मती 13
13
बिहेन हेहेर वनीः रआ कहनी
(मरकुस 4:1–9; लूका 8:4–8)
1इना हिलोः ईसु ओड़ाः एते उडुङ केते समुदर रआ अतोम सेनकेते दुरुपेनाय। 2#लूका 5:1–3अरो उनी ठिनुः नुंकन भीड़ जमा एनाकु, चि उनी डोंगा रे देच केते दुरुपेनाय अरो सुबिन भीड़ अतोम रे तिंगु तही एनाकु। 3ईसु ता उनकु के कहनी रे बेचोट गानाम गामवाःकुवाय। अरो उनी उनकु के मेताःकुवाय,
“मिहोर बिहेन हेहेर वनीः बिहेन हेहेर उडुङ एनाय। 4जोब उनी हेर एकेनाय दो आधा बिहेन होरा रआ अतोम रे उयुःएना। चेंड़े हेच्चेनाकु अरो उना बिहेन हलङ एताकु। 5आधा बिहेन रुगड़ी ओते रे उयुःएना, ओन्डो ढेर हसा का तहिकेना। उना एनेन गी ओमोनेना, चिलिमेनचि ओन्डो भोरपुर हसा का तहिकेना, 6मुदा जोब सिंगी बोंगा रकाप एनाय दो उना मुरझावेना अरो रेहेत काय साप दड़िवाताय इनाते रोहोड़ेना 7हुडिञगन बिहेन झुर रे उयुःएना अरो झुड़ ता हरा तोपा डबाव कताय, 8हुडिञगन बिहेन बुगिन ओते रे उयुःएना अरो बेढ़ियां फोल होय्येना। करा साव गुना, करा साठ गुना अरो करा तीस गुना।
9“जेकर लुतूर हेनाःआं, उनकु ओनाव केपे।”
कहनी रआ ओरोथ
(मरकुस 4:10–12; लूका 8:9–10)
10ईसु रेन चेलाकु ता हेच केते उनी के मेताःदेयाकु, “आम चिलिमेन कहनी रे सिख एमाकुकानाम?”
11ईसु ता जबाब एमाःकुवाय, “नुवां इनाते हेनाःआं चि सोवाराग राइज रआ भेद सारी कथिर सोमोझ अपे के एम एकाना, उनकु के बङा, 12#मती 25:29; मर 4:25; लूका 8:18; 19:26चिलिमेनचि जेकर ठिनुः जहन्नाः हेनाःआं, इनी किगी अरो एमायाय अरो उनी ठिनुः बेचोट होय कोःओ। मुदा जेकर ठिनुः जहन्नाः बनुःआं, उनी एते उना हों इदी केयाय, जे उनी ठिनुः हेनाःआं। 13इञ उनकु के कहनी रे सिख एमा कुकानिञ, चिलिमेनचि उनकु नेनेल रेहों काकु नेलकाना अरो ओनाव रेहों, ना दो ओनाव कनाकु अरो ना सोमझाः कनाकु। 14#जसा 6:9,10जसायाह नुवां आगमजानी लाःआय उना नोंकु रे पुरावेना,
“‘अपे ओनावियापे अरो ओनाव चित गी तहिनापे,
मुदा अपे रआ सोमोझ रे जहन्नाः हों का हिजुःआ,
अपे नेनेल चित गी तहिएनापे अरो अपे के जहन्नाः हों का सुझाःआ।
15चिलिमेनचि नोंकु होरकु रआ मोन मोटाना,
अरो उनकु काकु ओनाव चहाः काना,
उनकु ता अपन मेत जपित एकाःआकु।
बङ रेदो मेत एते नेल केते
लुतूर एते ओनाव केते
हिरदय एते सोमझाव केते
इञ सोझ मोन फिरावियाकु।
अरो इञ उनकु के बुगी कुञ।’
16 #
