Genesis 39
39
Josef Potifar inan iwon mai
1Josef me Egiptanen duduzig Potifar Farao inan tamolujan ta, tizinekdaup inan gaten, Egiptawain i Ismaelgaz me i Josef melak duduzig iselak me zidinnen idad. 2Ujanzen i Josef mailak, abaŋ daŋanlon i tamol niman jumusan; i inan tamolujan Egiptawain inan ablon made. 3Ujanzen Josef mailak me inan tamolujan iloŋ, abaŋ Josef inauime me daŋan Ujanzen inaug idusaime. 4Meginge Josef i izinnen kanimdaŋan itoz, Potifar inaug i inan ab abaŋ daŋan gaten made. 5Saen i inan ablon abaŋ daŋan maiwoi tizinek inaug itozmeg Ujanzen Josefoi Egiptawain inan abaŋ daŋan kibine. Ujanzen inan baz me inan abaŋ daŋan, ablon umlon mai fonlak ien. 6Meginge inan abaŋ daŋan Josef nimanlon inau. I mademeg Potifar abaŋ tawoi jaeŋ kin so funi, i anaŋ janinen mon ilon isou.
7Josef i tinin naon mai gamundaŋan. Santag inan tamolujan inan iwon i Josefoi malan isig ibol, Ŋa maip taenoi. 8Ge i imoige inan tamolujan inan iwon ipai, Nasi, ŋa i izinnen ŋemademap inag tamolujan ablon abaŋ tatawoi jaeŋ so funiime, inan abaŋ daŋan ŋa nimaglon inaulak. 9I ab elon ŋa so beleŋanag; abaŋ tata so piziani, o sibe mon, o inan iwonlakoi. Ŋa dodin abaŋ salan mok zen a ŋenauwoi, Anut inan auan auŋapasoi? 10I nal daŋan Josef ipai ipaimeg, i maip dienoi maip demadowoi, ge i auan dab so pani. 11Nal ta i inan uzat inauwoi ablak iduseg ablon ab inan tamol ta so mademeg, 12i inan jamel jabig ibol, Ŋa maip taenoi! Ge i jamel inan nimanlon binig ienmeg iau, ablonge tapas idu. 13Pain i inan nimanlon jamel binig ienlak me nasig, ablakge tapas idu maig, 14i inan abbadim inan tamoloi iwogge ipidin, Anasi, Potifar Hebreawain e azu salan paiadoi duzig iselak; i maip aenoi izignen iseg ŋa ŋabob kekauk. 15Ŋa klagug ŋibiseg ŋabobge i jamel izignen binig ienmeg iauge ablakge tapas idu. 16Meginge i Josef inan jamel inaug ien, inan tamolujan isemap peteŋaninen. 17Pain i azu me mon iwon ipai, ibol, Begabeg Hebreawain o izidnen duzig iselak i ŋainag galuŋlon idug azu salan paiag. 18Ge ŋa klagug ŋibiseg ŋabobge i inan jamel izignen binig ienmeg ablakge iau.
19Josef inan tamolujan, i iwon inan azu i ipailak me iloŋge, Oina begabeg megin noag alanlak, i buzun kekazun ibol. 20Tamolujan Josef ŋaleg sebaneklon inau, aben kiŋ inan sebanekgaz demadodime melon, Josef melak sebaneklon made. 21Ge Ujanzen Josef maig demade, ilopanek segatekdaŋan ipani, sebanek gaten malanlon kanimdaŋan imade. 22Sebanekgaten i sebanekgaz sebaneklon demadodime me daŋan Josef nimanlon inau; abaŋ daŋan i melak denaudime me Josef i inauime. 23Abaŋ Josef tizinaime me daŋanoi sebanekgaten dab kin so paniime, abaŋ kitek tawoi tea, Ujanzen i mailakoi; abaŋ tata i inauime me Ujanzen inaug i niman dod.
Currently Selected:
Genesis 39: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
