Genesis 38
38
Juda Tamar mai
1Saen melon Juda inan taingaz ibinge Adullamwain ta nean Hira maig demade. 2Melak Juda Kanaan tamol ta nean Sua inan aipain inasi. 3I iŋaleg maig dienmeg i aidaŋange ai tamol ta duzi. Juda inan ai nean Er iblani. 4I faun aidaŋange ai tamol ta duzig i nean Onan iblani. 5Faun te aidaŋange ai tamol ta duzig i Sela iblani. I Sesibnen idauzi. 6Juda i inan ai matu Er inan pain ŋale pani, i nean Tamar. 7Er, Juda inan ai matu, bo Ujanzen malanlon aupasekbibian inaug itoz; Ujanzen i funi. 8Meginge Juda Onan ipai, O ina tai buzan izinnen ulap tamol kaginlon tai inan daz ta imaisoi. 9Ge Onan iloŋ daz me inan teaboi, meginge i tain inan iwon izinnen ileg i siben tinin inan fabul bedanig tanlak idu, tain daz ta paninen imoilakoi. 10I inaulak me Ujanzen gamun so funig i mai funig imat. 11Meginge Juda inan zauan Tamar ipai, O oina tama inan abbadimlon umulpa pain bob madop inag nanugai Sela itub ujanmap eginmap, i izez i taingaz egin imatoi. Mewoi Tamar ileg inan taman izinnen made.
12Saen ilemeg Juda inan iwon, Sua inan aipain me imat. Juda ita binig ilon kin gauaige i Timnanen inan belelek fufuludin pasekgaz zidinnen ileg tizan Hira Adullamwain i maig dile. 13Tamar depai, Oina zaua Timnanen belelek fufuludin ipasoi ilaime. 14I iloŋge i painbob inan jamel pasig jamellon naon tabubge jamel melaen mai nuleg Enaim inan dalauanlon Timna inan dallak imatal; i iloŋ Sela mug itub ujange i mai so betezemanalak. 15Juda inasig i ibol i pain loaŋloaŋ, i jamellon naon toanilakoi. 16I dal gezaŋenlon izinnen ileg ibol, Usop ubolpa ŋa o izinen kin ŋaduwoi, i inan zauan me so iloŋlakoi. I ibol, O abaŋte panagpa o izignen uduwoi? 17I ibol, Ŋa gout nanun ta ŋenaup isop ŋepanowoi. I ibol, O abaŋ talon stemanek azu paiagoi o me unaup isemap eginmap. 18I ibol, Stemanek azu abaŋte ŋepanowoi? I ibol, Oina biu, oina metagiz, oina jatok nimalon ienime me mai. Meginge i abaŋ me panig i izinnen ileg i‐lon aidaŋan. 19Meginge Tamar imaisge ileg jamel naon toanilak me pasig pain bob inan jamel faun nule.
20Juda i tizan Adullamwain wagenlon gout nanun inaug ileg inan abaŋ melon i stemanek azu malik e ibollak me imuloige i painoi laŋai tea. 21I panu menwain sodoz pinidinge ibol, Pain loaŋloaŋ dal gezaŋenlon Enaimnen madelak me domten? I dibol, Pain loaŋloaŋ ta elak so madelak. 22Meginge i Juda izinnen imulge ibol, Ŋa so ŋenasi, panu me inan tamol dibol, Pain loaŋloaŋ elak so made. 23Juda auan jabig ibol, Abaŋ me segauz izinnen ien, teap idoi didiwawoi; nasi, ŋa gout nanun e ŋenaug o bezanilag tea.
24Fulei tolgen binig Juda depai, Oina zaua Tamar loaŋloaŋ itoz; i inan loaŋloaŋ tazeŋlon aidaŋan. Juda ibol, Duzip isop jalon demaziwoi. 25I duduzig beŋten itasemeg i zauan izinnen azu megin inaug ile, Tamol abaŋ e funlak i‐lon ŋa aidaŋan. I ibol, Dab nau, ŋogodoano, it inan biu, metagiz jatok mai. 26Meginge Juda Au ibol, so ikakez, ibol, Ŋa i egin taoz tea, ŋainag ai Sela so ŋepanilakoi. I faun i maig so ditoz.
27Inan ai duzeknen saen idug ai pezagog tininlon demade. 28I ai duziwoi inaumeg ai niman beŋten itase; ulatpain niman jabig mol dazan ipau, ibol, E imugseg itase. 29I inan niman izaeg imulge inan tain imugseg itase. Ulatpain ibol, O sibewoi dal pasek dodin unaulak! Mewoi inan nean Peres deblani. 30Uzig tain niman mol dazandaŋan itase; inan nean Sera deblani.
Currently Selected:
Genesis 38: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
