Mateus 25
25
Bazas ten
1Didnen kagin mai te i bazas ten kilian e taboloi, me i nadin lamp diŋalge aifazeŋ mai naon tazetazewoi dile. 2Faif i gedagad, faif i ladin kagindaŋan. 3Gedagad me nadin lamp diŋal, ge gazeŋ so deŋaleg dile. 4Ge ladin kagindaŋan nabudlon gazeŋ mai lamp mai diŋalge dile. 5Aifazeŋ pasak so isemeg i daŋan meladin jofge didoz. 6Tidom loan muduf denaug dibol, Anasi, aifazeŋ isoime, alap mai naon tazetaze. 7Meginge bazas me daŋan dimaisge nadin lamp dikibinia. 8Gedagad i kagindaŋan me dipidin, Nami gazeŋ kin apenamaŋan, amnama lamp dimatoi denaudime. 9Ge kagindaŋan me auadin diabig dibol, Tea, aŋoi am‐oi mai so tat idusawoi, aŋ dadeŋwain zidinnen alap sebami nami adad. 10I didadoi dilemeg aifazeŋ ise. Me i abaŋ dikibineg demadelak i maig betezemaneklon dileg dalauan ifunati. 11Ge alouge bazas aenta diseg dibol, Ujazen, Ujazen, pasi penamape!#Luk 13:25, 27 12Ge i auadin jabig ibol, Malik ŋa aŋ ŋepaiaŋ, ŋa aŋ so ŋaloŋ.#Mat 7:23 13Mewoi amazazpa amado, aŋ nal aur mai so aloŋamelakoi.#Mat 24:42
Tamol ta inan jes begabeg nimadinlon se inau
14Kin egin, tamol ta fatu talon ilawoi ibolge inan begabeg iwigidinge inan jes i nimadinlon inau.#Mat 21:33 15Ta i gaŋmalan dap faif ipani, ta dap azugen, ta dap taimon. I denaunen diloŋlak megin dadodado ipinidin. Meginge i ile.#Rom 12:6 16I me gaŋmalan dap faif iŋallak me pasak ileg melon uzat inaug subuŋan faif to iŋal. 17Megin mon i me dap azugen iŋallak mai subuŋan azugen iŋal. 18Ge me i taimon iŋalelak i ileg tan sazeg inan ujanzen inan gaŋmalan miŋiani. 19Saen melaen binig alouge begabeg nadin ujanzen imulge iseg i mai gaŋmalan dusuti. 20Me i gaŋmalan dap faifdaŋanlak i gaŋmalan dap faif to mai iŋalge iseg ibol, Ujazen, o gaŋmalan dap faif panaglak, nasi, gaŋmalan dap faif ta mai ŋaŋallak. 21Inan ujanzen i ipai, Es, begabeg gauai, bube malikdaŋan mai, o abaŋ mitinlon bube malikdaŋanlak, ŋa abaŋ kuzum inan gaten ŋunuowoi, oina ujanzen inan zigieklon udula.#Mat 24:45–47; Luk 16:10 22Me i gaŋmalan dap azugendaŋanlak i mai iseg ibol, O gaŋmalan dap azugen panaglak, nasi, dap azugen ta mai ŋaŋallak. 23Inan ujanzen i ipai, Es, begabeg gauai, bube malikdaŋan, ŋa kuzum nadin gaten ŋunuowoi, oina ujanzen inan zigieklon udula.#Mat 25:21 24Ge me i gaŋmalan dap taimon iŋalelak me mai iseg ibol, Ujazen, ŋa ŋaloŋ o tamol gegau, o so upaelak me taŋeume, o so sezanelak melak naneume. 25Mewoi ŋazezge ŋaleg oina dap tanlon ŋimiŋiani. Nasi, oina abaŋ ŋan ie. 26Ge inan ujanzen auan jabig ipai, Begabeg sala sali mok! O uloŋlakge ŋa so ŋepaelak me ŋetaŋeyame, ŋa so ŋesezanelak melak ŋenaneŋame? 27Meginlakoi o ŋainag gaŋmalan poalektamol pinidinpe, meginpe ŋasop ŋainag dap subuŋan mai faun te ŋeŋalepe. 28Mewoi gaŋmalan dap taimon me wozaip aŋalep ta i gaŋmalan tendaŋan me apani. 29Ta inan mug ienlak me ta mai paniwoi, inan idusawoi, ge ta i tealak i abaŋ ta jabiime me mai wozaiwoi.#Mat 13:12 30Begabeg bian tea me mafuz tinanlon atanip melak sagainen liwon grigra ibolnen maiwoi.#Mat 8:12
Nal wadanlon betenaek ujan
31Tamolai inan kubelkubel zendaŋan isemap eŋel daŋan i maip disop, uzip pezatiu kubelkubellon matalmap#Mat 16:27; Bo 20:11–13 32tamolpain fatufatu i naonnen detemaniwoi. Tizinek i belelek gout mai pilianaime egin, megin i mai pilianawoi.#Rom 14:10 33Belelek i waŋlon inauwoi, ge gout i ŋaslon inauwoi.#Hesek 34:17 34Uzip kiŋ i waŋlon me ipidinoi, Elak asop, inag Mam baz panaŋge kibiniaŋlak, kiŋdom aŋoi tan funlonge ikibinelak me aŋale. 35Ŋa pitol funagge aŋ anaŋ apanaglak. Ŋa nazoi ŋamatge aŋ naz apanaglak. Ŋa baswain ŋemadeg aŋ ikibiniaglak.#Jes 58:7 36Ŋa niŋog monge aŋ jamel ipila apanaglak. Ŋa maiai funagge aŋ anasaglak. Ŋa sebaneklon ŋemadeg aŋ izignen aselak. 37Meginmap taozgaz i auan diabip diboloi, Ujazen, saŋepte pitol funomeg anasolak, anaŋ apanolak? Nazoi umatge apanolak?#Mat 6:3 38Saŋepte o baswain madeg ikibiniolak? Niŋo monge jamel ipila apanolak. 39Saŋepte o maiai funog sebaneklon mademeg am o izinen aselak. 40Kiŋ auadin jabip ipidinoi, Malik ŋa aŋ ŋepaiaŋ, aŋ ŋainag taiggaz mitin ta ikibinelak me ŋa kibiniag egin.#Met 19:17; Heb 2:11
41Uzip ŋaslon me ipidinoi, Amais ala, meselanek aŋ, jananin dedeŋaneknen me Satan inan eŋelgaz maiwoi ikibinelak melon.#Mat 7:23; Bo 20:10, 15 42Ŋa pitol funagmeg aŋ anaŋ so apanaglak, nazoi ŋamatge aŋ naz so apanaglak. 43Ŋa baswain ŋemademeg aŋ so ikibiniaglak. Niŋog monge jamel so ipila apanaglak. Maiai funagmeg sebaneklon ŋemadeg aŋ so aseg anasaglak. 44Meginpe i auan diabip diboloi, Ujazen, saŋepte pitol funo, tea, nazoi umat, tea, baswain made, tea, niŋo monge, tea, maiai funo, tea, sebaneklon made, ge bia so apalulak? 45I me auadin jabip iboloi, Malik ŋa aŋ ŋepaiaŋ, mitin enen ta so ikibinialak melon ŋa mai so ikibiniaglak. 46I me naon ja dedeŋaneklon didulawoi, ge taozgaz bas dedeŋaneklon.#Joh 5:29; Dan 12:2
Currently Selected:
Mateus 25: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
