Matiu 23

Hakaaroha i koutou naa tisa naa loo ma naa Faarisi

(Mak 12.38,39; Luk 11.43,46; 20.45,46)

1Ku hua ake roo Jisas ki te apiana naa tama ma naa disaipol aana: 2“Naa tisa naa Loo ma naa Faarisi, anaa ko naa tama e tukua ki hikuru atu naa Loo Moses. 3Koutou ki hakarono hua i laatou kaa mee heaa laatou e hua atu ki koutou kii mee. Koia teeai ki tautari i naa tiputipu laatou. Laatou teeai ki tautari heaa laatou e hikuru ai. 4Laatou e mee pai ni tama e haihai naa hekau taenaha ka uta i aruna naa ruamona naraa tama ki hhau, koia laatou roo e tee nani te huia naa tama naa.

5 # Mat 6.1. “Naa mee katoo laatou e mee, laatou e mee mo naa tama ki kkite: Laatou e mee naa huai peepaa ka taataa ai naa hua e ttapu ka haihai i naa pokouru ma naa kapakau laatou; laatou e hakatautau roo naa uka e rroa i naa taha naa kahukahu rroa laatou. 6Laatou e rruu ki nnoho i naa parepare taurreka i naa pati ma i naa parepare hamaatua i loto naa hare lootu. 7Laatou e rruu hoki i naa tama ki mmata ake i laatou pai ni hamaatua ka varo i laatou poro ni Rabai. 8Koutou hoki teeai ki mee ki varoina koutou poro ni Rabai; e mee i koutou e hanatahi ma koutou e mee te tino Tisa hokotahi. 9Anaa koutou teeai ki varoina he tama i te kerekere nei ‘Tamana,’ e mee i koutou e mee te tino Tamana hokotahi i te vaelani. 10Koutou hoki teeai ki varoina naa tama poro ni ʻHamaatuaʼ, e mee te tino hamaatua autou ko te Mesaea. 11#Mat 20.26,27; Mak 9.35; 10.43,44; Luk 22.26.Te tama hamaatua i koutou raa kaa mee mo tama hatapatapa i koutou. 12#Luk 14.11; 18.14.Koai i koutou e tuku aia ki aruna raa ka tukua ki laro, anaa koai i koutou e tuku aia ki laro raa ka tukua ki aruna.”

13Jisas hua ake hoki ki laatou, “Hakaaroha i koutou naa tisa naa Loo ma naa Faarisi, koutou ni tama hua kairrehi! Koutou e hakkapi te totoka te Mataapaa te Vaelani i naa kanomata naraa tama, koia koutou raa tee nani te herruhi ki loto, ma ki hattana laatou koai e hakaari ki herruhi.

14“[Hakaaroha i koutou naa tisa naa Loo ma naa Faarisi, koutou ni tama hua kairrehi! Koutou e illoa te kailehi ina naa rokoniu ka huina laatou hekau i naa hare laatou. Ka oti koutou e rruu ki too hakarroa naa hakaruma autou ki kkite te henua! E mee i koutou e mee peenaa, koutou raa ka mee ina hakarria hamataku.]

15“Hakaaroha i koutou naa tisa naa Loo ma naa Faarisi! Koutou ni tama hua kairrehi! Koutou e haare ki naa henua katoo ka tere te moana hamataku ki huria koi te manava te tama hokotahi ki lootu ia pai ko koutou, anaa i tevaa koutou ku nani ai te huria te tama naa ki tautari i koutou, naa tiputipu hakariaria te tama naa raa ka hakarria i aruna naa tiputipu koutou!

16“Hakaaroha i koutou, naa tama kanomata ppuni e hattaki naraa tama! Koutou e hikuru naa tama poroo, ‘Kime he tama e ttiri aana hua ka hua poro anaa ni hua hamaauri i loto te inoa te Hare tapu te Tama Hamataku, anaa teeai ni hua maauri; koia kime aia e ttiri ana hua haka haiao ka hua poro anaa ni hua hamaauri i loto te inoa naa kol i loto te Hare tapu te Tama Hamataku, anaa ni hua maauri.’ 17Koutou ni tama e vvare ma e kanomata ppuni! Heaa e hamataku, naa kol ma ko te Hare tapu te Tama Hamataku koai e mee ina naa kol ki ttapu?! 18Koutou e hua hoki poroo, ‘Kime he tama e ttiri ana hua ka hua poro anaa ni hua hamaauri i loto te inoa te olta, anaa teeai ni hua maauri; koia kime aia e ttiri ana hua haka haiao ka hua poro anaa ni hua hamaauri i loto te inoa naa ofa i aruna te olta, anaa ni hua maauri.’ 19Koutou naa tama kanomata ppuni! Heaa e hamataku, naa ofa, ma ko te olta koai e mee ina naa ofa ki ttapu?! 20Te tama e ttiri ana hua haka haiao i loto te inoa te olta, e ttiri i loto te inoa te olta hanatahi ma naa ofa koai e takkoto i aruna. 21Anaa koai e ttiri ana hua hamaauri i loto te inoa te Hare tapu, aia e ttiri i loto te inoa te Hare tapu hanatahi ma te Tama Hamataku koai e noho i kinaa. 22#Mat 5.34.Anaa koai e ttiri ana hua hamaauri i loto te inoa te vaelani, aia e ttiri ana hua i loto te inoa te parepare te Tama Hamataku ma te tama koai e noho ai.

