Mateus 24
24
JERUSALEM PITIŊINIWOI. KRISTUS FAUN ISOWOI, 24–25
Jesus tempel pitiŋinekoi ibol
1Jesus tempellonge tapas idug ileg inan meglaumgaz izinnen dipazge tempel inan pat zazek depeteŋani. 2Jesus ipidin, Aŋ me daŋan ailame, au? Malik ŋa aŋ ŋepaiaŋ, elak pat ta pat ta fonlak so ienoi me i so tanip iduwoi.#Luk 19:44
Wadan saen inan bagoz matu
3I Gazeŋdidlak imatalmeg inan meglaumgaz i siben mademeg izinnen diseg dibol, Paiamapa, saŋeptap abaŋ e iduwoi? Oina usonen inan bagoz, saen e inan saen wadan inan bagoz mai me dodin?#Mat 23:39 4Jesus auadin jabig ipidin, Dab nau, ta aŋ se so wiziaŋ mon. 5Kuzum i inag neaglon disop diboloi, Ŋa Kristus, meginpe i kuzum se diwizidinoi.#Joh 5:43; Apos 5:36, 37 6Juoi aloŋoi, ju azu inan biŋ mai itasawoi. Dab nau, aŋ so azut mon, abaŋ e idu mokoi. Ge me saen wadan tea.#Joh I 2:18 7Fatu ta inan daup me fatu aenta inan me daŋewoi. Kiŋdom ta me kiŋdom aenta daŋewoi. Pitol mim mai aben ibenibenlon diduwoi.#Jes 19:2; Sai II 15:6 8Ge abaŋ e daŋan alan nauknen fun mon.
Meglaumgaz diŋal duzoi
9Saen melon i aŋ noaŋpa aŋ modoaneklon adulawoi, dufunaŋpa amatoi. Inag neagoi tamolpain fatu daŋanlon dezezeŋanaŋoi. 10Meginmap kuzum Anut miz depaniwoi, aenta nug blaniblaniwoi.#Deut 13:4, 1 11Profet sekauk kuzum dimaispa tamolai kuzum se diwizidinoi.#Mat 7:15; Joh I 4:1; Tes II 2:10; Tim II 3:1–5 12Kagin salan kuzumlakoi tamolpain kuzum nadin ladinpanek biniwoi. 13Ge me i seŋanip mademap wadanlon i patun pasiwoi. 14Anut kaginoi totol gamun tamolpain daŋan pidinoi, fatufatu inan bagozoi. Meginmap saen wadan iduwoi.#Mat 28:19; 10:18
Judealon jaeŋ funek zen iduwoi
15Meginpe aŋ benenaik inan abaŋ salan, profet Daniel ibolime, aben gunlon itiuzmap anasip — me i azu me sutiime iloŋpaged — #Dan 9:27; 12:11 16Meginpe me i Judealon madoime i didlak ijauwoi. 17I me ab latnen madoime i abaŋ ablon diendime iŋaloi so idu mon.#Luk 17:31 18I me umlon madoime me inan jamel ŋalewoi so imul mon. 19Ge pain gididin me i aidaŋan, me i saen melon ai su depanidime mai. 20Agodoanipe aŋ saen jizunlon ubounallon mai bezazou so auwoi.#Apos 1:12 21Saen melon alan nauk ujan iduwoi, me saen funlonge gazo e so idulak, gazop mai so iduwoi.#Dan 12:1; Joel 2:2 22Saen me tituk so inaupe tamolai ta so tetazi ŋalepe; ge pilianekgazoi saen me tituk inauwoi. 23Mewoi ta o ipaotap, Nasi, Kristus i elak, tea, Melak, o ilolon so malik mon. 24Kristus sekauk ta profet sekauk mai dimaispa bagoz ujan maŋau mai depeteŋanawoi, dal ientap i pilianekgaz mai se diwizidinoi.#Deut 13:2–4; Tes II 2:8, 9 25Nasi, ŋa imugse ŋepaiaŋlak. 26Mewoi i aŋ depaiaŋmap, Nasi i fatu udaulon madoime, aŋ so ale mon; nasi, i seafug madoime, lamilon so malik mon. 27Lelei ad baŋenlonge itasap dadau baŋenlon sepetadeime egin, megin Tamolai isonen mai iduwoi.#Luk 17:23, 24 28Abaŋ maukmauk domten tat ienime kasfilian melak detemanidime.#Hiob 39:30; Luk 17:37; Pet II 3:10
