मती 12

जिराः हिलोः रिई परभु

(मरकुस 2:23–28; लूका 6:1–5)

1 # नियम 23:25 इमिन रे ईसु जिराः हिलोः खेत होरा एते होयकेते सिनुः केनाय, अरो उनी रेन चेलाकु के रेंगेच वेःकुवा दो उनकु गोहोम गेले टोकेच केते मेयसाव-मेयसाव जोम इदिइ केनाकु। 2नुवां नेल केते फरीसिकु ता ईसु के मेताःदेयाकु, “नेलमी, जे कामि जिराः हिलोः उचित बनुःआं, आमरेन चेलाकु इनागी कराव कनाकु।”

3 # 1 समु 21:1–6 ईसु ता उनकु के मेताःकुवाय, “चिलि अपे नुवां कपे पोड़हावेकाना चि जोब दाऊद अरो उनी रेन गाति के रेंगेच वेःकुवा, दो दाऊद ता चिलि लाःआय? 4#लेवी 24:9दाऊद चिलका परमेसर रआ ओड़ाः रे तोराया अरो दान रकाप अनाः पिठा इदिकेते जोम्‍मेताय। नुवां पिठा जाजककु के बागी केते जहय केहों जोजोम रआ उचित का तहिकेना। अरो पिठा ता खुद जोम लाःआय अरो गातिकु तेः केहों एमाःकुकेनाय। 5#लेखा 28:9,10अरो चिलि अपे ता मूसा रआ नियम रे नुवां कपे पोड़हाव एकाना चि जाजककु मरंग बिनती ओड़ाः रे जिराः हिलोः रआ नियम दो तोड़ाव कनाकु, मुदा दोसी काकु ठहराः काना? 6इञ अपे के गामवापे कनिञ, नोन्डो उनी हेनाया, जे मरंग बिनती ओड़ाः एते हों महान हेनाया। 7#मती 9:13; होसे 6:6‘इञ बलिदान काइञ चहाः काना, मुदा दया चहाः कनिञ।’ जदि अपे नियां रआ ओरोथ सोमझाव लेन रेदोपे होनङ, निरदोस के दोसी कपे ठहराविया होनङ, 8चिलिमेनचि मनवा रिई होपोन तेः हेरेल जिराः हिलोः रिई हों परभु हेकेय।”

सोपोच ती वनीः मनवा के बुगी कराव

(मरकुस 3:1–6; लूका 6:6–11)

9अरो उनी ओन्डो एते चइल्‍लेताय अरो जहुदी बिनती ओड़ाः रे तेबाःएनाय। 10ओन्डो मिहोर होर तहिकेनाय, जेकर ती सोपोच तहिकेना। होर ता ईसु के कुलिएदेयाकु, “मूसा रआ नियम रआ मोताबिक जिराः हिलोः जहय के बुगी कराव, चिलि उचित हेनाःआं?” उनकु ता ईसु के नुवां इनाते कुलिएदेयाकु चि उनकु उनी रे दोस लगाव दड़िवाःआकु।

11 # लूका 14:5 ईसु ता उनकु के जबाब एमाःकुवाय, “जदि अपे ठिनुः मियाः भेड़ी हेनाया अरो उनी जिराः हिलोः गाड़हा रे उयुःकोः रेदोय अपे रे एते ओकोय हेनाया, जे उनी के साप केते काय उडुङ इयाय? 12मनवा दो भेड़ी एते ढेर किमती हेनाया। इनाते जिराः हिलोः भलाय कराव उचित हेनाःआं।” 13तोब ईसु ता उनी मनवा के गामवादेयाय, “अपन ती जिलिंगएम।”

उनी अपन ती जिलिंग एताय अरो सोपोच ती ता एटाः ती लेका बुगिन एना। 14इना रे फरीसिकु ता टांड़ी उडुङ केते ईसु रआ बिरोध रे अकु-अकु रे सलाह-बिचार एकेनाकु चि अबु कारा लेका, ईसु के गोजेयाबुन।

परमेसर रिई सला वनीः धंगोर

15ईसु नुवां सारी केते ओन्डो एते तोराया। बेचोट एते होर ईसु रआ तयोम सेसेन हेलावेनाकु, उनी सुबिन होर के बुगी वेःकुवाय, 16अरो उनकु के चेतोवन एमाःकुवाय चि इञ रआ लुतूम ओलोपे फयलाविया, 17ताकि जे बचन जसायाह परमेसर सोझ एते नधनी वनीः रआ दोवासते गाम केना, उना पुराव वोःका।

18 # जसा 42:1–4 “नेलेयपे नोंय इञ रिई धंगोर हेकेय,

नोंय के इञ सला एकाःदिञ इञ रिई दुलारा हेकेय,

इञ नोंय एते बेचोट खुसिञ। इञ नोंय के अपन रावा एमायिञ अरो नोंय गइर-जहुदिकु रे नेयाय रआ परचार इयाय।

