naa vaa katoo, koia naa tama e ttonu raa ka too te ora e taakoto i naa vaa katoo tee nani te oti.”
Currently Selected:
Matiu 25: NUR
Highlight
Share
Compare
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.
