Genesis 31
31
Jakob Laban izinnenge bezazou iau
1Jakob Laban inan ai dibollak me iloŋ. I dibol, Jakob, inad mam, inan abaŋ daŋan wozailakoi inad mamlon i filiandaŋan. 2Jakob mug inasi, Laban inan naon gegaunge itoz, get megin tea. 3Meginge Ujanzen Jakob ipai, O oina tamagaz taitauagaz mai nadin fatulon umulpa ula, ŋa o maiwoi. 4Mewoi Jakob i Rahel Lea mai zidinnen totol inaug pifol abedinlon disowoi ipidin. 5I pidin, Ŋa ŋaloŋ nami temami get ŋa mai atoz gauailak, gazo e megin tea, ŋainag mam inan Anut bo ŋa mailak. 6Aŋ aloŋ ŋa zagugdaŋan nami temami izinnen uzat ŋenaulak. 7Nami temami bo naog kibianig inag uzat naon poali ten, me Anut i naon dal faleg ŋa so waiz. 8I iboltap, Tinidin balabaladaŋan me oina naon, meginge pifol daŋan nunudin balabaladaŋan dusuzuai. I iboltap, Bala zaek melaendaŋan me oina naon, meginge pifol daŋan me bala zaek melaendaŋan dusuzuai. 9Anut dal elon temami inan pifol wozaig ŋa ipanag. 10Pifol inan manag jabek saenlon ŋa ŋaenminge gout dauai me pifol bala zaek melaendaŋan, konkondaŋan, balabala mai fodinlak didusemeg ŋail. 11Meginge Anut inan eŋel i ienminlon paiag ibol, Jakob, ŋa ŋabol, Ŋa ie! 12I ibol, Oina mala bisap nasi, gout pifoldaŋan me bala zaek melaendaŋan, konkondaŋan, balabala mai fodinlak didusadime; kagin daŋan Laban owoi inauime me daŋan ŋenasilak. 13Ŋa Betel inan Anut, o pat gunig gazeŋ fonlak walilak, azu ta mai malik e paiaglak. Gazo umaispa fatu e binip oina mezaufatulon ula. 14Meginge Rahel Lea mai auan diabig dibol, Amnama mam inan panulon nama abaŋ ta fuzama ienime tat? 15Am i malanlon pain bas egin so atozame tat? I am idadge gaŋmalan amlon naon ŋalelak, amlon iŋalelak me bezaseimelak. 16Abaŋ daŋan Anut amnama mam wozailak me idinad, inad nanudgaz nadin mai. Mewoi azu tata Anut ipaolak me unau.
17Meginge Jakob imaisge inan nanungaz, inan iwon mai kamel fodinlak inau. 18Inan bulmakau dazuk daŋan i iŋallak, bulmakau i Paddan‐aramnen iŋalge inanlak me daŋan idauzig inan taman Isak izinnen Kanaan fatulon ile. 19Laban inan belelek fufuludin gusutawoi ilemeg Rahel i taman inan ab inan mazoztibud ponau ŋale. 20Me Jakob i Arameawain Laban se wozaig i bezazou iauwoi inauime me so ipai. 21I inan abaŋ daŋan bezaug iaumeg Eu‐frates daiag naon did fatu Gilead ilonnen ile.
Laban Jakob uzig ile
22Jakob iaulak me nal tollon Laban depai. 23I inan temalengaz iŋalge i maig ad sewen duzig sisizlon did fatu Gilead ilonnen ile. 24Ge tidomlon Anut Laban Arameawain ienminlon izinnen iseg ipai, Dab nau, Jakob azu gamun ilap azu salan mai so pai mon.
25Meginge Laban Jakob izinnen itase. Jakob i did fatulon tazas inaulak, me Laban inan temalengaz mai did fatu Gileadnen tazas denaug demadodime. 26Laban i Jakob ipai, O dodin unaug se wiziaglak, inag aipain me julon uŋallak egin udauzig alaame? 27Dodinge o se wiziagge kukumlon uwau, so paiagge ŋa zigiek kanamlon mai, gitar jukulele mailon kin so ŋunuog use? 28Dodinge o naog dal faleg ŋainag ai ŋainag aipain mai musuk kin so nipinidinlak? Gazo unaulak me gedagad. 29Ŋa ŋunuo alannen ŋaloŋ; ge noz tidom tama inan Anut ŋa mai ikibiailak, ibol, Dab nau, O Jakob azu gamun ilap azu salan so pai mon. 30Gazo o oina tama inan panuoi jaen sufutanolakoi binimag uselak, dodinge ŋainag mazoztibud ponau ŋalelak? 31Jakob Laban auan jabig ibol, Ŋa ŋazezlakoi, ŋa ŋabol o tiwo piziop oina aipain wiziagoi. 32Tata izinnen oina mazoztibud nasitap i imatoi. Amnama temalengaz malakmalaklon oina abaŋ ta nasitap ubolpa ŋale. Jakob Rahel i ponau ŋalelak me so iloŋ.
