GEN 13

Apagãuko Agaketühügü Telotsei Lo ake

1Apagãu telü leha Ejitu tongopenginhe tühitsü ake tatute leha tüengikogupe kugiti tuhugu, ogopijüko leha Negebi ngongoguna, Lo telü leha ike, ihisũügü tapünginhüpe mugupe. 2Apagãuha uãke ekisei aitsüküha tüengikonkgoinhüpe; kaküngiha uãke ngeneko tuhugu inhipi tinkgukinhü, prata tuhuguha ouro tuhugu gehale.

3Negebi tongopenginhe leha tegituatealeni etelüko tüandagüko ake, etimbelüko leha ete Beteuna, titalüpenginhe leha etelü Beteu londati tatinhüna Ai ake. Tsũhügüi leha hotugui egituatepügüna. 4Apagãu etimbelü leha hotugui tehu undagitsepügü tüipügüna iheke Deusu akatsohoi, tita leha hekite nügü iheke KUKANETÜGÜ aitügijüi.

5Lo, tütegatinhüpe Apagãu huhuki, kaküngi gehale ovelhako igelükilü iheke tike, cabrako tuhugu gehale, tapigüko tuhugu, inhingokuguko tuhuguha ijimoko gehale. 6Aetsingoi geleha umbege tinhügükoti itsako, inhalüha kaküngi tahuga itsagüi hüle ngeneko inha inhunünkgoi, kaküngiha ngeneko anügü atehe inhipini. 7Üle ateheha Apagãu ngingokuguko ngene igikasitinhiko etimütonkgijükilü leha Lo ngingokugu ngene igikasitinhiko ake. Üle hataha uãke Kanahã itagü itu itsagü tita, Pegesi itagü gehale.

8Ülepeiha Apagãu kilü Lo heke: ''Uhisũügü mugupe naha egei, hakingohüngü ekuguha kukugei, üle ateheha igia uakitila ketimütonkgijü ingitagü uheke, atütüilaha kungingokuguko etimütonkginhalü. 9Ingikeha eigakaho, aitsüküha ngongo ingitagü eheke. Angaküngitse tsüha eititsü akitingoha, topogekela leha kutsomi. Ngongo heĩgü inhongope aküngisoteha eheke oto inhongope inhe leha utelüingo, ngongo oto inhongope aküngisoteha eheke heĩgü inhongope inhe leha utelüingo", ta leha iheke tühisũügü mugupe heke.

10Lo inhünu leha tigüĩjüi hankgungingaha Johudãu akatagü ingilüi, tuãha tsuẽi tita. Üle tepügüha tetimbe Soana. Üleha egei unatsüma ngata itu hekini KUKANETÜGÜ ngüipügüha Edẽi ngongogu ganingoha, unatsüma gehale Ejitu ngongogu gani. Egeaha uãke inhügü, hotugui geleha KUKANETÜGÜ heke tüõgonkgetila ete Sodoma atai Gomoha atai gehale. 11Lo heke leha tatute hankgunginga Johudãu akatagüpe aküngijü, etelü leha giti ihatigoho inhe. Egea leha telotsei agakenünkgo. 12Apagãu inhügü leha Kanahã ngongogute. Lo telü leha tegituateale ete tuhugu hankgunginga Johudãu akatagü tongo uatale, Sodomanaha aetsingoi etimbetomi. 13Sodoma itagüha akagoi aitsüküha sini kinginikope, tipaki geleha hesinhü tüinikope KUKANETÜGÜ engala.

"Kanahã Otoiha Einhümingo", Deusu Kipügü Apagãu heke

14Lo tepügünginheha, KUKANETÜGÜ kilüha Apagãu heke: "Ingukeĩtsikeha atütüi tatute eigakaho, ankgahoha, etüha inene gehale. 15Tatuteha ngongo engingilü tunümingo leha uheke einha, ehigükuẽgükope inha gehale tapüngui. 16Ehigükuẽgükope hünenümingo leha uheke kaküngi ngongo unagü aküngindu agage. Inhalüha angini heke ehigükuẽgükope aküngindu igükilüingotsei. 17Osiha etekeha, ehülunkgeha ige ngongo ahi. Einha leha ige ngongo tunügüingo atehe uheke", nügü leha iheke Apagãu heke.

18Ülepei leha Apagãu heke tüandagü ake tuãkope ahakilü igelü, etelüko leha i tuhugu tsekegü geponga utotoha tigatinhü Mãhe engüna, Hebogõnaha. Tita leha Apagãu heke tehu undagitsepügü tüilü KUKANETÜGÜ akatsohoi.

Currently Selected:

GEN 13: KUI-BIBLE

Highlight

Copy

Compare