GEN 24

Isaki Hitsü Uhinhi Tepügü

1Haindenei leha Apagahãu atai, tamitsi ekugu leha isisũandühügü atai, KUKANETÜGÜ heke leha hekite tüipügü atai. 2Ülepeiha tüngingokugu tamitsingo leha ingenügü iheke, inhengü igikasitinhipeha, nügüha iheke: "Einhatügüha tüike uatitü iküati#24.2 Egetaha uãke egeaha kugeko heke tinhatügüko tüilükilü katitü iküati, Deusu imbataha ngiko tüilüingo ihatomi ihekeni., 3kitseha KUKANETÜGÜ imbata, kahü tüinimbüngüha ngongo ake, inhalütse mukeha umugu Isaki itandu unümingoi eheke Kanahã itagü itãugu ake indeha uitsohote, 4uankgipüatiha hüle eteke, umugu Isaki hitsü uhijüinha, upisunkgitsoho hujati", nügü leha iheke tüngingokugu heke.

5Ülepei leha inhingokugu heke ijeginügü: "Itaõ ataiha tüenhügütila uake ige ngongoguhonga? Emugu igelüingo leha uheke ngongo etinkgukipügüpena angi?", nügü leha iheke.

6"Inhalü!", Apagahãu kilü leha. "Inhalütse ekugu hüle umugu opijüi eheke tigati", nügü leha iheke.

7KUKANETÜGÜHA, Deusuha kahüalü, apako üngalüpe nginheha utinhimbüngü, uankgipügü tongope nginheha utinhimbüngüha, nügüha iheke uheke, nügükiha tepehe gele, igia tale "ehigü kuẽgükope inha ige ngongo tunümingo uheke, tüngingokugu kahüalü humilüingo leha iheke eimagü otoi, egea leha umugu hitsü inginümingo eheke. 8Tüenhügütilaha itaõ atai, ülegote leha tütehuhesila einhümingo egeaha ekipügüpe heke Deusu imbata. Inhalü hüle umugu opijütsei eheke tigati", ta leha iheke tüngingokugu heke. 9Ülepei leha ngingoku heke tinhatügü tüilü tüanetügü Apagahãu atitü iküati, nügü leha iheke Deusu imbata tühügüpe tüilüingo heke iheke.

10Ülepeiha ngingoku telü leha etena Apagahãu hisũügüha Nao itsatühügüna Mesopotamia lombonga. Timühoha tüanetügü camelosü igelü iheke kaküngi gehaleha inhunügü. 11Tamitsi leha ila isigotisü telü hata etimbelü ete Nao ituna. Cameloko tipondelü leha iheke tuã ngagü geponga, hakila ete heke. Kohotsiha egei itaõko hekeha tuã kugitsoho ati atai.

12Ülepeiha Deusu heke nügü iheke: "KUKANETÜGÜ, uanetügü Apagahãu Deususü, ihakikeha uanetügü Apagahãu inha akihekundu, imugu Isaki hitsü hogijüki uheke. 13Andeha uge inde tuã ngagü gepo, tuãki ete tongoko itaõko etsohote. 14Aetsingo hekeha ukilüingo: "Engipingo ataiti hõhõ ingüteke katohola tuã ilitsomi uheke". 'Ehẽ', toteha iheke, 'elitseha, acamelosüko inha gehaleha tuã tunümingo uheke', egea leha Isaki engingokugu hitsüi tatinhüingo angaküngipügü itaõ uhunümingo uheke. Egea leha itsote, hekite leha uanetügü kae anügü uhunümingo leha uheke".

15Tetsimbükila geleha Deusu ake itaginhu atai, Hebeka ingilü leha iheke sinümbata tüngipingo ipoĩsale tüãtaho. Betueu indisüpeha ekisei, Miuka mukugupeha Nao ake, Apagahãu hisũügüpeha. 16Tünhokimbüngüpe geleha ekisei Hebekai atütüpe hekuguha. Utoto ingati geleha tatimbüngüpe. Inhüntelü leha tuã ngagü kipügüna, tüngipingo alenenügü leha iheke, ogopijü leha.

17Ülepei leha Apagahãu ngingokugu telü leha inha. "Uinha ataiti engipingo alü tuã engunkge", nügüha iheke.