33Meginge Laban Jakob inan tazaslon, Lea inan tazaslon, painbegabeg azuazu nadin tazaslon mai iduleg i so nasi. I Lea inan tazaslonge Rahel inan tazaslon idule. 34Rahel i ab inan mazoztibud iŋalge kamel inan paus ilonnen inaug fodinlak matal. Laban tazas ilonnen aben daŋanlon idab lo tea. 35Rahel inan taman ipai, Ŋa o naonen ŋamaisnen so ŋaloŋlakoi inag ujanzen buzun so isa mon, pain inan muzuan me biaglak. Meginge i laŋaige inan ab inan mazoztibud so nasi.
36Meginge Jakob buzun isag Laban bebani. Jakob Laban ipai, Ŋainag zegaik abaŋte? Ŋainag aupasek abaŋtege o gik ubolge ŋiliag uzaglak? 37Ŋainag abaŋ daŋan sukulemeg o oina ab inan abaŋ abaŋte nasilak? Inag temaleggaz ina temalegaz mai liluŋlon unaup i id auzun liluŋlon azu detaliwoi. 38Umaz twenti elon ŋa o maig temadelak; oina belelek paiat gout paiat mai so dusuzuai debedani, oina pifol inan dauai ta so ŋanilak. 39Dazuk duguze detetazag depadallak me o so ŋepao, ŋa sibeg naon ŋenaulak. Adlon tidomlon tat ponau deŋalelak menen o izignen wolaul unaulak. 40Megin ŋemade; ad saenlon ad niniag, tidomlon malas funag wonoŋ so ŋabi gauai. 41Umaz twenti elon ŋa oina panulon ŋemade. Ŋa oina aipain azuazuoi umaz fourtin uzat ŋenaulak, oina pifoloi umaz siks, o inag uzat naon poalig tenge, 42ŋainag mam inan Anut, Abraham inan Anut, Isak inan Zoazuk i ŋa mai teape o niŋog mon noagpa ŋalape. Anut i ŋainag alan nimag inan uzat mai inasig noz tidomlon bebanolak.
Jakob Laban mai liluŋlon temaneknen denau
43Meginge Laban Jakob auan jabig ibol, Nanunpain me ŋainag nanugpain, aikamo me ŋainag aikamo, dazuk pifoldaŋan me ŋainag dazuk, abaŋ uwilume me daŋan ŋainag. Gazomnen bo inag nanugpain ewoi inadin nunudin me i denaulak iwoi mai dodin ŋenauwoi? 44Usoŋan, o ŋa mai temaneknen ta tenauwoi, me o ŋa mai liluŋlon sigianeknenoi. 45Mewoi Jakob pat ta ŋaleg gunig bagoz egin ien. 46Jakob inangaz ipidin, Pat ananepe. I pat diŋalge malan detemani. Malan dabinlon i anaŋ diani. 47Laban Jegar‐sahaduta iblani, Jakob i Galeed#31:47 sigianek iblani. 48Laban ibol, Malan e me gazomnen o ŋa mai liluŋlon sigianeknen. Mewoi i Galeed iblani. 49Pat guneklak me Mispa iblani. Laban ibollak, Id ibeniben temademap Ujanzen me o ŋa mai tizinadoi. 50O ŋainag aipain unau alantap, teap aipain demademap o pain ta mai uŋaltap, tamol ta so madop iloŋoi, ge ilo isou, Anut i o ŋa mai liluŋlon sigianeknen.
51Meginge Laban Jakob ipai, Malan e pat guneklak me ŋa o mai liluŋlon ŋenaulak me deleŋanipe. 52Malan e me sigianek, pat gunek mai sigianek ta, ŋa malan e so ŋodoloanip o izinen ŋalawoi, o mai so doloanip abaŋ alanoi izignen so ulawoi. 53Abraham inan Anut, Nahor inan Anut id tamadgaz nadin Anut mai id lilunlon abaŋ betenaewoi. Meginge Jakob i inan taman Isak inan Zoazuklon stemanek azu ibol. 54Jakob i didlak ja ta inaug inangaz sepalaŋ dianiwoi wigidin. I sepalaŋ dianig tidom melon didlak demademeg sesali.
55Laban bomon mon imaisge inan tibungaz aipain mai musuk pinidinge baz mai pinidin. Meginge imaisge idug inannen ile.
Currently Selected:
Genesis 31: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