19उनी ना झागरा कुवाय अरो ना कुर्रीयाय,

अरो ना बाजार रे जहय उनी रआ उसुल राव एते परचार अनाः ओनावियाकु।

20उनी कोमजोर ढोड़ही घांस काय टोकेच इयाय,

अरो इड़िच वोःआनाः सेड़ता हों काय इड़िच इयाय,

जोब तक नेयाय, बिजय काय नाम केका।

21उनी रआ लुतूम एते गइर-जहुदी आसरा दोहोयाकु।”

ईसु अरो बालजबूल सयतान

(मरकुस 3:20–30; लूका 11:14–23; 12:10)

22अरो ईसु ठिनुः होर मिहोर नुंकन अंधरा के अगुवेदेयाकु जे कोंदा हों तहिकेनाय, चिलिमेनचि उनी रे मुवां रावाकु तहिकेना। ईसु ता उनी के बुगी एदेयाय अरो उनी कोंदा अंधरा गापाम आर नेनेल हेलावेनाय। 23इना रे सुबिन होर ता चकरीत एनाकु अरो उनकु गापाम हेलावेनाकु, “चिलि नोंय होर दाऊद रिई होपोन हेरेल होय सकाः कनाय?”

24 # मती 9:34; 10:25 जोब फरीसिकु ता नुवां अयुम केते गापाम हेलावेनाकु, “नोंय मुवां रावाकु रिई सरदार बालजबूल#12:24 बालजबूल नोंय मुवां रावाकु रेन सरदार “सयतान” रआ लुतूम हेके। रआ देंगा ते उडुङ कुकानाय।”

25ईसु ता उनकु रआ मोन रआ गानाम सारी केते उनकु एते गामवाःकुवाय, “जे राइज रे फूट होयुःका, उना राइज तहस-नहस कोःकाना अरो जहन चट्टी चहे ओड़ाः जेकर रे फुट होयुः काना, बाय का तहिनोःओ। 26अरो जदि सयतान गी सयतान के उडुङ इयाय, दो उनी अपन गी बिरोधी होय्येनाय, दो अरो उनी रआ राइज चिलका बाय तहिनोःओ। 27जदि इञ बालजबूल रआ देंगा एते मुवां रावाकु के उडुङ कुकानिञ, दो अपे रेन चेलाकु ओकोय रआ देंगा एते उडुङ कुकानाकु? इनाते उनकु गी अपे के नेयाय पेयाकु। 28जदि इञ परमेसर रआ रावा रआ देंगा एते मुवां रावा के उडुङ कुकानिञ, दो परमेसर रआ राइज अपे हेनात हेच तेबाः एकाना।

29“जोब तक मिहोर बोलगार रआ ओड़ाः रे बोलो केते उनी के काकु तोल केया, तोब तक उनी रआ ओड़ाः रआ जहन सामान काकु रेच दड़िवाःआ, उनी के तोल तयोम गी उनी रआ ओड़ाः रआ सामान रेच दड़िवाःआकु।

30 # मर 9:40 “जे इञ लोः बनुःकुवा, उनकु इञ रआ खोनोस रे हेनाकुवा अरो इञ लोः काकु हविर काना, उनकु छितराव कनाकु। 31इनाते इञ अपे के गामवापे कनिञ चि, मनवा रआ सुबिन रकम रआ पाप आर परमेसर रआ निन्दा छमा नोःओ, मुदा पबितर रावा रआ निंदा का छमा नोःओ। 32#लूका 12:10जहय मनवा, मनवा रिई होपोन तेः हेरेल रआ बिरोध रे जहन गानाम गाम्‍माय, उनी रआ गुनाह छमा नोःओ, मुदा जे पबितर रावा रआ बिरोध रे जहन्‍नाः गाम्‍माय, उनी रआ गुनाह ना दो नियां जुग रे अरो ना हिजुः अनाः जुग रे छमा नोःओ।

दाड़ु अरो उना रआ जो

(लूका 6:43–45)

33 # मती 7:20; लूका 6:44 “अगर बुगिन दाड़ु रोवाय रेदोपे बुगिन जो, जो नोःओ अरो कठिक दाड़ु रोवाय रेदोपे कठिक जो, जो नो:ओ, चिलिमेनचि दाड़ु अपन जो तिगी चिनहाः काना। 34#मती 3:7; 23:33; लूका 3:7; मती 15:18; लूका 6:45ए बिञ रेन होपोन, अपे कठिक होय केते बुगिन गानाम कपे गाम दड़िवाःआ? चिलिमेनचि जे मोन रे पेड़ेच एकाना, इनागी मोचा एते उडुङओः काना। 35मिहोर बुगिन मनवा, जे बुगिन गानाम उनी रआ मोन रे जमा एकाना, इना रे एते गी बुगिन गानाम उडुङ कनाय। जोब मिहोर कठिक मनवा, जे बुराय उनी रआ मोन रे हेनाःआं, इना रे एते गी कठिक-कठिक गानाम उडुङ कनाय।

