GEN 26

Isaki Tepügü Filisia Itagü Ngongoguna

1Ege ngongoguhoha uãke tagi tetagü, tingugi geleha uãke Apagahãu atai tagi itsatühügüpe agage. Üle ateheha Isaki telü leha ete Jegana. Titaha Filisia otomo anetügü igatohopeha Abimeleki itupeha egei tita. 2KUKANETÜGÜ apakilüha Isaki inha, nügüha iheke: "Ketengeha Ejituna; ngongo ihanümingoha egei uheke egitundetohoi", nügüha iheke. 3"Egete hõhõ eitu itsomi, akeha egei uinhümingo hekite gehale leha eitsomi eüilüingo uheke. Tatute gehale ige ngongo tunümingo uheke ehigükuẽgükope inha. Egea leha ukipügüpe upehe gele tüilüingo uheke oũü inha, Apagahãu inhaha. 4Kaküngi leha ehigükuẽgükope tüilüingo uheke, inhalü tsüma igükilükoingoi eheke, inke tsapa inhalüha anginitsei kandinhoko kahü alü igükinitsei, tatute gehaleha ige ngongohongoko tunümingo uheke inhani. Hekite leha tatute kitagü tuhugu ngongohongoko tüilüingo uheke ehigükuẽgükope anügü atehe. 5Apagahãu hekeha uikenitühügü atehe, ukipügü tüipügü ateheha iheke. Kinhakongondühügü tüipügü tuhugu atehe gehale iheke uheke, uügühütu engagü tüipügü atehe tuhugu gehale iheke, unginguhetoho engagü tüipügü atehe tuhugu gehale iheke", Egea leha Deusu kitagü Isaki heke. 6Egeaha uãke Isaki itu inhügü Jegate.

7Utotoko hekeha titalüko heke ijeginügü ihitsüki, "uingadzu esei", nügü leha iheke. Atütüpeha ekisei Hebekai, üle ateheha Isaki inegetunda egei tühitsüi ihanügü heke. Üle ateheha ingunkgingu igia: "Indongoko utotoguko heke tingapa uelüingo uhitsüpei itsokomi", nügüha iheke tepehe.

8Tamitsi tsetse leha Isaki egitundepügü atai Jegate. Filisia otomo anetügü Abimeleki inhünundagüha tagapaitoho tongopenginhe, Isaki ingilü iheke tühitsü Hebeka gekehijü hata iheke. 9Ülepei leha Abimeleki heke Isaki ingenügü, nügüha iheke: "Ehitsü niküle esei! Tütomima eingadzui ihanügü eheke uinha?", nügü leha iheke Isaki heke.

Ülepeiha Isaki heke itüjü: "Angini heke leha uelü hangamitagü uheke ike leha itsomi uhitsü esei ukigote", nügü leha iheke Abimeleki heke.

10Ülepei leha Abimeleki kilü: "Inhalü hüle egea tsihüilüi eheke! Anginiha utoto ünkgügoteha uãke ehitsü inga. Deusu heke leha tisumbolü aitsüküha tisegitamitomi egeaha atühügü ulegüi", ta leha iheke Isaki heke.

11Ülepei leha Abimeleki heke tatute tüitagü tüandagüko akihani humilü: "Angini hekeha hesinhüi utoto tüigote ihitsü tüigote gehale, üngelepe elüingo leha atsange", tomiha ihekeni.

12Isaki ataiha Jegate inhataguha, KUKANETÜGÜ heke leha hekite tüilü, üle ateheha ege isuã aetsiniha nhitepügü inhügü 100ni tuhugu. 13Utoto inhügü leha tüengikonkgoi, inhalüha aitsükü tüengikonkgoi inhügü akinümi, aitsükü leha tüengikonkgoi inhügü. 14Kaküngiha uãke Isaki ngipi ngene tinkgukinhü itsagü ovelha tuhugu, cabra tuhugu tapigü tuhugu gehale. Kaküngi gehaleha uãke ngingoku tükatsinhüko inha. Üle ateheha ukugeko Filisia otomo igikunukijükilü leha iheke. 15Üle hinhe leha tatute tuã ngagüpe aunügü leha ihekeni ngongoki Isaki apape Apagahãu ngingokugu nkgipügüpeha tsũhügüi, Apagahãu atai geleha tingugi dzipügüpe.

16Ülepene leha Abimeleki kilüha Isaki heke: "Etekeha tinhongogu hongopenginhe, kaküngi hekugu leha egei atühügüko tisuate", nügü leha iheke.

17Üle ateheha Isaki etimokilü leha titalüpenginhe, etuandelü leha Jega akatagüte, tita leha itsagü tamitsi tsetse. 18Aitsükü gehaleha tuã ngagü tuhugu aumbükilü igelü iheke Apagahãu atai geleha tingugi tükinhüpe, Filisia otomo ngaundühügüpeha Apagahãu apüngutse ingugi. Isaki heke geleha tuã ngagü ititüi isũü ngüipügüpe tüilü.