लूका 10:23,24 “धेनया हेनाःआं अपे रआ मेत चिलिमेनचि उना नेल कनाय, धेनयां हेनाःआं अपे रआ लुतूर चिलिमेनचि उना ओनाव कनाय! 17इञ अपे के सच गामवापे कनिञ चि जे गानाम अपे ओनाव कनापे उना नेनेल कथिर बेचोट एते परमेसर सोझ एते नधनी वनकु अरो धरमिकु नेनेल कथिर चहाः केनाकु। मुदा काकु नेल दड़िवाता। जे गानाम अपे ओनाव कनापे उना उनकु ओनाव कथिरोःकेनाकु मुदा काकु ओनाव दड़िवाता।
बिहेन हेहेर वनीः रआ कहनी रआ ओरोथ
(मरकुस 4:13–20; लूका 8:11–15)
18“निमीः अपे बिहेन हेहेर वनीः रआ कहनी रआ ओरोथ ओनावेपे। 19उना बिहेन जे होरा रआ अतोम रे उयुः केना, उना रआ ओरोथ हेके चि जोब जहय सोवाराग राइज रआ बुगिन खभेर ओनाव कनाकु, अरो उना काकु सोमझाः काना, तोब, जे उनी रआ मोन रे हेर केना, उना कुचड़ सयतान हेच केते रेच इदी केकानाय। 20अरो जे रुगड़ी ओते रे हेर केना, उना नुवां हेके जे बचन अयुम केते एनेन गी आनाद एते मनाव कोःकनाय। 21मुदा अपन रे रेहेत काय साप रआ चलते उनी थोड़ दिन रिई हेकेय अरो जोब बचन रआ चलते कोसोट चहे सताव होयुः काना, दो एनेन गी ठोकोरा जोम कनाकु। 22जे झुड़ रे हेर केना, नुवां उना हेके, जे बचन ता ओनाव कनाकु, मुदा नियां दुनिया रआ चिन्ता अरो धन रआ लोभ गी बचन तके दबाव काय कनाय अरो उनी फोल काय अगु दड़िवाकानाय। 23जे बुगिन ओते रे हेर केना, नुवां उना हेके, जे बचन ता अयुम केते सोमझाव कोःकानाय अरो फोल अगुइ कनाय, जहय साव गुना, जहय साठ गुना अरो जहय तीस गुना।”
बुरु बिहेन रआ कहनी
24ईसु ता उनकु के अरो मियाः कहनी ओनाव वाःकुवाय, “सोवाराग राइज उनी होर लेका हेनाःआं जे अपन खेत रे बुगिन बिहेन हेर लाःआय। 25मुदा जोब होर गितीच केनाकु रे उनी रिई बइरी हेच्चेनाय, अरो हेर गोहोम रे, बुरु बिहेन हेर केते तोराया। 26जोब गोहोम ओमोन उडुङएना, अरो उना रे गेले एना, दो बुरु बिहेन हों नेलुः हेलावेना। 27तोब खेत रिई मुवार ठिनुः हेच केते उनी रेन बन्धुवा ता मेताःदेयाकु, ‘मुवार, आम ता खेत रे बुगिन बिहेन कम हेर लाःआ? दो नुवां बुरु बिहेन कारे एते हेच्चेना?’ 28तोब उनी ता उनकु के मेताःकुवाय, ‘नुवां जहय बइरी रआ कामि हेके।’ उनी रेन बन्धुवा ता उनी एते कुलिएदेयाकु, ‘चिलि आम चहाः कनाम चि आले सेनकेते बुरु बिहेन ता तुत काःआले?’ 29उनी मेताःकुवाय, ‘बङा, चिलिमेनचि जोब अपे बुरु बिहेन रआ बुदा तुतियापे दो उना लोः, गोहोम हों तुत एरावियापे। 30कटनी तक बनार मिसाते हरा इरीवापे, अरो कटनी रआ समेय इञ इइर वन के गाम वकुविञ, चि पहिल बुरु बिहेन रआ बुदा अलग जमायपे अरो उना सेंगेल रे ओन्डोर कपे, अरो गोहोम ता इदिकेते इञ रआ कोठा रे दोहो कापे।’”
