Hebrea 11
11
Ilonlon maliknen inan fun dodin?
1Ilonlon maliknen me kaginoi suzuazouklon sililip madonen, abaŋ naseknen tea mewoi buben zatamoi.#Kor II 5:7 2Melon Anut tamol ta wagam demadelak, Gauai anauame e pidin. 3Ilonlon maliknenlon id taloŋ tan abaŋ Anut azulon inaulak, abaŋ id tenasitame me fun beŋten tealon ditaselak.#Gen 1
Abel, Henok, Noa mai
4Ilonlon malkinenlon Abel inan janauk Kain inan nenazig Anut gamun funi. Mewoi Anut ibol i taoz, Abel nan lo abaŋ dab panimeg siben iwoi sigianilak. I imatlak, ge ilonlon maliknenlon gazo mai azu ibolime.#Gen 4:4; Mat 23:35 5Ilonlon maliknenlon Anut Henok iŋaleg mitian ile; i mateŋ so uniwoi, faun so denasilak, Anut i ŋalelakoi. Ge so iŋalemeg Anut gamun funilak iwoi sigianek ien.#Gen 5:24 6Ilon maliknen tealon tata Anut gamun funinen tea. Tata Anut izinnen ilawoipa i Anut malik madoime me ilonlon malikoi, i tamolai me i debezanidime naon pinidinime.#Rom 10:14 7Ilonlon maliknenlon Anut Noa abaŋ i so nasiime mewoi ipaig i dab panig wag ta ipau, inan ab samungaz tataz iŋalnen. Melon i tealakgaz bitiniag meselana; taoz ilonlon maliknenlon itasaime me inan fuzan ŋaleknen i inaulak.#Gen 6:8, 9; Kan 37:29; Rom 4:13
Abraham
8Ilonlon maliknenlon Abraham dagom itoz, Anut i wagig fatu ta i fuzan paniwoi ibol. Men ilawoi ibolge i ile, domten tat ilawoi me so iloŋ.#Gen 12:1, 4 9Ilonlon maliknenlon i blani panek inan fatulon itoz, fatu baslon Isak Jakob maig tazaslon mon demade, i mai blani panek taimon me mon fuzan ŋalekwain.#Gen 26:3; 35:12 10I panu foddaŋan menenoi dalel, panu Anut siben ŋalelak, siben funlak me.#Bo 21:19 11Sara inan ai inaunen saen get binilak, ge ilonlon maliknenlon ai duzinen tiwon iŋale, i ibol, Anut i ai blani panilak me buben malikdaŋan.#Gen 21:2 12Mewoi tamol taimonlon me tinin imat egin mademeg daz patui didlak kuzum egin ditaselak, au, abuz laŋten sutek tea egin.#Rom 4:19; Gen 22:17
I daŋan didpanu dusuzuazou
13E me daŋan blani panek inan niŋon so deŋalemeg ladinlon maliknenlon dimat. Ge i kin makaiu egin denasig tabei mai depani, i diloŋge dibol mai i baswain, i tan elaknen panufun tea.#Gen 23:4; 47:9; Kan 39:13 14Tamolai i megin diboldime i funpanu debezanidime me azu melon beŋten denau. 15I fatu melonge i diselak, mewoi ladin kankanpe i melak faun dimulnen diloŋoi. 16Ge iwoi megin tenasi, i tan fatu me nenazilak fatu mewoi ladin denaudime, me didnen. Anut i inadin Anut e dibolnen mewoi mamai so funiime, i iwoi panu ujan ta ikibinelakoi.#Ekso 3:6; Joh 14:2
Abraham inan ilonlon maliknenoi gauz kibianilak
17Ilonlon maliknenlon Abraham kibianimeg Isak ja inaug pani, i me blani panek iŋalelak i inan ai taimon ja inaunen so imoi.#Gen 22 18Iwoi ibollak, Isaklon oina begazagaz fun inauwoi.#Gen 21:12 19I ilon ibol Anut tamol mateŋlonpa fuŋunip imaisnen iloŋ, mewoi ilonlon mon faun iŋale.#Rom 4:17