18"Osi, elitse tsapa", nügü leha iheke. Ületsei geleha tüngipingo ingütelü iheke tüãtahongopenginhe, tuã tunügü leha iheke ilitsomi iheke.

19Tuã tundühügü nginheha iheke, nügüha iheke: "Tuã gehale kengundomi acamelosüko inha ilitsomiha ihekeni aetsingoiha akusokondeni", Hebeka kilü leha Apagahãu ngingokugu heke. 20Tüheinhi leha ihapijü iheke ilitsoho atati, kaküngiha atsakulü hisundu tuãki inhagü kipüati cameloko imbatohoi tuhuguha iheke. 21Üle hata leha titaginhila Apagahãu ngingokugu heke itaõ ingitagü. Ingukgingundagü leha tütehua: "KUKANETÜGÜ ngaküngipügü katoha esei itaõi tetinhüi tuã ngagüna Isaki hitsüi itsomi?", ta leha iheke tepehe gele.

22Cameloko etimbanügüpe etsimbükilütse ingugi leha, ngingoku heke leha ouro tüipügü kinatagü hokongoi inügü, 6 gramaiha itetungu, takiko gehale kinhutakumitsüi ouro tüipügü tunügü iheke, 100 gramaiha itetungu ülepe uatühügü itsagü leha iheke. 23Ülepei leha ijeginügü iheke: "Tü nile oũüi?, nügüha iheke. "Angi kaha inhünga kititsü tihü ige koko uitsomi tita uakongoko ake?", nügüha iheke.

24Ülepeiha itüjü iheke: "Betueu indisüha ugei, Miuka etijipügüpeha Nao ake", nügüha iheke. 25"Alatsü ainde letsa kukititsü tihü einhani tisünga eünkgütohokoi, kaküngi gehaleha tahuga tagutimbüngü tagutinhüpe gehale cameloko inha tuhugu", Hebeka kilü leha Apagahãu ngingokugu heke gehale.

26Utoto etipondelü leha, tühinitü akanenügü leha iheke ngongohonga, KUKANETÜGÜ heke leha hekite nügü iheke aitügijüi. 27Ülepeiha nügü iheke: "Hekiteha tai KUKANETÜGÜ heke, hekite uanetügü Apagahãu Deususü anügü ateheha itsae, inhaha inhihatühügü tüingalü gehale iheke, KUKANETÜGÜHA uigeni uanetügü episũnkgitsohoko üngati", Apagahãu ngingokugu kita leha.

28Ülepei leha daũke telü kaküho üngati tatute leha egea atühügüpe ihatigi tüti üngati. 29-30Aetsiha uãke Hebeka hisũügü igatohoha Labãui. Tingadzu inatagü hokongo ingilü leha iheke inhutakumitsü tuhugu gehale, utoto kipügüpe iheke ihanügü talü leha Labãu heke. Ülepei leha Labãu telü kaküho Apagahãu ngingokugu ingetigi. Tikanhiha atai cameloko gepo tuhugu, hakila tuã ngagü gepo. 31Labãu kilüha iheke: "Egeteha uake, hekiteha KUKANETÜGÜ ngüipügü. Inhalü hüle egete ete hogekela einhümi. Eititsü tüipügü leha uheke ãde eünkgütohoi acamelosü itu gehale", Labãu kilü leha Apagahãu ngingokugu heke.

32Ülepei leha utoto enügü üngati. Ngikope tijü leha Labãu ngingokuguko heke cameloko humbongopenginhe tuhugu, tahuga tagutimbüngü tunügü leha iheke tagutinhüpe gehale. Ülepene leha ünga atamini tuã inginügü ihekeni Apagahãu ngingokugu inha, ikongoko heke leha tütapügüko konkgitomi. 33Kuminhango ingitoteha ihekeni, Apagahãu ngingokugu kilüha: "Inhalü akatsange hõhõ utinhambalüi, ina hõhõ uetsühügü nhihatomi einhani", nügü leha iheke ihekeni.

"Kitseha", Labãu kilüha iheke.

