Hebrea 10
10
Tan inan janauk me lelain mon
1Kibiaiŋ me abaŋ gauai isonen inan lelain mon, abaŋ me inan walis mok tealakoi, mewoi janauk me mon umaz daŋan sansan denaudime, me inan tamolaigaz melon detezepasinen tea.#Heb 8:5; 7:19 2Detezepasipe janauk me so dibini tatpe? Ubou nasekwain i get saen talon ikokdaŋanpe i faun aupasekoi kakad so kunutawoi. 3Ge janauk elon umaz uziuzip aupasekoi ilon isounen ienime.#Lew 16:21 4Bulmakau dauai gout mai nadin daz aupasek pasinen tealak. 5Mewoi Kristus tanlak idug isemeg ibol, Janauk lo abaŋ mai o ilo so ibollak, ge tinin ta o kibine panaglak.#Kan 40:7–9 6Dazuk tinidin daŋan domomoznen, janauk aupasekoi mai me ilo gamun so funiime. 7Meginge ŋa ŋabol, O Anut, ŋa oina aua ŋuzi ŋepaniwoi ŋase. Buklon ŋawoi gazelak egin. 8I get ibol, O janauk mai, lo abaŋ mai, dazuk tinidin daŋan domomoznen, janauk aupasekoi mai me Moses inan kibiaiŋ uzig denaudime, me ilo so ibolime, ilo mai gamun so funiime. 9Megin ibolge i bateg ibol, Nasi, ŋa oina aua ŋuzi ŋepaniwoi ŋase. I melon janauk abaŋ matu me bitig inan kagin ta me abenlon inau.#Mat 6:10; Gal 1:4 10Auan melon id Jesus Kristus inan tininlon id saen taimon gun noad pasig bini.#Heb 9:12, 28
Kristus inan janauk taimon me dedeŋaneknen zagundaŋan
11Waliŋ dadodado nal daŋan inan biabi paluk uzatlon itiuzime, ja fun taimon mon sufuleg inauime me aupasek ipasnen so iloŋ.#Ekso 29:38 12Ge Kristus i aupasekoi ja taimon inau binig i Anut niman waŋlon gaid imatal.#Heb 10:10, 14 13Meginge malan inauime, inan agez niennen pezatiu inaup demademap eginmap.#Kan 110:1 14Janauk taimonlon i gungaz dedeŋaneknenlon tezepasip demadowoi inaulak.#Heb 10:12 15Uzgun mai inan sigianek ipanad, i ibol, 16Temanek i maip ŋenauwoi, nal me uzip, Ujanzen ibol, inag kibiaiŋ i bubudinlon ŋenaup dienoi, inadin kankanlon mai ŋegazewoi.#Heb 8:10; Jer 31:33 17Nadin aupasek kagin duzi so depanilak mai so ilog isouwoi.#Jer 31:34; Heb 8:12 18Aben aupasek toani idunen ienime melak aupasekoi faun ja so inauwoi.
ILONLON MALIKNEN, BUBEN MALIKDAŊAN MAIWOI BEBANEK, 10:19—13:17
Anut naonnen mok tatasawoi
19Mewoi taiggaz, id Jesus inan dazlon aben gun mok gunlon tadulawoi tisililitame,#Mat 27:51 20dal faun bas mai me i lai metalun ilonnen pasi panadlak, siben inan tininlon.#Heb 9:8 21Id Anut ab inan waliŋ ujan tadaŋan temadotame, 22mewoi id bubed malikdaŋan izinnen talaŋan, ilodlon maliknen dadon isaklon, bubed stalep ikok kakad teap tinid mai naz ikoklon flaniwoi,#Heb 4:16; Ef 5:26 23Inad suzuazouk inan blanek me tabip zatamoi, so tukumewoi, i me blani panadlak i buben malik.#Heb 4:14 24Id ilopanekoi nauknauk gauaioi mai nug paipaiwoi.#Heb 13:1 25Medaeŋ tanek se ibinip sebami noami mon so atoz mon, tea, nug tansaek panipaniwoi, Ujanzen inan nal sizizlon isoime, mewoi me jaeŋ funaŋpa megin anauwoi.#Heb 3:13; 10:37
Ta nean nauklon Anut miz panimap i ja zendaŋanoi
26Id malik niŋonoi taloŋnendaŋanmap, ge dadod nean tenaup autapastap, meginmap aupasek me inan janauk ta so ienime.#Heb 6:4–8; Tim I 2:4 27Tea, padalnen mon tinidin denaup demadowoi, ja gauz nanip naobitekgaz niniawoi. 28Tamol ta Moses inan kibiaiŋ meselanimeg i sigianek azug tol auadinlon kanim tealon imatime.#Num 15:30; Deut 17:6 29Aŋ lami dodin ibolime, i me Anut inan Ai piziŋinilak, temaneknen daz melon i gun inaulak mewoi azu salan ibol, kanim inan Uz me dizan iwailak i me Moses kibiaiŋ nenazip naon dodin iŋalewoi?#Heb 2:3 30Id i taloŋ me ibollak, Wagaz me inag, ŋa naon ŋepaniwoi. Faun ibol, Ujanzen i inan tamolpain bitiniawoi.#Deut 32:35; Kan 135:14 31Anut bas inan nimanlon tabal tadumap me tazut tazeznen mok.
Kris saen getnen ladin isouwoi
32Ge nal malanmalan me lami isou, aŋ lami sesalig aŋ siai wagai alan nauklon seŋanaŋlak.#Heb 6:4 33Santa sebami tamolpain meladinlon noaŋ alanmeg alan anaulak, santa aenta i alan denaumeg aŋ i mai apeleŋanalak.#Kor I 4:9 34Aŋ sebanekgazoi teŋaemi alange lami pinidin, nami abaŋ diwiziaŋge aŋ zigiaŋ, aŋ aloŋ aŋ jes gauai ta ienime, jes me dedeŋaneknen.#Mat 6:20; 19:21, 29
Naon ŋalek padalnen mai siziz
35Mewoi sililip atoznen so abedani mon, me naon gauai. 36Aŋ segatek so iduselak ta aŋalewoi, meginpe aŋ Anut inan auan uzi apanip blani panaŋlak me aŋalewoi.#Luk 21:19 37Kitek ta maimap mon isowoi ibollak me isowoi, tinin so muzuanoi.#Hab 2:3 38Ge ŋainag taozwain i ilonlon maliknenlon madowoi, me i sazizmap inag nitug iwoi gamun so funiwoi.#Hab 2:4; Rom 1:17 39Ge id wozou me desazizge padalnen deŋaledime menenwain tea, tea, id wozou menenwain me ladinlon malikmap nutudin patun depasidime.#Luk 21:19
Currently Selected:
Hebrea 10: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
