Genesis 32
32
Jakob Esau mai naon tazetazewoi abaŋ kibine
1Jakob inan dal uzig ilemeg Anut inan eŋel i mai naon tazetaze. 2Jakob i ilge i ibol, E me Anut inan daup. Mewoi i fatu me Mahanaim iblani.
3Jakob i totol ta inan tain Esau Seir inan tanlon, Edom fatulon inaug dimugge dile. 4I kibiai pinidinge ibol, Inag ujanzen Esau megin apaiwoi: Oina begabeg Jakob megin ibol, Ŋa Laban mai lo amadelak, ŋa ŋemadeg gazo e. 5Ŋa bulmakau, doŋki dazuk pifoldaŋan, aibegabeg painbegabeg maidaŋan. Ŋa totol ŋenaug ile, inag ujanzen ŋepaiwoi ŋa izinnen kanim ŋeŋalewoi.
6Totol Jakob izinnen dimulge dibol, Am tai Esau izinnen ale, i o mai naon tazetazewoi isoime, tamol four hundert maig disodime. 7Meginge Jakob gauz izut teŋaen alan mai. I tamolai i maig demadodime, dazuk pifoldaŋan, bulmakau malandaŋan kamel mai me tezepaleg malan azugen inaug, 8ilon ibol, Esau i malan ta izinnen idup funitap malan ta i diaunen diloŋ.
9Jakob ibol, O Anut, ŋainag mam Abraham inan, mam Isak inan Anut mai, O Ujazen, o ŋa paiag, Oina mezaufatulon, oina taitauagaz zidinnen umulpa, ŋa o ŋunuo gauaioi. 10Ilopanek segatekdaŋan bube malik mai, me o oina begabegoi beŋten unaulak mewoi ŋa so ŋaduse. Jatok elon mon ŋa Jordan e ŋedaialak; gazo ŋa malan azugen. 11Taig Esau nimanlonge tetazag ŋiliagpe ŋogodoano, ŋa iwoi ŋazez, isop am daŋan aikamo tinadin mai funumawoi tat. 12Ge o ubol, Ŋa ŋunuo gauaipa oina begazagaz abuz laŋten suteknen tea egin kuzumoi.
13Meginge i tidom melon melak made, inan abaŋ menen tata ŋaleg tain Esau inan zaiŋ inau. 14I gout paiat tu hundert iŋal, gout dauai twenti mai, belelek paiat tu hundert, dauai twenti mai, 15kamel sudaŋan tirti nunudin mai, bulmakau paiat fourti, dauai ten, doŋki paiat twenti dauai ten mai. 16Me inan begabeg nimadinlon inau. Malan ibeniben inauge inan begabeg ipidin, Amugpa naognen alap dazuk malan ibeniben adauzi. 17Malanlak me kibiai pinidinge ibol, Inag taig Esau aŋ mai naon tazetazep sodoz ipanaŋmap, Aŋ it inan? Aŋ domten alaame? Dazuk aŋ noaminen me it inan? 18Meginpe aŋ aboloi, I me oina begabeg Jakob inan; i me zaiŋ ta inag ujanzen Esau izinnen inaug ise; i muzumanen isoime. 19Megin mon malan tu tri mai me won duzge ditozdime me mai megin kibiai pinidinge ibol, Aŋ Esau mai naon tazetazemap azu megin mon aboloi. 20Aŋ te abatep aboloi, Oina begabeg Jakob i muzumanen madoime. I ilon ibol, Zaiŋ naognen ilaime melon ilon ŋalewoi, aloupa inan naon ŋenasiwoi, i inan tain egin ŋiliagoi tat. 21Meginge zaiŋ abaŋ get naonnen inaug ilemeg i siben tidom melon jaeŋ nauk abenlon made.
Jakob Penielnen tamol ta mai bulebule
22Tidom melon mon imaisge inan iwon azugen, inan paindinek azugen, inan nanun elewen mai iŋalge Jabok naz daiaknen abenlon daia. 23I iŋalge naz aentalon inauge dile, inan abaŋ aenta daŋan mai megin mon. 24Jakob siben taimon made. Tamol ta i maig bulebulemeg fatu sesali. 25Tamol mug dab pani, i Jakob mai bulebulemeg so seŋanig, i inan talin batek me ititig, i mai bulebulemeg talin batek me sepegai egin inau. 26Meginge i ibol, Binagpa ŋala, fatu sesaliime. Ge Jakob ibol, O baz so panagtap na so ŋibinowoi. 27I ipai, Oina nea itai? I ibol, Jakob. 28Meginge i ibol, Oina nea faun Jakob so deblaniwoi, tea Israel, o Anut tamol mai wagai unaulakge o seŋanolak. 29Meginge Jakob i sedaze, Paiagpe ŋa ŋogodoano, oina nea itai? Ge i ibol, Dodinge o inag neagoi sodoz panagume? I mug melak baz pani. 30Mewoi Jakob fatu me nean Peniel iblani. I ibol, Ŋa Anut malag patun moklon ŋenasig so ŋepadal. 31Itaseg Peniel binig ilemeg ad itase, i talin inan sepegaikoi kin itoz alan. 32Mewoilakoi Israelgaz i get mon gazo e, talin inan dul me talin inan gogoŋ fonlak ienime me so dianidime, i Jakob inan talin gogoŋ fonlak dul ititilakoi.
Currently Selected:
Genesis 32: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
