GEN 25
25
Apagahãu Apüngühügü
1Apagahãu itandu gehale telo itaõ ake igatohopeha Ketuga. 2Aetsiha inkgugetoho ijilü iheke: Hotuguiha Sigã, ülepe nginheha Jokisã, ülepe nginheha Medã, ülepe nginheha Mijihã, ülepe nginheha Isibakiha, upügükoiha Sua. 3Jokisã telüha Saba apai Dedã ake. Dedã higükuẽgükope telüha Asugĩ otomoi, Letusĩ otomoiha Leumĩ otomoi gehale. 4Mijihã limopeha hotugui Efái, ülepe nginheha Efehi, ülepe nginheha Enoki, ülepe nginheha Abidaha upügükoiha Euda. Tatuteha akagope telü Ketuga higükuẽgükoi.
5Apagahãu heke leha tatute tüengüpe tunügü Isaki inha. 6Tetijatongoko#25.6 Tilakoha uãke Apagahãu hitsü. Ihitsü hekugupeha Sagai apüngu leha uãke, Hagaha uãke otohongo ijatongoi, aetsiha uãke ijilü iheke, Ketugaha uãke setilangogukoi ihitsüi, aetsiha inkgugetoho uãke ijilü iheke. limo inhaha hüle katohola inhengikombatohoko tunügü iheke. Apünguingo igakaho leha ihumilüko iheke giti ihatigoho inheha tegitundelükoinha, hakiha itsokomi Isaki heke.
7175iha Apagahãu isũanügü. 8Apagahãu igehungupe etsimbükilü leha, haindenei ekugu leha apüngu. Igakaho leha tankginhükope apüngühügü agage isagageni leha apüngu. 9Ijimoha Isakiha Isimaeuko heke leha inhatelü Makipela tongo tehu atatagükipügü atati, giti ihatigoho Mãhe inhongo heke, Efogõ ngongogute, Heti itagüha, Soa mugupeha ekisei, 10Heti itagü ngipingope nginheha uãke egei Apagahãu ngihipütepügü ngongoi. Apagahãu ngatelü leha ihekeni ihitsüha Saga ngatepügüpena gehale. 11Isũüha Apagahãu apüngühügü nginheha uãke, hekite leha Deusu heke Isaki tüilü. Isaki egitundelü leha hakila Begehi-Lagai-Hoi heke.
Isimaeu Higükuẽgükope
12Isimaeu higümbügü aküngindu ihatühügüha igei, Apagahãu etijipügü Ejitu itagü Haga ake, Saga inhakugulalüha ngingoku, inhundühügüha inha:
13Nebaioteha ekisei Isimaeu limo hinhanope,
ülepe nginheha Kedahi, ülepe nginheha Ajibegeu, ülepe nginheha Mibisãu,
14ülepe nginheha Misima, ülepe nginheha Duma, ülepe nginheha Masa,
15ülepe nginheha Hadaji, ülepe nginheha Tema, ülepe nginheha Jetuhi,
ülepe nginheha Nafisiha upügükoiha Kejima.
16Ünagoha akagoi 12ha Isimaeu limopeha. Inhongogukoha ituko igatohoi leha aetsini ititükope inhügü. Aetsini leha tüitagüko anetügüi inhünkgo.
17137ha Isimaeu isũandühügü atai apüngu. Igakaho leha tankginhükope apüngühügü agage isagageni leha apüngu. 18Isimaeu higükuẽgükope egitundelü leha Habila ngongogu londa Suhi ake, Ejitu ngongogu hekeha hakila, Asigia inheha kutegoho inhe. Telotseiha inhünkgokilü Apagahãu higükuẽgükope heke.
Jako Ankgipügü Esau Ake
19Apagahãu muguha Isaki akinhagüha igei: 2040iha uãke egei Isaki isũandühügü atai sitandu Hebeka ake. Hebekaha ekisei Betueu indisüpe, Labãu ingadzuha. Agã itagüpeha akagoi, itukopeha Mesopotamiate.