34Ülepeiha nügü iheke: "Apagahãu ngingokuguha ugei. 35KUKANETÜGÜ hekeha uanetügü tüilü hekite hekugu, üle atehe leha aitsükü tüengikonkgoi atühügü, ovelha otoi tuhugu leha inhügü, cabra tuhugu tapigü tuhugu gehale, prataha, ouroha, ngingoku kinhakugulalüko tuhugu utotokoha itaõko tuhugu gehale, camelo tuhuguha jumento tuhugu gehale. 36Uanetügü Apagahãu hitsü Saga, haindenei leha umbege atai aetsi leha ijilü iheke. Imugu inhümingo leha tatuteha Apagahãu engüpei apüngote. 37Uanetügü kilüha uheke ukitomiha iheke Deusu imbata tühügüpe tüilüingo heke uheke inha, igiaha nügü iheke: 'Ojo atsange umugu unügü eheke Kanahã itagü itãugu ake isitandundomi indeha uitsohote. 38Eteke atsange apa episunkgitsoho ituna, endzeteha aetsi itaõ uhisũüdãoko hujalüpenginhe inhotundomiha ike', nügüha iheke uheke egea.

39"Ülepeiha uanetügü leginügü uheke: 'Unguama hüle uinhümingo itaõ atai tüenhügütila uake?' ", ukilüha iheke.

40Ülepeiha uitüjüha iheke: 'KUKANETÜGÜ ikenitühügüha uheke aitsükü. Üngeleha Tüngingokugu kahüalü huminingoi ake ülegote leha itaõ hogijüingo eheke, hekite tsaha egei inhümingo. Aetsiha itaõ aküngijüingo eheke umugu inha uitagü hekugu geleha, apa episunkgitsohoha. 41Egeaha ekigote upisunkgitsoho heke, daũke tunügütilaha atamini, ahütüha egei eulegüi egea inhümingola, inhalü leha ülegote etehuhesuingoi Deusu imbata ngiko tüilü ihatühügüpeki eheke uinha.

42Andeha utimbegote hakila tuã ngagü heke, ukilüha Deusu heke: 'KUKANETÜGÜ, uanetügü Apagahãu Deususü, hekiteha ungüilüingo tüitomi uheke, einha ikanügü uheke. 43Andeha uge tuã ngagü gepo. Daũke etsoteha tuãki, tuã inhipingo ikanümingoha uheke ilitsomi uheke, 44uitüsoteha iheke: 'Elitseha. Tuã tunümingo gehaleha egei uheke acamelosüko inha', toteha iheke, ekiseha angaküngipügüi tatinhüingoi uanetügü mugu hitsüi".

45Tetsimbükila geleha Deusu ake ugota uitaginhu hata, Hebeka ingilü leha uheke isinümbata tüngipingo ipoĩsale tüãtaho. Inhüntelü leha tuã ngagüna tuã aũtsilü leha iheke. Ülepeiha ukilü iheke: 'Uinha ataiti hõhõ tuã engunkge ilitsomi uheke'.

46Tüheinhi leha tuãtahongopenginhe tüngipingo ingütelü iheke, nügüha iheke: 'Elitseha. Tuã tunümingo gehaleha uheke acamelosüko inha tuhugu'. Ülepei leha ilijü uheke tuã tunügü gehaleha iheke ucamelosüko inha tuhugu.

47"Ülepeneha ijeginügü uheke: 'Tü nile oũüi?, ukilüha'.

Uitüjüha iheke: 'Betueu indisüha ugei, Miuka etijipügüpe Nao ake'.

Ülepei leha inatagü hokongo tüilü uheke inhutakumijü muke gehale uheke. 48Utipondelü leha, hekite leha KUKANETÜGÜ heke ukilü aitügijüi, hekite leha KUKANETÜGÜ heke ukilü ailikügüi gehale, uanetügü Apagahãu Deususüha, uingitinhimbüngüha titage ina episunkgitsohoko inha, uanetügü mugu inha ihisũügü etijipügü igetomi uheke. 49Osiha egeaha itsote uanetügü inhaha tüinhü tüigote ehekeni hekite gehale anünkgoha kigoteha ehekeni, kitsüeha uheke egea ungüilüingo kae, 'osi' lalaha atamini kitsüe gehale uheke egea ingugitomi uheke", Apagahãu ngingokugu kita leha ihekeni.

