मती 14
14
जोहन बतिसमा एएम वनीः के गोजेः देयाकु
(मरकुस 6:14–29; लूका 9:7–9)
1इमिन रे राजा हेरोदेस ता जोब ईसु रआ बबेत रे ओनावेताय, 2दो हेरोदेस ता अपन धंगोर के मेताःकुवाय, “नोंय बतिसमा एएम वनीः जोहन हेकेय, जे गोच वनकु रे ते जुवेत बिरीत एकानाय। इनाते उनी एते सोमोर्थ रआ कामि दिसतार वोःकाना।”
3 #
लूका 3:19,20 चिलिमेनचि हेरोदेस राजा ता अपन बोयहा, फिलिपुस रिई एरा हेरोदियास रआ चलते, जोहन के साप केते जेहेल ओड़ाः रे संजो इरीलेःकुवाय। 4#लेवी 18:16; 20:21जोहन हर घरीक हेरोदेस राजा के गामवाय केनाय, चि “हेरोदियास के दोहो आम के उचित बनुःआं।” 5हेरोदेस राजा ता जोहन के गोगोच कथिर वोःकेनाय, मुदा उनी होर एते बोरोय केनाय, चिलिमेनचि होर जोहन के परमेसर सोझ एते नधनी वनीः मनाः केनाकु।
6जोब हेरोदेस राजा रआ जनम हिलोः हेच्चेना दो हेरोदियास रिई होपोन तेः एरा ता हेरोदेस राजा अरो उनी रेन मेहमानकु रआ लहा एनेच केते हेरोदेस राजा के इमिनुः खुस एदेयाय, 7चि उनी किरया जोमकेते उनी जहन्नाः चहाःआय, उनी के एएम रआ करार एमाःदेयाय।
8होपोन एरा तेः के, एंगातेः ता पहिल गी सिखाव लेदेयाय। इनाते उनी मेताःदेयाय, “इञ के निमीः गी थाड़ा रे जोहन बतिसमा एएम वनीः रआ बोहोः एमाञमी।”
9हेरोदेस राजा दुखी एनाय, मुदा अपन किरया जोम रआ चलते, अरो मेहमानकु रआ चलते। हुकूम एमाःकुवाय चि एमायपे। 10अरो हेरोदेस राजा ता जेहेल ओड़ाः रे आचरेन धंगोर के कुल केते जोहन रआ बोहोः खंडा इरीवेःकुवाय, 11अरो उनी रआ बोहोः थाड़ा रे अगुवेताय अरो कुरी तके एमाःदेयाय, उना एंगातेः के इदी वदेयाय। 12तोब जोहन रेन चेलाकु हेच्चेनाकु अरो उनी रआ लास इदिकेते तोपा कताकु, अरो सेनकेते ईसु के खभेर एमाःदेयाकु।
पांच हजार एते ढेर होरकु के खियाव वेःकुवाय
(मरकुस 6:30–44; लूका 9:10–17; जोहन 6:1–14)
13जोब ईसु ता नुवां अयुम्मेताय दो उनी डोंगा रे देच केते ओन्डो एते एटाः सनसुन ठांव रे तोराया, दो होर अयुम केते चट्टी-चट्टी एते पयदल गी उनी रआ तयनोम एते हिजुः हेलावेनाकु। 14ईसु ता जोब डोंगा एते अरगुवेनाय दो बेचोट मरंग भीड़ नेलेःकुवाय, उनकु रे सोगावेनाय अरो उनकु हासु-दुकु इकु के बुगी वेःकुवाय।
15अरो जोब अयुप इदीःकेना, दो ईसु रेन चेलाकु ता उनी ठिनुः हेच केते गामवादेयाकु, “नुवां सनसुन ठांव हेके अरो देरीः काना, होर तके बिदा ककुवा चि उनकु हातु रे सेन केते अपन कथिर जोजोम अनाः किरीञ जोनाकु।”
16मुदा ईसु ता उनकु के जबाब एमाःकुवाय, “उनकु के सिनुः रआ दरकार बनुःआं! अपे गी नोंकु के जोजोम वनाः एमाकुपे।”
17उनकु ता ईसु के मेताःदेयाकु, “आले ठिनुः दो पांच गो पिठा अरो बरीया हाकु के बागी केते जहन्नाः बनुःआं।”
