GEN 27

Hekite Jako Tüipügü Isaki heke

1Isaki atai leha haindenei hekugu kingitela leha. Ülepeiha Isaki heke tumugu ingenügü ihinhano ititüha Esau.

"Umugu!", nügüha iheke.

"Ãde uge!", itüjü iheke. "Kitseha!", nügü iheke tũü heke.

2"Haindene tinaha leha ugei tamitsila tingapoha uapüngu leha. 3Osiha ehügiha itse ahagü gehale itse, itsuninaha eteke ngeneha onota uinha. 4Ilandeke atsange kuminhango uakitingoi, ülepe inginümingo leha eheke uinha. Utinhambapügü nginheha, hekite leha hüle eüilüingo uheke uapüngu igakaho.

5Üle hata leha hüle, Hebeka heke leha Isaki kilü talü egea tumugu Esau heke. Ülepei leha Esau telü tsunina. 6Ülepei leha Hebeka kilü tumukugu Jako heke: "Oũü kilü talüha uheke ehinhano Esau heke: 7'Itsuninaha ngene onota, ilandeke atsange kuminhangoi hekite uinha. Utinhambapügü nginheha, hekite leha eüilüingo uheke KUKANETÜGÜ imbata, uapüngu igakahoha', nügü leha iheke ehinhano heke. 8Umukugu, osiha kutake atsange hekite ukilüingoha eheke ülepe tüitomiha eheke: 9Kungenegüko itsohonaha eteke, takikoha cabra mukugupe hekinipe endzete, kuminhangoiha tüitomi uheke hekite hekugu oũü inha isakitingoiha. 10Kuminhango igelüingo leha eheke oũü inha, tengelüingo leha iheke, ülepenginhe leha hüle Deusu heke isũü tüipügüpeki hekite eüilüingo iheke tapüngu igakaho", ta leha iheke tumukugu heke.

11-12Ülepeiha Jako kilü tüti Hebeka heke: "Apa hekeha uihisote? Inhalü naha uipuhogui uhinhano Esau agage. Tinkgugikügü uhunümingo leha iheke uheke. Ülegote leha inhalü Deusu ngihatühügü ihanümingoi iheke uinha, hesinhüi leha ukae ngiko inhügüingo ihanümingo iheke uinha hekitela", nügü leha iheke tüti heke.

13Ülepeiha isi kilü iheke: "Kutakeha umukugu, egeaha itsote la tsapa egea hesinhü itsai ukaenga akaengo ipopügüpeha. Igiaha einhakongonügüa tüike uheke: Etekeha egeala, endzeteha takiko cabra mukugu uinha", nügü leha iheke tumukugu heke.

14Ülepei leha Jako telü, cabra mukuguko ihenügü leha iheke, igelü leha iheke tüti inha. Ilandelü leha iheke hekite hekugu Isaki akitingoi. 15Ülepene leha Esau ingü hekini inügü iheke tongitenhüpeha ünga, itsi leha Jako ingündelü iheke. 16Ülepei leha Jako inhatügü amijü leha iheke itsingagü gehale cabra mukugu hijopeki. 17Jako inha leha kuminhango hekini inhilandepügü tunügü iheke pão gehale inhüipügü igetomi iheke tũü inha.

18Ülepei leha Jako telü tũü inha. "Apa", nügüha iheke.

"Kitseha umugu. Ungu hungu nile egei umugui?", Isaki kilüha iheke.

19"Uge esei Esau", Jako kilü leha iheke, "emugu hotugupe. Aileha ekipügüpe tüilü uheke. Osiha akankgeha, tengekeha uitsunikingühügüpe ilandepügü uheke einha ülepeneha uüitai eheke hekite".

20Ülepeiha Isaki heke tumugu leginügü: "Unguagagema engenigü hogijü eheke jaheji hekugu umugu?", nügüha iheke.

Ülepeiha itüjü iheke: "KUKANETÜGÜHA, eDeususüha uahetinhombani", nügü leha iheke tũü heke.

21Ülepeiha Isaki kilü Jako heke: "Inaha egete ugeponga umugu egekehitsomiha uheke, Esauiha anügü uhutomi hekuguha uheke", nügüha iheke.

22Jako telü leha hakila tũü Isaki heke, isekehijü leha iheke, nügüha iheke: "Jako itaginhui beha eitaginhu, eĩkungu beha Esaui", nügü leha iheke Jako heke. 23Ĩkungu ipuhogu talütse ingugi leha hüle egei Esau agage iheke, üle atehe leha inhalütse hekuguha Isaki heke Jakoi uhutohotsei, ülepei leha hekite tüilü iheke.

24Tüilü igakahoha Isaki heke aitsükü gehale ijeginügü iheke: "Umugu hekugu nikaha egei Esau?", nügüha iheke.

"Ẽ", Jako kilü leha tũü heke.

25Ülepeiha nügü iheke: "Umugu, inkgeteha engenigü tengetomi uheke. Ülepe nginheha hekite kenhüitai".

Egea leha Jako heke tüngenigü inginügü, isũü heke leha tengelü; vinho inginügü gehale iheke, ilijü leha iheke. 26Ülepeiha isũü Isaki kilü iheke: "Inaha egete umugu, uimütü kaengaha kukikuilitse", nügüha iheke tumugu heke.

27Ülepei leha etelü hakila iseponga, ikuilijü leha iheke imütü kaenga. Ingü giketilü talütse ingugi leha iheke, Isaki heke leha tüilü hekite igia agageha:

"Umugu gikegüha egei

ngatagühe gikegü agage,

hekiteha KUKANETÜGÜ ngüipügü agage.

28Deusu hekeha itsau humitai angatagü hülüinha;

etuhinhaho hekeha aitsükü kuminhango tüitai,

trigo tüilükiha vinho tüilüki gehale.