Bagoz wadanlon Tamolai imul isonen
29Saen me inan alan nauk uzip buntaimon ad inaup mafuzoi, fulei mai so lelamanoi, patui mai didlonpa dibal diduwoi, didnen tiwon mai niniwoi. 30Saen melon Tamolai inan bagoz didlon itasawoi. Meginpe tan inan tamolpain bagenbagen digos ditamap i Tamolai did inan timtaenlak tiwondaŋan kubelkubel zendaŋan mai isop denasiwoi.#Bo 1:7; Mat 26:64; Dan 7:13, 14; Sak 12:10 31I inan eŋel dum inan iwek ujanlon inaupa dilap i inan pilianekgaz tim baŋen pallonge did wadan aenaenlon diŋalp detemanawoi.#Kor I 15:52; Tes I 4:16; Bo 8:1–2; Jes 27:13; Deut 30:4
32Sisiziglon azu faŋan aloŋ. Inan zaen damon itubpa zaun mai ilubmap aŋ aloŋ, inan zaun saen siziz. 33Megin mon aŋ abaŋ e daŋan ailmap aŋ aloŋ i mug panu az dalauan izinnen iseg madoime. 34Malik ŋa aŋ ŋepaiaŋ, daz wozou e tan elon so meladin teaboi, abaŋ e daŋan get diduwoi eginmap. 35Did mai tan mai dibinip dilawoi, ge ŋainag azu so biniwoi.#Mat 5:18
36Ta i nal aur me mai so iloŋime, didnen eŋel mai tea, Mam i mon.#Tes I 5:1, 2 37Tamolai inan imul isonen me Noa inan nal egin.#Gen 6:11–13 38I saen me siz naonnen demadelak i diani dimili mai, pain deŋale pain depani mai, nal Noa waglon iduseg eginmeg.#Pet II 3:5, 6; Gen 7:7; Jes 54:9 39I siz iseg daŋan iŋalmeg mon diloŋlak egin, megin Tamolai inan isonen mai iduwoi. 40Saen melon ai azugen umlon demadowoi, ta me iŋalewoi, ge ta ibiniwoi.#Luk 17:35, 36 41Pain azugen fefazeknen dazuklon kau defefaziwoi, taimon iŋalewoi, ta ibiniwoi. 42Mewoi amazazpa amado, nami Ujanzen isoime nal me so aloŋamelakoi,#Mat 25:13 43ge me aloŋ, abfun iloŋpeges admetelaen pitelon ponaubibian isowoi, i mazazpe, dal falep inan ab beleaewoi so pitiŋinipe.#Luk 12:39–40 44Mewoi aŋ mai amazazpa amado, Tamolai admetelaen aŋ lami so ibolime melon isowoilakoi.#Bo 16:15
Begabeg gauai salanoi mai faŋan ibol
45It tat begabeg buben malik kagindaŋan mai, me inan Ujanzen abgaz saen idusaplon nadin anaŋ pinidinoi getadin inaulak? 46Begabeg me patun isap mado me Jesus isemap inan uzat megin kabe inauime. 47Malik ŋa aŋ ŋepaiaŋ, i inan abaŋ daŋan gaten inaup madowoi.#Mat 25:21, 23 48Ge begabeg i salan bubenlon iboltap, Ujanzen muzuange madoime, 49imaispa inan begabegbi gusulamap, aiubibiangaz maip diani dimolmap, 50begabeg me inan ujanzen nal i malan so inaulak, aur i so iloŋlak melon isowoi. 51I malabiabgaz mai temanap naon ipaniwoi, melak sagainen liwon grigra ibolnen mai ienoi.#Mat 8:12
Currently Selected:
Mateus 24: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