18ईसु ता गामवाःकुवाय, “उना नोन्डोइञ ठिनुः अगुइपे।” 19आर ईसु ता होरकु के घांस रे दुरुप कथिर मेताःकुवाय अरो उना पांच गो पिठा अरो बरीया हाकु के साप केते सिरमा सोझ नेल केते धेनयाबाद एताय, आर पिठा खेचाः केते चेलाकु के एमाःकुवाय अरो चेलाकु ता होरकु के एमाःकुवाकु। 20अरो सुबिन होर जोम केते बी एनाकु, सरेच अनाः खेचाः तेः, बारो खन्ची सरेच्चेना। 21अरो जोजोम इकु, एरा अरो होपोन के बगी केते, हेरेल एकला गी पांच हजार लगेभगे तहिकेनाकु।
ईसु रआ दाः रे सेसेन
(मरकुस 6:45–52; जोहन 6:15–21)
22ईसु भीड़ के बिदा कराव वते अपन चेलाकु के मेताःकुवाय, “एनेन गी डोंगा रे देचपे अरो इञ एते पहिल आना परोम सेनजोनपे।” 23भीड़ के बिदा तयोम उनी टोंगरी रे एकला गी पराथना कथिर तोराया, जोब अयुप्पेना, दो उनी ओन्डो एकला गी तहिकेनाय। 24इमिताः डोंगा ओते ठिनुः एते ढेर संगिञ तोराःआ इमिताः समुदर रआ लहरी एते डोंगा डगमागाव वोःहेलावेना, चिलिमेनचि लहा सोझ एते होयो हिजुःकेना।
25अरो ईसु ता निदा रआ तीन अरो छो बजे रआ ताला, समुदर रे सेनवाते उनकु ठिनुः हेच्चेनाय। 26चेलाकु ता उनी के समुदर चेतान रे सेसेन नेल केते बोरो वदेयाकु, अरो गापाम हेलावेनाकु चि “नोंय दो मुवां हेकेय!” अरो बोरोय एते कुर्री हेलावेनाकु।
27अरो एनेन गी ईसु ता उनकु लोः गापाम हेलावेनाय, “ढिड़ दोहोयपे इञ हेकेञ ओलोपे बोरोया!”
28पतरस ता ईसु के गामवादेयाय, “परभु, जदि आम गी हेकेम, रेदो इञ के आम ठिनुः दाः रे सेन इदी कथिर हुकूम एमाञमी।”
29ईसु ता मेताःदेयाय, “हिजुःमी!” तोब पतरस ता डोंगा एते अरगु केते ईसु ठिनुः दाः रे सेन इदिइ केनाय। 30मुदा आंधी ता नेल केते बोरो वनाय, अरो जोब डुबाः लगावेना दो कुर्री केते गामवादेयाय, “परभु, इञ के बनचाव एञमी!”
31ईसु ता एनेन गी ती रे साप टेकाव एदेयाय आर पतरस के गामवादेयाय, “ए अधबिसवासी, आम चिलिमेन संदेह एताम?”
32जोब उनकिन डोंगा रे देच एनाकिन दो होयो अटकावेना। 33इमिताः जे डोंगा रे तहिकेनाकु, उनकु डोंडोत केते गामवादेयाकु, “सच गी आम परमेसर रिई होपोन तेः हेरेल हेकेम।”
गनेसरत रे रोघा इकु के बुगी कुकानाय
(मरकुस 6:53–56)
34उनकु डोंगा एते परोम केते गनेसरत पोरदेस रे तेबाःएनाकु। 35ओन्डो रेन होरकु ता ईसु के चिनहाव एदेयाकु अरो आसे-पासे रआ सुबिन दिसुम रे खभेर कुल्लेना, अरो सुबिन हासु-दुकु के उनी ठिनुः अगु हेलावेनाकु, 36अरो उनी के गोहराव हेलावेनाकु, चि नोंकु के सिरीफ आम रआ किचरीः रआ मुडू तेः हों जोटेत इरिवाकुम। अरो जेतना होरकु जोटेत एताकु, उनकु सुबिन बुगिन एनाकु।
Currently Selected:
मती 14: BIY
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