Isaki Itandühügü Hebeka ake

50Ülepeiha Labãu heke itüjü Betueu ake: "KUKANETÜGÜ hekeha egei egea tüipügü inaha etsomi, üle ateheha inhalü Deusu kipügü hokagakenümi tiheke. 51Andeha Hebeka; igekeha ake anetügü mugu hitsüiha itsomi, egeaha tüike KUKANETÜGÜ kipügüa", nügü leha ihekeni Apagahãu ngingokugu heke.

52Apagahãu ngingokugu heke leha egea nügü talütse ingugi, etipondelü leha tühinitü akanenügü leha iheke ngongohonga hekite leha KUKANETÜGÜ heke nügü iheke aitügijüi. 53Ülepeiha ngingoku heke leha ouro tüipügü prata tüipügü tunügü gehale, itaõ ingüi muke gehale Hebeka inha. Ihisũügü engikombalü gehaleha iheke isi ake tihipükoinhüki. 54Ülepene leha etinhambalü utotokoha tikongoko ake, etimbanünkgo leha, tita leha koko inhünkgo.

Itsikaĩsokondeniha mitote, nügüha iheke: "Ugopitsai tiha leha uanetügü üngati", nügü leha iheke.

55Ülepeiha Hebeka hisũügü kilü tüti ake: "La hõhõ timüho isigotisü itsai inde tisake ülepe nginheha etetai", nügüha ihekeni Apagahãu ngingokugu heke.

56Ülepeiha nügü iheke ihekeni: "Ojo tiha tamitsi inde uüilü ehekeni, ai leha KUKANETÜGÜ heke hekite egea uetsügühügü tüilü, jahejiha tundüe üngele ugopitsomi tiha uanetügü inha", nügü leha iheke ihekeni.

57Ülepei leha nügü ihekeni: "Kunhingetüngiha Hebeka isakisü tatomi". 58Ülepei leha Hebeka ingenügü ihekeni. "Angi etelüti eitsagü ese utoto ake?", nügüha ihekeni iheke.

"Ẽ, utelüti leta uge", nügü leha iheke.

59Ülepei leha Hebeka unügü ihekeni itaõha igikasitinhipe ake etegokomi leha Apagahãu ngingokugu ake ikongokope ake gehale. 60Etelüingo igakaho leha, Deusu heke hekite Hebeka tüitomi tüilü ihekeni, igiaha nügü ihekeni:

"Egeha tisingadzu, kaküngingoha elimo amai eitsai;

ehigükuẽgükope heke gehale

timütongoko ihenkgugatai itukopeki", ta leha ihekeni Hebeka kae.

61Ülepeiha Hebeka otongitelü leha itaõko tüngingokuguko ake, cameloko uguponga tuhugu leha inhünkgo, Apagahãu ngingokugu ingi leha etelüko. Egea leha etelüko.

62Kanahãna leha etelüko hata, Isaki enhügü leha Begehi-Lagai-Hoi tongopenginhe, itupeha uãke egei Negebi ngongoguho. 63Kohotsi leha ahugutilü hata etelü tühüluinha ipingohüngü tahugapingona tigati tingunkginguinha. Tulemila leha cameloko ingilü iheke isinünkgo hata ahehijüi. 64Hebeka heke gehaleha Isaki ingilü. Inhüntelü leha camelo ugupongopenginhe. 65Apagahãu ngingokugu leginügü leha iheke: "Tü nile ekisei utotoi tetsatinhüi ipingohüngü tahugapingote kukahehijükoi?", nügüha iheke.

"Uanetügü Isaki ékisei", nügü leha iheke. Ülepei leha Hebeka heke pano tükaheninhüki timütü uãdelü.

66Ülepene leha Apagahãu ngingokugu heke tatute tütegatühügüpe ihanügü Isaki inha. 67Ülepei leha Isaki heke Hebeka igelü ketuãdepügü isi Saga engüpe atati, egea leha inhügü ihitsüi. Isaki akiti leha Hebeka inhügü; egea leha atakihekugitsohoi inhügü isi apüngühügüpe nginheha.

Currently Selected:

GEN 24: KUI-BIBLE

Highlight

Copy

Compare