Mateus 23
23
Gazekmaŋau nadin kaginoi kukuaioi
1Saen melon Jesus tamolpain malanzen meglaumgaz mai pidinge ibol, 2Gazekmaŋau farisea mai Moses pezatiulak demataldime.#Maleak 2:7, 8 3Mewoi abaŋ daŋan anauwoi depaiaŋdime me anau, ge nadin nauknauk me so uziwoi, i diboldime ge so denaudimelakoi. 4I biauŋ muzuan joazenen tea detebazeg tamolpain jozodinlak denaudime, ge nimadin tikunlon bisanen dimoidime.#Mat 11:28, 30; Apos 15:10, 28 5Inadin nauknauk daŋan me tamolpain meladinoi mon denaudime. Nadin filakteria bebaŋan denau, nadin jamel didin bubuzen melaen desemazidime. 6Janek saenlon ubouablon mai i malanmalan demataloi dimatdime.#Mat 6:1; Ekso 13:9; Num 15:38, 39; Luk 14:7 7Dadeŋ abenlon pez paneknenoi mai tamolpain Rabi dipidinnen mewoi mai dimat. 8Ge tata aŋ Rabi so depaiaŋoi. Taimon i nami peteŋaneklakoi, ge aŋ daŋan nug tain. 9Tanlak aŋ ta biŋanoi Mam e so apai mon, nami Temami taimonlaklakoi, i me didlon madoime. 10Duzek e so depaiaŋoi, taimon i nami Duzek me Kristus. 11I me leŋamilon isou itaseg madoime i biami ipaluwoi.#Mat 20:26, 27 12Ta siben tinin ŋalep imugse itozime i jabi iduwoi. Ge ta bini idu itozime i biŋan bisawoi.#Met 29:23; Hiob 22:29; Hesek 21:31; Luk 18:14; Pet I 5:5
Malabiaboi Jesus waio ibol
13Waio, aŋ gazekmaŋau farisea mai, malabiab, didnen kagin tamolpain noadinnen ufunatiame. Aŋ sebami ilonnen so adulaame, I ilonnen didulawoi dibol me mai ipizianaame.#Mat 16:19; Luk 11:52; 13:25 14Waio, aŋ gazekmaŋau farisea mai malabiab, ay pain bob nadin boz jes maiwoi gegaun anauame, me naon aŋ godoane kmelaen anauame, mewoi aŋ meselanek gegaun aŋalewoi. 15Waio, aŋ gazekmaŋau farisea mai, malabiab, aŋ mas tan mai itilianig tamol taimon ubulisap Juda kagin iŋalewoi atozame, ge aŋ i ubulisap i aŋ nenazaŋpa Hades inan ai mok anauame.
16Waio, aŋ duzek melami itauge abolame, Ta i ubouab tininlon stemanek azu ibolime, me se, ge ubouab inan gold tininlon stemanek azu ibolime i azu inan niŋon inauwoi.#Mat 5:14 17Aŋ gedagad melami itau mai! Abaŋte ujan tat, gold tat, tea, tempel me gold gun inauime me tat? 18Ta i wiwalon stemanek azu ibolime me se, ge janauk abaŋ wiwalak ienime melon stemanek azu iboltap i azu me inan niŋon inauwoi. 19Aŋ melami itau, abaŋte ujan tat, janauk tat, tea, wiwa me janauk gun inauime me tat?#Ekso 29:37 20Mewoi wiwalon stemanek azu ibolime i abaŋ daŋan fonlak ienime melon mai stemanek azu ibolime. 21Me i tempel tininlon stemanek azu ibolime, i melon madoime, i‐lon mai stemanek azu ibolime. 22Me i did neanlon stemanek azu ibolime i Anut inan pezatiulon, i me fonlak matalime i‐lon mai stemanek azu ibolime.
23Waio, gazekmaŋau farisea mai malabiab! Aŋ wos, ŋisiŋes, kupez mai tezepalek tenoi kibiaiŋ anauame, ge kibiaiŋ inan niŋon, taoz, lamipanek, lamilon maliknen me apaslak. Me bo anauwoi, ge e mai so apasoi.#Mat 5:34 24Duzek melami itau, aŋ lelaten tuzlon itiniame, ge kamel otoŋolame!#Lew 27:30; Mika 6:8
25Waio, aŋ gazekmaŋau farisea mai, malabiab, aŋ gab tabiz muzin ikok anaulakoi, ge ilonnen ponau naon, loaŋloaŋ naon mai fuamlak. 26Aŋ farisea melami itaulak, gab tabiz mai ilon get ikok anaup, meginpe muzin mai ikokoi.#Mar 7:4 27Waio, aŋ gazekmaŋau farisea mai, malabiab, aŋ fedafod kaulon bubunilak egin, muzinnen i gamun mok, ge ilonnen i tamolpain dimatlak nadin dog abaŋ ikok tealon mai ifuamlak.#Tit 1:15; Joh 9:40 28Megin mon aŋ mai beŋten tamolpain noadinnen ikok egin amadoame, ge bubumi malabiab bulases mai mon ifuamlak.#Apos 23:3
29Waio, aŋ gazekmaŋau farisea mai, malabiab, aŋ profet nadin fedafod ikibineime, taozgaz lami isouknen fedafod bala ipinidiname.#Luk 16:15 30Aŋ abol mai, Id tamadgaz saenlon temadopeges id i egin profet nadin daz so tufuzepe. 31Megin aŋ sebami fumi beŋten anauame, aŋ i me profetgaz difulak nadin nunudingaz. 32Aŋ ŋan nami temamigaz nadin tenaek anaup idusawoi.#Apos 7:52 33Aŋ mot, mot suzumen malandaŋan, dodin betenaek tuzugusaŋpa Hadeslon adulawoi? 34Mewoi ŋa profetgaz, tamol kagindaŋan gazekmaŋau mai ŋenaug ziminen diladime, ge aenta aŋ afup dimatoi, jakebazeklak mai azaiwoi, aenta aŋnami ubouablon gusulap aŋ panupanulon auzpa aŋal auzoi.#Mat 3:7 35Meginpe daz taoz daŋan tanlak fuzelak aŋ fomilak iduwoi. Abel taoz inan dazlonge ilap Sakarias, me Barakios inan ai inan dazlon tapas me aŋ tempel wiwa mai liluŋlon ufunig imatlak.#Mat 13:52; 10:23; Tes I 2:15 36Malik ŋa aŋ ŋepaiaŋ, Abaŋ e daŋan daz wozou gazomnen madoime fonlak iduwoi.#Gen 4:8; Sai II 24:20, 21
Jerusalem pitiŋinekoi ibol
37Jerusalem, Jerusalem, me o profetgaz ufug dimatdime, o izinen totol inaug me o patlon mai ufuume. Saen pitep ŋa oina nanugaz ŋetemanawoi ŋabol, kekazek inan nanungaz banin paenlon temaniime egin, ge aŋ amoi. 38Aloŋ, nami ab fuzai inaup panaŋoi.#Mat 22:6; Luk 13:34, 35; Apos 7:59; Tes I 2:15; Jer 22:5; Kiŋ I 9:7, 8 39Ŋa aŋ ŋepaiaŋ, aŋ gazo e ilap faun ta so anasagoi, aŋ get aboloi, Patun isap mado me i Ujanzen neanlon isoime eginmap.#Mat 21:9; Kan 118:26
Currently Selected:
Mateus 23: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