21Hebekaha uãke ekisei tünohandimbüngüpe, üle ateheha Isaki itaginhu KUKANETÜGÜ inha ahetinhombatomi iheke ihitsü nohandomi. KUKANETÜGÜ heke leha Isaki kipügü itüjü, ülepei leha Hebeka nohanügü. 22Takeko leha Hebeka tehualü inhügü, aitsüküha tetimütonkgisinhüa kangamukeko etihijükilü itsehua. Üle atehe leha eleginügükilüha: "Tütomi nile igei igia uitsagü?". KUKANETÜGÜ hunkgeĩtsilü leha iheke, itaginhu leha KUKANETÜGÜ ake.
23KUKANETÜGÜ kilüha iheke:
"Takongokoha elimo etehualüpe inhümingo leha takikongo itagüi,
aetsingo inhümingo leha aitsükü tinhaheni otohongo heke,
takikongoha tankginhükoingo etehualüpenginhe agakenünkgoingo leha ilainha;
ihinhano inhümingo leha tühisü ahüta", KUKANETÜGÜ kilü leha Hebeka heke.
24Hebeka imagu ati leha inhügü, takiko leha utoto kusügüko ankgilü iheke. 25Tukuhisinhüha inhakahugu hotugui tankginhüi aitsüküha tipuhoi, üle ateheha ititü tüilü ihekeni Esaui#25.25 "Tipuhoinhü" ganingo nügü hunguha egei Esaui Isigaeu itagü itaginhui.. 26Otohongo ankgilüha Esau tamütisü ihetale tinhatügüki, üle ateheha ititü tüilüha ihekeni Jakoi#25.26 Jakoha egei 'kutamütisü ihetinhi' nügü hunguha, 'kingugitinhi' nügü hungu gehale, Isigaeu itagü itaginhui; Ketinetühügü 27.36te gehale.. Isaki isũandühügü atai 60i Hebeka heke takongoko ankgilü.
27Kangamukeko etükilü leha. Esau inhügü leha tüitsunikinginhüi tipaki geleha etelükilü tsunina. Jako akitingopeha hüle ngene tinkgukinhü igikasikügüi iheke, ünga geleha inhügükilü. 28Isaki akiti leha Esau inhügükilü isakitiha inhenigü engelü ateheha iheke. Hebeka akitiha hüle Jako inhügükilü.
29Ülepeiha Jako ilandundagü ala tüitagü iheke, Esau etimbelüha aitsükü tagi, tsuni tongopenginhe leha ogopipügüi, 30ülepei nügü iheke: "Tagi heke kutale igei uhüngetagü. Uinha unkgutale eilagü tükahisinhü engunkge", nügüha iheke Jako heke. Üle ateheha ülepene leha ukugeko heke Esau itanügü Edõi#25.30 Tükahisinhü nügü hunguha egei Edõi Isigaeu itagü itaginhui..
31Ülepeiha Jako heke itüjü: "Osi, tunügü leta uheke, igia makina", nügüha iheke. "Hotuguiha apa mugui anügüpe ihatote tsügütseha hüle eheke uinha tunümingoha uheke einha", nügü leha hüle iheke Esau heke.
32Ülepeiha Esau kilü: "Aingotsaha egei. Tagi heke ekugu igei uetagü. Inhalü muke naha hotugui apaju mugui uanügü heke uahetinhombalüingotsei", nügü leha iheke.
33Üle hata geleha Jako kilü aitsükü: "Hotuguiha kitse Deusu imbata egea ekitoho tüilüingo heke uinha, apa mugu hotuguiha anügüpe tunügü heke". Egea leha nügü iheke Deusu imbata hotuguiha isũüko mugui anügüpe itakonkgilü leha iheke Jako ake.
34Ülepei leha Jako heke Esau inha pão tunügü lentilha#25.34 Lentilhaha egei kumanai ganingo. ilandepügü ake. Esau etinhambalü leha etimbanügü gehale etsimbükipügünginhe leha, itsikaĩjü leha, ülepei leha etelü.
Egea leha Esau heke hotugui isũüko mugui anügüpe õlü.
Currently Selected:
GEN 25: KUI-BIBLE
Highlight
Copy
Compare
Share
Want to have your highlights saved across all your devices? Sign up or sign in
© Associação Linguistica Evangélica Missionária