Isak, Jakob Josef mai
20Ilonlon maliknenlon Isak baz loantapnenoi Jakob Esau maiwoi igod.#Gen 27:28, 29, 39, 40 21Ilonlon maliknenlon Jakob kabu gatenlak aen sig inauge godoani, Josef inan ai dadodado baz pinidin.#Gen 48:15, 16 22Ilonlon maliknenlon Josef inan saen wadanlon Israel dimul dilanenoi ibolge siben inan dogoi kibiai pinidin.#Gen 50:24
Moses
23Ilonlon maliknenlon tinan Moses duzimeg tinan taman mai fulei tolgen dimiŋianig i dab depani, ai me ai gizaud, i Farao inan kibiaioi so dizez.#Ekso 2:2 24Ilonlon maliknenlon Moses itubge tamol inaug i Farao inan nanunpain inan ai e dibolnen me imoi,#Ekso 2:11, 13 25i Anut inan tamolpain mai alan denaunen me ipiliani, aupasek inan zigiek me pasak biniimelakoi. 26I ilon ibol Kristusoi alan inaunen me Egipta inan filian nenaziime, i kagin naon malan inaulakoi.#Kan 89:51; Heb 13:13 27Ilonlon maliknenlon i Egipta binig ile, i kiŋ inan buzunoi so izez, i me tenasinen so taloŋlak me nasimeg egin segatekdaŋan imade.#Ekso 2:15; 12:51 28Ilonlon maliknenlon i Pasa inaulak, meginpe ai matumatu nadin eŋel wagaz i Israelgaz so ijab iloi.#Ekso 12:12, 13
Israelgaz, Rahab
29Ilonlon maliknenlon tamolai Mas Dazan dedaia tan kazaklak egin, ge Egiptagaz i megin denauwoige idid pasi.#Ekso 14:22, 27 30Ilonlon maliknenlon Jeriko panu inan mad, nal 7 ditilianilag ibal idu.#Jos 6:20 31Ilonlon maliknenlon Rahab, jaitpain, i dagom tealakgaz mai so depadal, i kibianektamoloi lo idulakoi.#Jos 2:11, 12; Jak 2:25
Ilonlon maliknengaz ta mai
32Abaŋte ta mai ŋaboloi? Gideon, Barak, Samson, Jefta, Dawid, Samuel profetoi mai sai ŋaninen saen so iduse.#Bet 6:11; 4:6; 15:20; 12:7 33Me ilonlon maliknenlon julon seŋanalak, kagin taozlon azu debetenaelak, blani panek deŋalelak, laion auadin dubutunalak.#Bet 14:6; Sam I 17:34, 35 34Ja gik ibolge nanimeg dusufunilak, badiz malan dutuzugusi, bodoklon tiwon deŋale, julon tiwodin ipazlak, panu ta nadin judaup dukuduag diau.#Dan 3:23–25 35Pain nadingaz dimatlak me fuŋunek dimaisnenlon faun diŋal. Ta me kakeznenoi ibinnen dimoilak i denau alan mok, i madoknen gauaioi aloupa ditiziauwoilakoi.#Kiŋ I 17:23; Kiŋ II 4:36 36Aenta dizawaik, funek ŋuzaŋuzlon sebanekoi mai Segauz e dibol.#Jer 20:2; 37:15; Mat 23:37 37Patlon difu, saslon disut, badizlon difug dimat, i belelek gout mai nadin siliŋodindaŋan ditozse ditozle, pitol malas mai ifu, pinag demade, aenta i denau alan, 38tealakgaz iwoi so diduse, tan e inan fatu udau, did ilonnen, dazuk inan loflon, gezapenlon pat gogoŋlon mai ditoz.
39E daŋan ilonlon maliknenoi neadin sigianekdaŋanlak, ge blani panek inan niŋon get so deŋale.#Heb 2:13 40Anut imugseg idoi abaŋ ta inasig ikibinelak, gungaz dimuglak i id tealon sebadin so detezepasiwoi.
Currently Selected:
Hebrea 11: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