36“मुदा इञ अपे के गामवापे कनिञ चि नेयाय रआ हिलोः मनवाकु रआ अपन हर निकाम्मा गानाम रआ लेखा एएम पोड़ाव वोःओ, 37चिलिमेनचि अपे के अपन गानाम एते गी निरदोस चहे दोसी ठहरावपेयाय।”

सोवारगिये चिनहा रआ मांग

(मरकुस 8:11–12; लूका 11:29–32)

38 # मती 16:1; मर 8:11; लूका 11:16 इमिन रे थोड़गन धरम पोथी सिखाविकु अरो फरीसिकु ता ईसु के मेताःदेयाकु, “गुरु, आले आम एते जहन चिनहा नेनेल चहाः कनाले।”

39 # मती 16:4; मर 8:12 जबाब एम वते ईसु ता मेताःकुवाय, “नियां जुग रेन कठिक होर अरो परमेसर के काकु मनाव होर गी चकरीत कामि रआ चिनहा नेनेल चहाः कनाकु। परमेसर सोझ एते नधनी वनीः जोना रआ चकरीत कामि रआ चिनहा बगी केते, उनकु के अरो जहन चकरीत कामि रआ चिनहा का एमुःआं।” 40#जोना 1:17अरो जोना पेय निदा अरो पेय सिंगी हाकु रआ लहिच रे तहिएनाय, इनका गी मनवा रिई होपोन तेः हेरेल हों पेय निदा अरो पेय सिंगी ओते रआ भीतरी रे तहिनोःओय। 41#जोना 3:5नेयाय रआ हिलोः नीनवे रेन होर नियां पीढ़ी रेन लोः तिंगु केते उनकु के दोसी ठहराव कुवाकु, चिलिमेनचि उनकु ता जोना रआ परचार ओनाव केते मोन रुवाड़ एताकु अरो नेलपे, नोन्डो उनी हेनाया जे जोना एते हों किमती हेनाया। 42#1 राजा 10:1–10; 2 इति 9:1–12नेयाय रआ हिलोः दछिन रिई रानी नियां पीढ़ी रेन होरकु लोः तिंगु केते नोंकु के दोसी ठहरावकुवाय, चिलिमेनचि उनी सुलेमान रआ गेयान ओनाव कथिर ओते रआ अतोम एते हेच्‍चेनाय आर नेलेयपे, नोन्डो उनी हेनाया जे सुलेमान एते हों किमती हेनाया।

मुवां रावा रआ दोबोरा हिजुः

(लूका 11:24–26)

43“जोब घिन रावा मनवा रे एते उडुङ कोःकनाय, दो सनसुन ठांव रे तहीः कथिर दंड़ा बेराय कनाय अरो जोब काय नामकन रेदोय गामकानाय, इञ अपन उना मरी ओड़ाः रे जे ठिनुः एते उडुङ किनिञ रुवाड़ जोनिञ। अरो हेचकेते झाड़ा-बुहारा अरो साजाव धजाव नाम कनाय। 44तोब मुवां रावा ता गाम कनाय, ‘जे ओड़ाः एते इञ हेच किनिञ, इना ओड़ाः रिगी रुवाड़ जोनिञ’ अरो जोब उनी रुवाड़ हिजुः कनाय दो अजवार, साफ सुथरा अरो सजाव-सिंगराव नाम कनाय। 45तोब उनी सेनकेते अपन एते हों सात गो मुवां रावाकु के आच लोः लेयकेते हिजुःकाय, अरो उनकु उनी रे बोलो केते बोसाव जोन कनाकु, नियां लेका उनी मनवा रआ तयोम दसा पहिल एतेहों अरो कठिक कोःकाना। तिहिञ-गापा रेन कठिक जुग रेन होर रआ दसा हों निंकागी होयुःआ।”

ईसु रिई एंगातेः अरो बोयहाकु

(मरकुस 3:31–35; लूका 8:19–21)

46ईसु भीड़ लोः नाधनी केन गियाय रिगी, उनी रिई एंगातेः अरो बोयहा ओन्डो हेच केते टांड़ी रे तिंगु एनाकु। उनकु उनी एते नाधनी कथिर वोः केनाकु। 47जहय ता ईसु के मेताःदेयाकु, “अयुम्‍मी, आम रिई एंगाम अरो बोयहा टांड़ी रे तिंगु एकानाकु अरो आम एते नाधनी गापाम चहाः कनाकु।”

48ईसु ता उनी के मेताःदेयाय, “ओकोय हेकेय इञ रिई एंगाञ? अरो ओकोय ता हेकेकु इञ रेन बोयहा?” 49अरो ईसु ता ती एते अपन चेलाकु के इसारा एम केते मेताःकुवाय, “नोंकु कनकु इञ रेन एंगाञ अरो इञ रेन बोयहा। 50जे इञ रिई सोवारगिये आबा रआ हिछा पुराव कनाकु, इनकुगी इञ रेन बोयहा अरो मिसी अरो इञ रेन एंगाञ हेकेकु।”

Currently Selected:

मती 12: BIY

Highlight

Compare

Copy