Genesis 33
33
Jakob Esau mai faun detemani
1Jakob inan malan biseg Esau tamol four hundert mai disemeg il. Meginge i nanungaz tezepaleg malan ibenibenlon Lea, Rahel, paindinek azuazu mai pinidin. 2Paindinek nadin nunudin mai malanlak inau, Lea inan nanungaz mai inaug i duzge demade, Rahel Josef mai wadan dufunati. 3I siben noadinnen imugseg tanlak takok sewenge ilemeg inan tain izinnen itase.
4Esau i mai naon tazetazewoi palug kadoi panig, jabig musuk panimeg ditadime. 5Esau malan biseg pain aikamo mai ilge ibol, E o maig amadoame me itgaz? Jakob ibol, Aikamo me Anut inan kanimlon oina begabeg panilak me. 6Meginge paindinek nadin nunudin mai sisizlon diseg tanlak detakok. 7Lea inan nanungaz mai megin mon sisizlon diseg tanlak detakok. Wadanlon Josef Rahel mai sisizlon diseg tanlak detakok. 8Esau ibol, Abaŋ malandaŋan ŋa mai naon tazetazelak me aitoi unaulak? Jakob auan jabig ibol, Ŋainag ujanzen ŋawoi kanim ŋalep panagoi. 9Ge Esau ibol, Taig ŋawoi iduseg ien, o daŋanlak me oina, so panag mon. 10Jakob ibol, Tea, ŋa ŋogodoano, o kanim ŋale panagtap o nimaglon zaiŋ ŋale; malik, nao nasinen me Anut naon naseknen egin, o megin kanimdaŋan izignen lo udulak. 11Ŋa ŋogodoano, ŋainag zaiŋ izinen diŋalge diselak me uŋalpe, Anut i kanim ŋale panagoi, ŋainag abaŋ iduseg diendime. I megin seseŋanig i iŋale.
12Meginge Esau ibol, Segauz tazeŋ tabip talawoi, ŋa o naonen ŋamugpa ŋalawoi. 13Ge Jakob ipaig ibol, Ŋainag ujanzen iloŋ aikamo me bodok, belelek pifoldaŋan, bulmakau malandaŋan mai nunudin su dipinidindime, mewoi dab ŋenau. Ad taimon gauz teseseŋanap tiwodin izoztap pifol daŋan dimatoi. 14Ŋainag ujanzen inan begabeg naonnen segauz imugpa ilawoi, me ŋa kinkin mon dazuk naognen dipazge diladime iwoi iduselak, aikamo nadin tazeŋoi iduselak egin ŋa tazeŋ ŋabip inag ujanzen izinnen Seirnen ŋatasap eginmap.
15Meginge Esau ibol, Ai taitai ŋa maig aselak me ŋepanop o maip alawoi. Ge i ibol, Abaŋtenen tat? Kanim mon ŋalep inag ujanzen malanlon ŋatozoi. 16Meginge Esau nal melon Seirnen imul. 17Ge Jakob i Sukkotnen ileg siben inan ab ta sase, inan bulmakauoi mai lealai inau; mewoi fatu me nean Sukkot.
18Jakob Paddan‐aramnenge gauai Kanaan fatulon Sekem panulon ise, men panu naonnen imade. 19Melak i Hamor inan ai Sekem inan tamangaz zidinnen tan melon i inan tazas inaulak, me i silwer boi won hundertlon idad. Melak i wiwa ta inaug El‐Elohe‐Israel#33:19 me Israel inan Anut iblani.
Currently Selected:
Genesis 33: GDD1960
Highlight
Share
Compare
Copy
Want to have your highlights saved across all your devices? Sign up or sign in
New Testament published by the British and Foreign Bible Society in 1960. Genesis published by the Australian Bible Society in 1971.
