GEN 10

Noe Limo Higü Kuẽgükope

1Kahujü kuẽgüpe nginheha Noe limope etijilüha, Sẽiha, Kamüha Jafe gehale. Ihigükuẽgükope ititüha igei.

Jafe Higükuẽgükopeha

2Jafe limo ititüpeha igei:

Hotuguiha Gome, ülepe nginheha Magoge, ülepe nginheha Mada, ülepe nginheha Jafã, ülepe nginheha Tubau,

ülepe nginheha Mesekei upügükoiha Tigasi.

3Gome limo ititüpeha igei:

Hotuguiha Asakenasi, ülepe nginheha Hifate upügükoiha Togahima.

4Jafã limo ititüpeha igei:

Hotuguiha Elisa, ülepe nginheha Tasi, ülepe nginheha Kitĩ upügükoiha Hodani. 5Jafe higükuẽgükopeha uãke akagoi. Itukopeha uãke hakila ipa kuẽgü heke. Telotseiha tepisũügükoi aetsini tuhugu tetitagüi, telotsei leha tüituko tüigatühügü itsagü uãke ihekeni, aetsiniha sitagüko ẽgiki itaginhukokilü tüakisükoi.

Kamü Higükuẽgükopeha

6Kamü limo ititüpeha igei:

Hotuguiha Kusi, ülepe nginheha Ejitu, ülepe nginheha Libia upügükoiha Kanahã.

7Kusi limo ititüpeha igei:

Hotuguiha Seba, ülepe nginheha Habila, ülepe nginheha Sabita, ülepe nginheha Hagama upügükoiha Sabiteka.

Hagama limo ititüpeha igei:

Sabaha Dedã ake.

8Kusi telü gehale Nihoji ũüi, Nihojiha ekisei hotugui kaküngi ngongo otoi titsatinhüpe, aitsüküha tinhaheni kugeko ihenkguale etelükilü inhongogukopei itsomi. 9KUKANETÜGÜ hekeha ahetinhombalüki inhügü tüitsunikingi tuhuti, üle ateheha nalü igia: "Nihoji gani ataiti eitsai, KUKANETÜGÜ hekeha ahetinhombalü tuhuti tüitsunikingi", nügükilüha. 10Hotuguiha Nihoji heke Babeu anetelü, Egeki anetelüha, Akaji anetelü Kaune anetelü gehale, akagoha ete tilakongoko inhügükilüha Sinai ngongoguho. 11Titalüpenginhe leha etelü Asigiana, tita leha ete tüilü iheke Ninifi, Heobote-Ihi tüilü, Kala tüilü, 12Hesẽi tüilü gehale iheke, Ninifi londaha tatinhü tsekegü Kala ake.

13Ejitu higükuẽgükope inhügü leha Luji itagüi, Anami itagüiha, Leabi itagüiha, Nafitu itagüiha, 14Patugusu itagüiha, Kasilu itagüiha, Kegeta itagüi gehale. Kasilu itagüha uãke tütenhüi Filisia itagü ĩhũgui.

15Takekoha uãke Kanahã limo, Sidõha Heti ake. Sidõha ekisei Heti hinhanope. 16Kanahã higükuẽgükope gehale uãke akagoi Jebuse itagüi, Amohe itagüiha, Jihigasi itagüiha, 17Hefe itagüiha, Ahikeu itagüiha, Sine itagüiha, 18Ahifaji itagüiha, Semage itagüiha Hamate itagüi gehale.

Ülepene leha Kanahã hisũüdão agakutelü tuhugu leha. 19Kanahã ngongogu agitügü tepügü Sidõ tongope nginheha, etepügüha aetsingoi Jegana, tetimbeha Gasana. Titalüpe nginheha etepügü Sodomana, Gomohana, Ajimana, Seboina, aetsingoiha agitügü etimbepügü gehale Lasana.

20Akagoha tütenhüi Kamü higükuẽgükoi, egitundelüko leha tüitagüko tüiale titaginhuko kugiti gehale.

Sẽi Higükuẽgükopeha

21Jafe hinhanoha Sẽi, tatute Hebe#10.21 Hebeha egei Hebegeu itagü igatoho etinetühügü. itagü apai tütenhüpe.

22Sẽi limoiha agoi tütenhükope:

Hotuguiha Elãu, ülepe nginheha Asuhu, ülepe nginheha Ahapasaji, ülepe nginheha Luji upügükoiha Agã.

23Agã limoiha agoi tütenhükope:

Hotuguiha Usi, ülepe nginheha Hulu, ülepe nginheha Jetehi upügükoiha Masi.

24Ahapasaji telüha Sela apai,

Sela telüha Hebe apai.

25Hebe telüha takikongo imugu apai,

egeta leha ngongo ikumenügü kugeko heke itukoi itsomi, üle ateheha aetsingo ititü inhügü Pelegi#10.25 "Ikumenügü" nügü hunguha egei Pelegi Isigaeu itagü itaginhuiha.. Ihisũügüha igatohopeha Jokotã.

26Jokotã telü leha

Aumodako apai, Selefeha, Hasa-Mafeha, Jegaha, 27Adonigãoha, Usauha, Jikalaha, 28Obauha, Abimaeuha, Sabaha, 29Ofiha, Habilaha Jobabe gehale. Tatuteha akagoi tütenhükope Jokotã mugui.

30Itukope tepügü geleha Mesa tongopenginhe tetimbeha Sefa kaenga, tatinhüha andüponhogu tuhugu giti ihatigoho inhe.

31Akagoha tütenhükoi Sẽi higükuẽgükopei, aetsiniha sepagü tepisũügükoiha inhünkgokilü tüngongoguko ugupo, aetsini leha isepagü kitagüi agakenünkgo, tagaketohoi gehaleha itaginhukokilü.

32Noe limo gepagü tuhugu akagoi, egitundegatühügükoha aetsini telotsei, aetsiningo higükuẽgükopeha. Tatuteha Noe higükuẽgükope agakutepügü kahujü kuẽgüpe nginheha ngongo ahi kitagüi tuhugu leha egea etetako.

Currently Selected:

GEN 10: KUI-BIBLE

Highlight

Copy

Compare