Hebrea 12
12
Jesus i inad ilonlon maliknen inan Ujanzen
1Mewoilakoi sigianek kuzum timtaen egin digiliŋinaddime, id abaŋ muzuan daŋan aupasek me id poad maiime tepasip segatekdaŋan paluk betenaek idoi ienime melon tepaluwoi,#Heb 10:36; Rom 7:21; Kor I 9:24 2Jesus, idinad ilonlon maliknen fun tezepasekkamaŋ mai, i tedaŋewoi. I zigiek iwoi sagen inaulak mewoi jakebazeklak segatig imade, abaŋ alan inan mamai dab so ipanig i Anut inan pezatiu tinin waŋlon matalmeg madoime.#Kan 110:1; Mat 25:21
Inad alan me inan mai so iduse
3I aupasekbibiadingaz iwoi wagai gauz denaug liwon diabimeg i segatig madelak me lami agazepe, meginpe aŋ tiwomi so tazep bodo aboloi.#Luk 2:34 4Aŋ aupasek mai bulebulemeg nami zoiklon daz ta kin get so idu.#Heb 10:32–36 5Aŋ tansaek azu lami padal tat me aŋoi Nanunai e ibol? Ibol, Nanugai, o Ujanzen inan peteŋanek uzatoi fiziŋo so suni mon, i pututomap o kris kaginlon so bodok mon.#Met 3:11, 12 6Ujanzen ta ilon paniime me i tiliŋan jabiime, ai i dagom iŋaleime me dadondadon pututiime.#Bo 3:19 7Aŋ kagin peteŋanaŋnenoi alan nauklon asegatiwoi. Anut aŋ inan nanungaz mok egin kibiniaŋime. Au, it tat madoime me inan taman i so bebaniime? 8Aŋ bebanek melon gungaz daŋan depeleŋana me teamap aŋ ai loaŋloaŋ mon, ai mok tea.#Kan 73:14, 15 9Ta mai, tannen tamadgaz i debebanad, ge id iwoi ilod gauaige tazutlak. Me beleŋanip uz Temadin auan paenlon temadop id so tat bas temadowoi?#Num 16:22 10Tannen tamadgaz santa mon ladin ibolge kin pututadlak, ge Anut i gauai temadowoi pututadime, meginpe id inan gun niŋon mai teŋalewoi. 11Pututek daŋan me inan saenlon izoznendaŋan, gamun tea, ge uzip i me melon detenanoumeg ditozlak iwoi taoz inan niŋon mazozdaŋan inaug itasaime.#Kor II 4:17, 18
Nug zagun panipani, mazozdaŋan amado, kukuaip atoz
12Mewoi nimami magozlak ibisa, dugumi bodok faun aseŋani,#Jes 35:3 13niemi inan dal tiduk ikibine, meginpe me i ipikipik itozime i nien begazep so madowoi, tea, sebatep idauloi.#Met 4:26 14Tamolai daŋan maip mazozdaŋan amadowoi jaeŋjaeŋ atoz, gun noaŋnenoi mai jaeŋ funaŋoi, me teamap tata Ujanzen so nasiwoi.#Kan 34:15; Rom 12:18; Tim II 2:22 15Mewoi dab anau, tata Anut inan kanim ŋalenen so bedaniwoi; dilun gigien ta so isap kagin kubulip kuzum melon bibianawoi.#Deut 29:18; Apos 8:23 16Ta jaitwain ikok teap so itozoi, Esau egin, me inan matu anaŋ janek taimonoi idad ilelak.#Gen 25:33, 34 17Aŋ aloŋ i alouge baz ŋalewoige i bitilak, i inan matuoi ita, ge faun bulip ŋalenen tea.#Gen 27:30–40
Sinai Sion mai
18Abaŋ anasinen aloŋ mewoi aŋ so atemaniame, ja walen ujan, mafuz, mafuz tukan mai, tim fazek,#Ekso 19:12, 16, 18 19tauz auan, auan ta me tamolai i diloŋmeg i digod me azu ta i so pidinoi.#Deut 4:11; Ekso 20:19 20I kibiai pinidinime me deŋalenen so diloŋ. Azu ta ibol, Dazuk tat did titimap i patlon funip imatoi.#Ekso 19:13 21Malik, abaŋ me dizutnen mok, mewoi Moses ibol, Ŋa ŋazutnenlon tinig terere ibolime. 22Ge aŋ did Sion, Anut bas inan panulon ase, Jerusalem didnen, eŋel sutek tea detemanig demadodime.#Bo 14:1; Gal 4:26; Bo 21:2; 5:11 23Aŋ matugaz nadin medaeŋ me neadin didlon gazeg ienime zidinnen ase, betenaekkamaŋ me tamolai daŋan nadin Anut, tamol taoz detezepasilak me nadin uz zidinnen ase.#Luk 10:20; Bo 6:10 24Aŋ Jesus, temaneknen faun inan liluŋwain, staleknen daz mai me kanim Azu ibolnenlon Abel inan daz beleŋaniime me izinnen aŋ ase.#Heb 9:15; 11:4; Gen 4:10
Dagom mok paniwoi
25Dab anau, aŋ i me azu ibolime inan auan so amoi mon. I me tanlak tamolpain bebanameg so dutuzugusalak, id i me didlon bebanadime temeselanitap id so mok tuzugusadoi.#Heb 2:2; 10:28, 29 26Saen melon inan auan inaug tan inini. Ge gazo i blani panilak, ibol, Taimon ta maip ŋa tan mon so ŋininiwoi, tea, did mai.#Kan 114:7; 68:9 27Azu e, Taimon ta maip me fun megin: abaŋ i niniime me pasiwoi, abaŋ tanlak inaulak ienime me. Meginpe Abaŋ nininen tealak me binip ienoi.#Kan 96:9–11 28Kiŋdom nininen tealak me panadlakoi mewoi id Anut pez tepaniwoi, i gamun funilak megin i naonnen tatasap ubou tenasiwoi, tagodoi, binek iduklon, tazutnenlon mai.#Luk 1:74 29Inad Anut i naneknen ja mok.#Deut 4:24; 9:3
Currently Selected:
Hebrea 12: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
