मती 15
15
पुरखाकु रआ रिति-रिवाज
(मरकुस 7:1–13)
1मुदा जरुसलेम चट्टी रेन फरीसी अरो धरम पोथी सिखाविकु ईसु ठिनुः हेचकेते कुली हेलावेनाकु। 2“आमरेन चेलाकु आले रेन मुधकु रआ रिति-रिवाज चिलिमेन काकु पालन काना? उनकु जोजोम एते पहिल, ती चिलिमेन काकु अबुंग वोःकाना?”
3ईसु ता जबाब एमाःकुवाय, “अपन रिति-रिवाज रआ चलते, अपे परमेसर रआ हुकूम चिलिमेन तोड़ाव कनापे? 4#उठ 20:12; नियम 5:16; उठ 21:17; लेवी 20:9चिलिमेनचि परमेसर दो गाम एकावाःपेयाय, ‘अपे अपन एंगा-आपु के माइन कुपे’ अरो ‘जहय अपन एंगा-आपु के कठिक मेता कुकानाकु, उनकु के गोगोच चही।’ 5मुदा अपे गाम कनापे, चि जदि जहय गी अपन आपु बङ रेदो एंगापे एते गाम्मापे चि, जहन्नाः गी अबेन के इञ एते फयदा तेबाः तहिकेना, ‘उना परमेसर के दान रकाप चुकावेना।’ 6इना लेका उनकु के अपन एंगा-आपु रआ माइन कराव रआ दरकार बनुःआं। नियां लेका अपे अपन रिति-रिवाज रआ चलते परमेसर रआ बचन अतोम कनापे। 7ए कपटाहाकु, अपे रआ बबेत रे जसायाह ता ठीक गी आगमजानी लाःआय। उनी गाम लाःआय
8 #
जसा 29:13
“‘नोकु होर मोचा तेदो इञ रआ माइन कनाकु,
मुदा नोकु रआ मोन इञ एते संगिञ तहीः काना।
9नोकु इञ रआ बेकार बिनती-पराथनाय कनाकु,
चिलिमेनचि उनकु रआ सिख सिरीफ होर रआ बाय अनाः नियम हेके।’”
घिन कराव वनाः गानाम
(मरकुस 7:14–23)
10ईसु ता होरकु के अपन ठिनुः होहोवेःकुवाय अरो उनकु के गामवाःकुवाय, “ओनावेपे आर सोमझाःपे चि 11मनवा रआ मोचा भीतरी, जे सिनुः काना, उना उनकु के काय असुध कुकानाय, बलकी उनकु रआ मोचा एते उडुङओः काना इनागी उनकु के असुध कुकानाय।”
12तोब ईसु रेन चेलाकु उनी ठिनुः हेच्चेनाकु, अरो मेताःदेयाकु, “चिलि आम के पता हेनाःआं चि आम रआ गानाम ता फरीसिकु ता ओनाव केते ठोकोरा जोम्मेताकु?”
13ईसु ता जबाब एमाःकुवाय, “जे गाछी इञ रिई सोवारगिये आबा ता काय रोवा एकाःआय, उना तुततियाय। 14#लूका 6:39उनकु के बागी ककुपे, उनकु दो अंधरा के होरा उदुः वन हेकेकु, मुदा खुद अकु गी अंधरा हेनाकुवा। जदि मिहोर अंधरा, एटाः अंधरा के होरा देखाव वायकानाय, दो उनकिन बनार गाड़हा रे उयुः कोःकानाकिन।”
15तोब पतरस ता ईसु के मेताःदेयाय, “नुवां कहनी ता आले के सोमझाव कलेम।”
16ईसु ता जबाब एमाःकुवाय, “चिलि अपे निमीः तक हों न सोमोझअपे? 17चिलि अपे कपे सोमझाःका चि जहन्नाः जहय रआ मोचा रे सिनुः काना, उना उनी रआ लहिच रे सिनुः काना अरो तयोम सोझ एते उडुङ जोनकाना? 18#मती 12:34मुदा जे मनवा रआ मोचा एते टांड़ी उडुङओः काना, उना उनकु रआ मोन एते उडुङओः काना। नियागी मनवाकु के असुध कुकानाय। 19चिलिमेनचि कठिक बिचार, गोगोच, साप-जोटेत, एटाः एरा-हेरेल रे मोहाः, कुमरु, झूठ अरो निन्दा लेकन सुबिन बुराय मोन एते गी उडुङओः काना। 20नियागी हेके, जेकर एते असुध कुकानाय। ती बिन अबुंग एते जोजोम जहय काकु अपबितर वोःकाना।”
गइर-जहुदी एरा रआ बिसवास
(मरकुस 7:24–30)
21अरो ईसु ता उना ठांव बगी केते सूर चट्टी अरो सयदा चट्टी सोझ चइल्लेताय। 22ओन्डो रिई मिहोर कनानी एरा हेच्चेनाय अरो कुर्री हेलावेनाय, “परभु दाऊद रिई होपोन तेः हेरेल, इञ रे दयायमी। इञ रिई होपोन एरा, मुवां रावा रआ चलते बेचोट कइल एकानाय।”
23ईसु ता उनी के मीः सबद हों काय गामवादेयाय, केते उनी रेन चेलाकु ईसु ठिनुः हेच्चेनाकु अरो गोहराव एदेयाकु, “नोय आले रआ तयोम कुर्री वते हिजुः कनाय, नोय के कुलकाय।”
24ईसु ता जबाब एमाःकुवाय, “इञ के सिरीफ इसराइल रेन घराना रेन आत वन भेड़िकु ठिनुः कुल एकानिञ।”
25तोब उनी एरा ता ईसु रआ बाका ठिनुः उकरुम डोंडोत केते गोहराव एदेयाय, “परभु, इञ के देंगाञमी!”