राय रआ बिहेन रआ कहनी
(मरकुस 4:30–32; लूका 13:18–19)
31ईसु ता उनकु के अरो मियाः कहनी ओनाव वाःकुवाय, “सोवाराग रआ राइज, राय रआ मियाः दाना रआ बराबोइर हेनाःआं, राय दाना ता जहय मनवा ता इदिकेते अपन खेत रे हेर कताय। 32उना सुबिन बिहेन एते हुडिञ होयुः काना, मुदा जोब हरा कोःकाना, तोब बगान रे जेतना आड़ाः-सेकाम हेर अनाः, उना सुबिन दाड़ु बाय कोःकाना, अरो सिरमा रेन चेंड़े हेच केते उना रआ डइर रे डेराय कनाकु।”
पिठा मोमो नाः जिनिस रआ कहनी
(लूका 13:20–21)
33ईसु ता उनकु के अरो मियाः कहनी ओनाव वाःकुवाय, “सोवाराग रआ राइज उना पिठा मोमो नाः जिनिस लेका हेनाःआं, उना इदिकेते जहय एरा ता पेय पसेरी#13:33 मीः पसेरी तीन किलो रआ बराबोइर होयुःकाना। आटा रे सुवेत कताय, आर सुबिन आटा मो केते जोजो कोःकाना।”
कहनी रआ परयोग
(मरकुस 4:33–34)
34नुवां सुबिन गानाम ईसु ता कहनी एते होर के मेताःकुवाय अरो बिन कहनी एते उनी उनकु के जहन्नाः हों काय मेताकुकन केनाय, 35#सिरिञ 78:2चि जे बचन परमेसर सोझ एते नधनी वनीः रआ दोवासते गाम केना, उना पुराव वोःका, परमेसर ता मेताःकुवाय,
“इञ कहनी गागाम कथिर अपन मोचा रड़ायिञ,
इञ उना गानाम ता जे दुनिया रे उपनेग एते उकु केना, उना उदुः वकुविञ।”
बुरु बिहेन रआ कहनी रआ ओरोथ
36तोब ईसु भीड़ के बिदा केते ओड़ाः रे हेच्चेनाय, अरो उनी रेन चेलाकु ता हेच केते मेताःदेयाकु, “खेत रआ बुरु बिहेन रआ कहनी आले के सोमझावलेम।”
37ईसु जबाब एमाःकुवाय, “जे ता बुगिन बिहेन हेर लाःआय, उनी हेकेय मनवा रिई होपोन हेरेल। 38अरो खेत नुवां दुनिया हेके। बुगिन बिहेन रआ ओरोथ हेके, सोवाराग राइज रेन होर। बुरु बिहेन रआ ओरोथ हेके, उनकु होर जे मुवां रावा रेन होपोन हेकेकु। 39उनी बइरी, जे बुरु बिहेन हेर कनाय उनी सयतान हेकेय, अरो कटनी समेय, नुवां दुनिया रआ मुडूः हेके, अरो कटनी कराव वनीः सोवारागदूत हेकेय। 40अरो जे लेका बुरु बिहेन हविर कनाकु अरो ओन्डोर कनाकु, इनकागी दुनिया ता मुडूः आरे होयुःआ। 41मनवा रिई होपोन तेः हेरेल सोवारागदूतकु के कुलकुवाय, अरो उनकु उनी रआ राइज एते सुबिन ठोकोरा एएम वनकु के अरो अधरम करावेकु के जमा कुवाय, 42अरो उनकु के सेंगेल रआ भठा रे संजोकुवाय, ओन्डो उनकु इयाम अरो डाटा किटकिटावियाकु। 43इमिन रे धरमी होरकु, आपु रआ राइज रे सिंगी बोंगा लेका चमकाव ओ:ओकु। जेकर लुतूर हेनाःआं उनकु ओनाव केपे।
उकु वनाः खजाना रआ कहनी