23“Hakaaroha i koutou naa tisa naa Loo ma naa Faarisi! Koutou ni tama e hua kairrehi! Koutou e kavake ki te Tama Hamataku te haahi taki hanahuru i naa mee autou e mee ai naa kai autou ka hauna laaoi, pai ko naa ʻminʼ, naa ʻdilʼ ma naa ʻkuminʼ, koia koutou e rano teroto ki tautari i naa hua hamaatua te loo pai ko te tiputipu e tonu, te manava aroha, ma te tiputipu ki lootu maauri. Naa tiputipu nei koutou ki tautari ka teeai ki rano teroto i naraa loo. 24Koutou naa tama kanomata ppuni e hattaki naraa tama, koutou e kapea naa rano i naa kapu vai autou, koia e horo te kemol.

25“Hakaaroha i koutou naa tisa naa Loo ma naa Faarisi, koutou ni tama e hua kairrehi. Koutou e veku i haho naa kapu ma naa tihi autou, koia i loto e pii te haeo ma te tiputipu kairaurau. 26Naa Faarisi kanomata ppuni! Veku mua i loto naa kapu ma naa tihi, anaa i haho raa ka maatea hoki!

27 # Hekau 23.3. “Hakaaroha i koutou naa tisa naa Loo ma naa Faarisi, koutou ni tama hua kairrehi! Koutou e mee pai ni taaruma e maatea hua ka mmata taurekareka i haho, koia i loto e pii te ivi naa tama mmate ma naa mee katoo e kkere. 28Koutou e peenaa hoki, i haho koutou e hakkite poro koutou ni tama taurreka koia i loto koutou e pii i te hua kairrehi ma te tiputipu takahara.

29“Hakaaroha i koutou naa tisa naa Loo ma naa Faarisi, koutou ni tama hua kairrehi! Koutou e penapena naa taaruma taurreka mo naa profet ka pirahi naa taaruma naa tama e ttonu. 30Ku hua roo koutou poroo, ‘Kime maatou ni nnoho i tevaa naa tippuna maatou, maatou raa ka tee nani te mee pai ko laatou ni titinai naa profet i mua.’ 31E mmata pai koutou ku hakkite poro koutou ni mokopuna laatou koai ni titinai naa profet i mua. 32Hakavave kaa no hakaoti naa takahara naa tippuna koutou ni kaamata!

33 # Mat 3.7; 12.34; Luk 3.7. “Koutou e mee pai ni kata ma ni tama naa kata! Koutou raa ka hakahao pehee kime koutou ku riakina i loto te ahi? 34Anei anau e hua atu ki koutou poro anau raa ka hakauna atu ki koutou naa profet ma naa tama e illoa ma naa tisa; koutou raa ka titinai naraa tama ka mmate, hakatautau naraa tama, taaia naraa tama ki naa wipi, ka aruaru mia laatou i telaa taon ki telaa taon. 35Anaa koutou raa ka mee ina hakarria i te mate naa tama e ttonu i mua, kaamata i te mate Abel no hakaoti i te mate Sekaraia te tama Berekia, koai koutou ni tinai i loto ttonu te Hare tapu ma te olta. 36Anau e hua atu ki koutou i te hamaauri: Naa takahara katoo naa tama koai ni tinai naa tama nei ka mmate raa ka kavake i naa tama katoo e nnoho anei!

37“Jerusalem, Jerusalem! Koutou e titinai naa profet ka tauatia naa tama te Tama Hamataku e hakauna atu ki koutou! E purima naa vaa anau e ruu ki ppuru mai koutou ki te nau, pai he karaoa e hanaopo ana tama i laro ana kapakau, koia koutou e teeai ki rruu! 38Anaa te Hare tapu autou raa ka maheu no taakoto hua. 39Kaamata anei koutou raa ka tee nani te kkite muri i te nau ki nani roo koutou e hua poroo, ‘Te Tama Hamataku raa kaa mee hakaraaoi i te ia koai e au i te inoa te Ariki Hamaatua.’ ”

Currently Selected:

Matiu 23: NUR

Highlight

Compare

Copy