29Kaküngiha kitagü katsundai einha,

ukugeko hekeha tinapatsai tingi eitsai.

Ehisũüdão anetügüiha eitse,

ehigükuẽgükope itsaiha episunkgitsohoko anetügüi,

ünagope heke leha tinapatsai eingitamini.

Hesinhü tüinibüngükoha einha, Deusu heke leha hesinhü tüilüingo inhani.

Hekini tüinibüngükoha hüle einha, Deusu heke gehaleha hekini tüilüingo inhani".

30Egea leha Isaki heke hekite tüilü etsimbükilütse ingugi, igia ekugunkgu geleha Jako ihatipügü atai, Esau etimbelü leha itsuni tongopenginhe. 31Kuminhango ilandelü gehaleha iheke hekite, ülepe igelü leha iheke tũü inha, nügüha iheke: "Apa, etikaĩtseha ungenigü engetomi eheke, hekiteha uüitomi eheke ülepe nginheha", nügü leha iheke tũü heke.

32Isaki heke leha hüle ijeginügü: "Tü nile egei?", nügüha iheke.

Itüjüha iheke: "Esau tinaha ugei, emugu hotugupe", Esau kilü leha tũü heke.

33Aitsükü leha Isaki ipügelu, inhalüha ipügelukinügüi. Nügüha iheke: "Tüma hüle ekisei tüngenigü ingitinhi uinha? Ai leha utinhambalü tetimbela gele atai, tüi leha uheke hekite, hekite leha egei tüipügü atühügü tapüngui, inhalü leha hüle imokitohotsei", nügü leha iheke tumugu heke.

34Egea leha Esau heke tũü akisü talütse ingugi, ihetu leha kotsi, aitsükü leha ingukugijü iheke, kotühüngüi muke gehale inhügü, nügüha iheke: "Apaju, hekite titapa gehale uüike?", nügüha iheke.

35Ülepeiha isũü kilü iheke: "Uinkgugikümi leha ehisũügü enhügü leha ina, tüilü leha uheke Deusu heke hekite einhango ipopügüpeha", nügü leha iheke tumugu heke.

36Ülepeiha Esau kilü: "Ititü#27.36 "Kinkgugitinhi" nügü hunguha egei Jakoi Isigaeu itagü itaginhui. heke geleha egei ihanalü. Otohongoi leha egei uinkgugikügü iheke. Hotugui naha uãke ihinhanoiha uanügü hinhe atakanügü leha. Andeha uihenkgulü iheke hekite küitohopeki uinhango ipopügüpeha!", ta leha iheke. Ülepeiha tũü leginügü iheke: "Angi muke hüle telo gehale engihapungu gele, Deusu heke ekitomi tundomi iheke uinha?", nügüha iheke tũü heke.

37Ülepeiha Isaki heke itüjü: "Ai leha ukilü anetügüi itsomi, ukilü gehale iheke episunkgitsohokope itsomi inhingokugui inhakugula. Deusu heke leha kaküngi trigo tunümingo inha uva gehale kaküngi vinhoi tüinhü. Umugu, ungua ekugu tima eüingalü leha uheke", nügü leha iheke tumugu heke.

38Esau kitagü geleha tũü heke: "Apa, angi kaha aetsi mukeha keite küitoho engipi? Apa, hekite ataiti tapa gehale küike!", ta leha iheke tũü heke. Ülepei leha Esau inilu ige helüi.

39Ülepeiha isũü Isaki kilü itsaengo heke:

"Egitundelüingoha hakiha hekini ngongo heke,

tita leha katohola ekuguha kongoho ngingilüingo,

katoholani unkgu leha angatagühügü ihindzuingo.

40Ahütüha akatsuhüngü hekela tingugi gele eüilüingola otonge hüle tingugi geleha eüiningoi,

aitsükü leha akatsuingo ehisũügü inha ngingoku agage.

Ingundela leha aitsükü atai,

inhalü leha inhingokugui einhümingoi", egea leha tagü iheke tumugu kaengo heke.

Jako Ihipügü

41Esau ingukugijü leha Jako heke, inhalüha ihangankgikümi egea isũü heke hekite tüipügü heke. Ülepei leha ingunkgingu tühisũügü elü kae: "Tamitsila naha leha apa apüngu anügü. Uhepanügüpe etsimbükigoteha, uhisüpe Jakope elüingo leha uheke", nügü leha iheke.

42Anginiha ukugeko heke leha Esau ingunkgingu uhunügütse ingugi Jako elü kae, ihanügü leha ihekeni Hebeka inha. Ülepei leha Jako ingetinhi humilü iheke, nügüha iheke: "Ehisũügü itsagü akatsege tetimilüti eheke. Elüti itsagü. 43Üle ateheha umukugu, kutake atsange. Eihikeha jaheji hekugu gele Hagãna, uhisũügü Labãu üngati. 44Titaha eitse ike tamitsi tsetse, aetsingoiha ehisũügü ingukugupe etsuhenkgigote. 45Ehisũügü enisüila leha hüle atai ihangankgitoteha egea tüipügüpe heke eheke, eitinhi humilüingo leha uheke. Inhalüha aetsingo hunda gele takiko ulimo apünguti uanümi", ta leha iheke tumukugu heke.

46Ülepeneha Hebeka kilü Isaki heke: "Aitsüküha kotühüngüi uge, Esau itandühügü hekeha Heti itagü itãugu ake. Jako itandundoteha akago hungu Heti itãugu ake, ugeha ukilü uapünguti leha uinhümingo", nügü leha iheke tünho heke.

Currently Selected:

GEN 27: KUI-BIBLE

Highlight

Copy

Compare