44“सोवाराग रआ राइज, खेत रे उकु वनाः धन लेका हेनाःआं, उना जहय मनवा ता नम्मेताय अरो उना एंडेगी तोपा कताय। उनी इमिनुः खुस एनाय चि जहन्नाः हों, उनी ठिनुः तहिकेना, अखरीञ कताय, अरो उना खेत किरीञ वनाय।
अनमोल मोति रआ कहनी
45“सोवाराग रआ राइज, मिहोर नुंकन बेवपारी लेका हेनाःआं, जे बुगिन मोति रआ दंड़ा रे हेनाया। 46जोब उनी के मियाः अनमोल मोति नाम्मेना दो सेन केते जहन्नाः उनी ठिनुः तहिकेना उना अखरीञ एताय, अरो मोति किरीञ वनाय।
झाली रआ कहनी
47“अरो सोवाराग राइज, समुदर रे ओडाव वनाः झाली लेका हेनाःआं, जे रकमे-रकम रेन हाकु सेरयाव अगु कुकानाय। 48अरो जोब झाली पेड़ेच कोःकाना दो मछुवा उना झाली अतोम रे ओर अगुइ कनाकु, अरो दुरुप केते बुगिन-बुगिन हाकु केदो ढोठी रे जमा कुकानाकु, अरो कठिक-कठिक केदो गिड़ी काकु कनाकु। 49दुनिया रआ मुडूः रे निंकागी होयुःआ, सोवारागदूतकु हेच केते कुचड़कु के धरमिकु एते सला कुवाय, 50अरो पापिकु के सेंगेल रआ भठा रे संजोकुवाय। ओन्डो उनकु इयाम अरो डाटा किटकिटावियाकु।
मरी अरो नवां सिख रआ महत्वा
51“चिलि अपे नुवां सुबिन गानाम रआ ओरोथ सोमझावेनापे?”
उनकु ता ईसु के मेताःदेयाकु, “हें”।
52ईसु ता उनकु के मेताःकुवाय, “इनाते हरेक धरम पोथी सिखाविकु, जे सोवाराग राइज रआ सिख नाम एकाःआकु, उनी खेतयार लेका हेनाकुवा, जे अपन कोठा एते नवां अरो मरी जिनिस उडुङ कनाय।”
नासरत रे ईसु के बेमाइन
(मरकुस 6:1–6; लूका 4:16–30)
53जोब ईसु नुवां सुबिन गानाम ता कहनी रे गाम चुकाव केते ओन्डो एते तोराया 54अरो अपन चट्टी रे हेच्चेनाय अरो उनी जहुदी बिनती ओड़ाः रे सिख एएम एटेच एताय। इना रे सुबिन होर चकरीत रे पोड़ाव केते गापाम हेलावेनाकु, “नोंय के नुंकन गेयान अरो सोमोर्थ रआ कामि कारे एते नम्मेना? 55चिलि नोंय उनी बड़हाय गिरी रिई होपोन तेः हेरेल दो बङ कनीः? चिलि उनी रिई एंगातेः रआ लुतूम मरियम बङ हेके? जाकूब, जुसूफ, सिमोन अरो जहुदा नेकु रिई बोयहा बङ हेकेय? 56चिलि नोंय रेन सुबिन मिसी तेः अबु रआ ताला रे बनुःकुवा? दो नोंय के नुवां सुबिन कारे एते नाम्मेना।” 57#जोह 4:44नियां रे उनकु ता ईसु रआ चलते ठोकोरा जोम्मेताकु।
रेहों ईसु ता मेताःकुवाय, “जहय परमेसर सोझ एते नधनी वनीः के, अपन हातु अरो ओड़ाः ता बगी केते, सुबिन माइन एय कनाकु।” 58उनकु रआ अबिसवास रआ चलते ईसु ओन्डो ढेर सोमोर्थ कामि काय कराव लाःआय।
Currently Selected:
मती 13: BIY
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
