Genesis 40
40
Josef funatekai nadin dienmin fun flale
1Saen kin ilemeg Farao inan naz paneknen ai sepalaŋ jabeknen ai mai nadin ujanzen, Egipta inan kiŋ, izinnen abaŋ ta kin denau alan, mewoi kiŋ iwoi ilon alan. 2Farao i inan bian palukai, naz paneknen gaten sepalaŋ jabeknen gatenoi mai buzun isa. 3I sebanek gaten inan sebaneklon inau, sebanek Josef madoime melon. 4Sebanek inan gaten i Josef nimanlon inaug i biadin palu; i saen tata megin sebaneklon demade. 5Egipta inan kiŋ inan naz panekai sepalaŋ jabekai mai tidom ta i auzun dienminlak me ibeniben, fun mai ibeniben. 6Bomon mon Josef zidinnen ileg ilge i desagai. 7Mewoi i Farao inan bian palukai i maig inan tamolujan inan ablon demadodime sodoz pinidin, Aŋ dodinge gazomnen noami takokge amadoame? 8I depai, Am aenminlak, ta bo fun flalenen tea. Josef i pidin, Fun flalenen me Anut inan wou tea tat? Ŋa ŋogodoanaŋ sai apanagpe.
9Meginge naz paneknen gaten, i ienminlak me Josef sai panig ipai, Inag ŋaenminlon greip inan waz ta naognen ien, 10wazlak zaen tolgen dien. I ilubge zizigun buntaimon itase, damu greip inaug melaun. 11Farao inan gab nimaglon ien; ŋa greip patun ŋeŋaleg Farao inan gablon ŋipipi idug Farao inan nimanlon ŋenau. 12Meginge Josef i ipai, Inan fun me megin: zaen tolgen me nal tolgen. 13Nal tol binip Farao i oina nao bisap faun inuop oina uzatlon umuloi. O naz paneknenai madelak egin o faun Farao inan gab i nimanlon unauwoi. 14O gauai mademap o ŋa ilo isouwoi, ŋawoi lo udup, ŋa o ŋogodoano, Farao naonnen ŋawoi kin ubolpa ab elonpa pisiagoi. 15Ŋa malik Hebrea nadin fatulonge ponau diŋiliag; elak mai ŋa abaŋ ta so ŋenau, se mok mon sebaneklon donoaglak.
16Sepalaŋ jabeknen gaten fun flalek gamun me dab panig i Josef ipai, Ŋa mai ŋaenminlak: gateglak sazeg kebazan tolgen dien. 17Sazeg fonlak mok melon Farao inan sepalaŋ funfun ien. Ge ma diseg gateglak sazeg melon sepalaŋ diani. 18Josef auan jabig ibol, Fun megin: sazeg tolgen me nal tolgen. 19Nal tol binip Farao oina nao bisawoi, ge klagu gusutip jalak sisiowoi, muda ma dianiwoi.
20Nal tollon, me Farao inan nal, tinan duzilak melon, i inan begabeg daŋanoi tuz inau. I inan begabeg ilonnen nazpaneknen gaten me naon ibise, sepalaŋ jabeknen gaten mai naon ibise. 21Naz paneknen gaten faun naz inan uzat panig i gab Farao inan nimanlon inau mug. 22Sepalaŋ jabeknen gaten bo jalak sase, Josef fun flale pinidinlak egin. 23Naz paneknen gaten i Josefoi so ilon isou, i iwoi ilon padal.
Currently Selected:
Genesis 40: GDD1960
Highlight
Copy
Compare
Share
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