26जबाब रे ईसु ता मेताःदेयाय, “नुवां उचित बनुःआं चि होपोन रआ पिठा लेयकेते सेता रआ लाहारे गिड़ी बुगिन बनुःआं।”
27एरा ता गामवादेयाय, “हें परभु! रेहोंगी मुवार रआ टिबुल एते उयुः अनाः खेचाः गुंडा सेता जोम कन गियाकु।”
28इना रे ईसु ता जबाब एमाःदेयाय, “एरा! आम रआ बिसवास बेचोट बड़ेःआ। आम जे चहाः कनाम, पुराःका।” अरो इमिताः गी उनी रिई होपोन तेः एरा बुगी एनाय।
रकमे-रकम रेन रोघाकु के बुगी कराव
29ईसु ओन्डो एते चइल्लेताय अरो गलील पोरदेस रआ समुदर अतोम तेबाः केते मियाः टोंगरी रे रकाप एनाय अरो ओन्डो दुरुपेनाय। 30भीड़ के भीड़ उनी ठिनुः हिजुः हेलावेनाकु। उनकु लंगड़ा-लुलहा, अंधरा, कोंदा-बेहरा अरो बेचोट एते एटाः रोघा केहों अकु लोः अगु केते ईसु रआ लहा रे अगु दोहो वेःकुवाकु अरो ईसु उनकु के बुगी वेःकुवाय। 31बेहरा-कोंदा नाधनी कनाकु, लुलहा बुगीः कनाकु, लंगड़ा सेसेन कनाकु अरो अंधरा नेनेल कनाकु, होर नुवां नेल केते बेचोट चकरीत रे पोड़ावेनाकु अरो उनकु ता इसराइल रिई परमेसर रआ बड़ाय एताकु।
चाइर हजार होरकु के खियाव
(मरकुस 8:1–10)
32तोब ईसु ता चेलाकु के आच ठिनुः होहोवेःकुवाय अरो मेताःकुवाय, “इञ के नोकु भीड़ रे सोग हिजुःका, चिलिमेनचि नोंकु होर पेय हिलोः एते इञ लोः हेनाकुवा अरो नोकु ठिनुः जोजोम कथिर जहन्नाः हों बनुःआं। इञ नोकु के रेंगेच ते कुकूल कइञ चहाः काना। चिलिमेनचि होय सकाःका जहां ठिनुः उनकु थकाव केते होरा रिगी तहिजोनाकु।”
33तोब उनी रेन चेलाकु ता मेताःदेयाकु, “इमिनुः मरंग भीड़ कथिर नुवां सनसुन ठांव रे इमिनुः पिठा कारे एते नमुःआं?”
34तोब ईसु ता उनकु के कुलिवेःकुवाय, “अपे ठिनुः चिमिनोः पिठा मेनाःआं?” उनकु ता मेताःदेयाकु, “सात गो पिठा अरो हुडिञगन हुडिञ हाकु हेनाकुवा।”
35ईसु ता भीड़ के ओते रे दुरुप कथिर हुकूम एमाःकुवाय, 36अरो उना सात गो पिठा अरो हाकु के लेयकेते ईसु ता परमेसर के धेनयाबाद एमाःदेयाय। अरो पिठा ता खेचाः केते अरो हाकु तके खेचाः वेःकुवाय अरो अपन चेलाकु के एमाःकुवाय। अरो उनी रेन चेलाकु ता उनकु होर के हटिञ वाःकुवाकु। 37सुबिन होर जोम केते बी एनाकु अरो चेलाकु ता बनचाव वनाः खेचाः जवरा एताकु दो सात खन्ची होय्येना। 38जोजोम वनकु रे एते एराकु अरो होपोनकु के बगी केते चाइर हजार हेरेल तहिकेनाकु।
39ईसु ता होर के बिदा वेःकुवाय अरो उनकु डोंगा रे देचकेते मगदान दिसुम रआ सिमान रे हेच्चेनाकु।
Currently Selected:
मती 15: BIY
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
