GEN 9
9
Deusu heke Aki Atapügü Tüipügü Noe ake
1Hekite leha Noe tüilü Deusu heke tülimo ake, nügüha iheke: "Tetijiha eitsüe, epünetüeha, ehigükuẽgükope agakutegomi atsange tatute ngongo ahi. 2Tatute leha ngeneko inhümingo einhakugulani. Tatuteha ngeneko gehujalüko, tatuteha toloko, tatuteha ngeneko tuhugu talahitsinhüko ngongoho, tatute gehale kangako epüngüngijüingo tuhugu leha einhani. 3Tatuteha tingugingo tuhugu tühülinhüko inhümingo tuhugu leha einhangokoi. Ngata tundühügüpea gehaleha uheke einhani, ãde leha tatute ngiko tundagü uheke einhani ngeneko tuhugu, ngata tuhugu la.
4Kegetinhambato hüle atsange ungui, ege agageha tüigote ehekeni, tingugingo agage geleha egei tengetagü ehekeni. 5Inhalütse mukeha tulemila ukugeko ungugu hapijüingoi. Egea leha tatinhüpe itamikümingo uheke, tatute geleha ukugeko heke angini egote ngeneko heke gehale, üngelepe itamikümingo leha uheke.
6Ukuge tüilüha uheke uganingo,
üle ateheha angini heke ukuge ungugu hapisote,
üngelepe ungugu hapijüingo gehale leha ukuge heke.
7Tetijiha eitsüe, ehigükuẽgükope agakutegomi tatute ngongo ahi", ta leha iheke Noe heke.
8Deusu kilüha Noe heke ijimo heke gehale: 9"Ãdeha uakisü atalüingo akeha elimo ake gehale, ehigükuẽgükoingo inha gehale itsomi, 10tatute gehale tingugingoko akongoko: tolokoha, ngeneko tuhugu tinkgukinhüko, ngeneko gehale gehujalüko, tatuteha ehu kuẽgü atalüpenginhe tihatinhükope akeni, tatuteha tingugingoko ngongohongoko inhaha. 11Aki atalü tüilüha uheke akeha elimo ake gehale: Inhalü muke leha ami tatute tingugingokope imbükilüingotsei uheke kahujü kuẽgüki. Inhalü leha ami kahujü kuẽgü tüilüingotsei uheke ngongope imbükitohoi".
12-13Deusu kilü geleha: "Konto hukugu tüipügüha igei uheke kahüa, uakisü atalü uhutohondetohoiha egei inhümingo akeniha, tatute gehale tingugingo ngongohongoko ake. Igeha aki atapügü inhümingo tatuteha tankginhükoingo inha gehale. 14Kongoho ngingilü tüigoteha uheke ngongoho, konto hukugu apakigoteha itsae, 15ülepei leha uakisü atapügüpe ingunkgingikümingoha uheke ukipügü ehekeni tatute gehale tingugingoko heke. Inhalüma ami leha kahujü kuẽgü inhümingotsei tatuteha tetsua tuhugu tingugingokope imbükitohoi. 16Tipaki geleha konto hukugu itsote kongoho huja, ingigote leha uheke aki atapügü tapüngui tüipügü uheke tatute ngongoho tingugingoko ake ingukgingikümingo leha uheke.
17Aitsükü gehale Deusu kilü Noe heke: "Konto hukuguha igei aki atapügü uhutohoiha ungüipügü tatuteha tingugingoko ngongohongoko ake", Deusu kilü leha Noe heke.
Noe Tülimo ake
18Noe limo ihatilü leha ehu kuẽgü atalüpenginhe, Sẽiha, Kamüha Jafe gehale. Kamüha ekisei Kanahã apa. 19Akagoha tilakongoko tütenhükoi Noe limoi. Ünagoha uãke tatuteha ukugeko ngaũpügükuẽgüi tütenhükoi tagakutenhükoi gehale ngongo ahi.
20Noeha ekisei tüngataginhüpe, hotuguiha ekisei uva itenimbüngüpe. 21Egetaha uãke Noe heke kaküngi vinho ilijü, sijigüi leha inhügü, tingükila leha inhügü ketuãdetoho#9.21 Ketuãdetohoha egei ngene hijope aheĩpügü kuãi itsomi. ata. 22Kanahã apaha Kamü, enügü leha tũü etuandepügü atati. Tũü ingilü leha iheke tingükila, etelü leha ihatigi tühinhahono inha. 23Ülepei leha Sẽi heke pano inügü Jafe ake, tutupulugukoi leha tüilü ihekeni tuãkoi, enünkgo leha tũüko etuandepügü atati, etinenünkgo leha tühüluko heke tünkgahinheni, tũüko ingitüingiha ihekeni tingükila. Ülepei leha tũüko uãdelü ihekeni panoki.
24Noe hakigote leha, etimbatühügüpenginhe, imugu aküpügüko Kamü heke leha egea tingükila tũü ingipügü ihatühügü uhunügü leha iheke tühisũüdão inha. 25Ülepei leha Noe kilü:
"Hesinhüiha leha eitse Kanahã.
Aitsükü leha itsatsuingo tühisũüdão inhakugula ngingokui,
tühisũüdão huja leha
inhümingo tüengikonkgila hekuguha jatsitsüi", nügü leha iheke Kanahã heke.
26Ülepeiha Noe kilü gehaleha aitsükü:
"Hekiteha tihati eitse KUKANETÜGÜ,
Sẽi Deususüha.
Kanahã itsaiha inhakugula inhingokugui.
27Deusu hekeha Jafe ngongogu hünetai.
Jafe higükuẽgükope egitundetaiha Sẽi higükuẽgükope ake geleha,
Kanahã itsai gehale Jafe inhakugula inhingokugui", ta leha iheke tülimo kae.
28Kahujü kuẽgüpe nginheha, Noe inhünu geleha aitsükü 350i sisũanügü. 29Noe apüngu leha uãke 950i sisũandühügü atai.
Currently Selected:
GEN 9: KUI-BIBLE
Highlight
Copy
Compare
Share
Want to have your highlights saved across all your devices? Sign up or sign in
© Associação Linguistica Evangélica Missionária