19Isaki ngingokugu heke leha tuã ngagü kilü andüponhogu tuhugu akatagüte tuã etsoho hogijü leha ihekeni. 20Ovelha igikasitinhiko Jega tongoko ake leha Isaki ovelhasü igikasitinhiko emütakügikügü. "Tsihengüpe tale egei tuãi", tagü leha ihekeni. Üle ateheha Isaki heke tuã ngagü tükinhüpe ititü tüilü Esekei#26.20 "Kemütakügitoho" nügü hunguha egei Esekei Isigaeu itagü itaginhui., egeaha emütakügitühügükope atehe. 21Ülepene gehale telope tuã ngagü kilü Isaki ngingokugu heke, Jega ovelhasü igikasitinhiko etimütonkgijü gehale leha tuã ngagü hinhe Isaki ngingokuguko ake; üle ateheha tuã ngagü itanügü iheke Sitinai#26.21 "Tatakitingoko hüngü" nügü hunguha egei Sitinai Isigaeu itagü itaginhui.. 22Isaki etimokilü leha titalüpenginhe telopeha tuã ngagü kilü gehale iheke, inhalü leha hüle tita tuã ngagü hinhe ilüi. Üle ateheha ititü tüilü leha iheke Heobotei#26.22 "Tsekegü Kitu" nügü hunguha egei Heobotei Isigaeu itagü itaginhui.. Nügüha iheke: "KUKANETÜGÜ heke naha igei kukituko ngongo tunügü tsekegüi kukatsohokoiha itsomi kukepünetokomiha.

23Titalüpe nginheha Isaki telü Besebana. 24Üle kokoha KUKANETÜGÜ apakilü, nügüha iheke: "Apaha Apagahãu Deususüha ugei. Keinegetũeha atsange, akongoha ugei; hekite leha eitsomi eüilüingo uheke, kaküngi leha ehigükuẽgükope epünetomi tüilüingo uheke, egeaha tüilüingo uheke ungingohuteni Apagahãu anügü atehe", nügü leha iheke Isaki heke.

25Tita leha Isaki heke leha tehu undagitsepügü tüilü Deusu akatsohoi, hekite leha nügü iheke KUKANETÜGÜ heke aitügijüi. Tita leha tuãko iluĩtsilü ihekeni inhingokuguko heke leha tuã ngagü kilü.

Isaki Atakisü Atapügü Abimeleki ake

26Isaki egituãdepügü ataiha Besebate, Jega tongopenginhe leha Abimeleki telü Isaki inha itaginhundomiha ike. Itaginhokongoha Ausate akeha etelü, isatatugu hoguteni gehaleha Fikou. 27Isaki hekeha ijeginügü: "Tütomima uake eitaginhuko inha etsako? Eimütongoko agage tinaha uãke uüitagü ehekeni, uhumilü tiha leha ehekeni ongongoguko hongopenginhe", Isaki kilü leha ihekeni.

28Ülepeiha itüjü ihekeni: "Akeha einde KUKANETÜGÜ atütüte hekuguha, üle ateheha Deusu imbataha kukitüngi. Katakisüko atalütiha tisitsagü ake igia agage: 29Ahütüha hesinhüi tihüilüingola eheke, hekite geleha eüigatühügüa tiheke tisüilüingo eheke. Inhalütseha uãke eüihesui tiheke tüihesitila geleha enhügü. Atütüte leha KUKANETÜGÜ heke hekini tüipügü einha", ta leha iheke Isaki heke.

30Ülepei leha Isaki heke tüngingokuguko inhakongonügü kaküngiha kuminhango ilandetomi ihekeni, etinhambalüko leha etimbanünkgo muke gehale tatute. 31Ülepe okogetsi hunda leha mitote Isaki kilü Deusu imbata tepeheni Abimeleki ake, ülepene leha egikanünkgo Isaki inha, etelüko leha hekite.

32Ege igoti geleha Isaki ngingokuguko telü inha tuã hogipügü ihatigi tükigatüa ihekeni. "Ángi leha tuã hogipügü tiheke", nügüha ihekeni. 33Isaki heke leha tuã ngagü ititü tüilü Sebai#26.33 "Angoloi kukipügü angini heke" nügü hunguha egei Sebai Isigaeu itagü itaginhui. . Üle ateheha ãde gele ukugeko heke ete hakingohüngü iheke itanalü Besebai.

34Ülepeiha 40iha Esau isũandühügü atai isitandu takiko Heti otomo adaũkegü ake, Sujitiha Begegi indisü, Besematiha Elõ indisü. 35Isaki itühondelü leha takikongoko itaõko heke Hebeka ake isekuitügükinünkgo leha.

Currently Selected:

GEN 26: KUI-BIBLE

Highlight

Copy

Compare