GEN 12

Deusu hekeha Apagãu Ingetühügü Etitsomi Tüitalü tongopenginhe

1Ülepeiha KUKANETÜGÜ kilü Apagãu heke: "Etekeha ongongogu ankgipügü tongopenginhe, inhondikeha ehisũüdão oũü üngüpe gehale. Etekeha kitu ungihanümingona einha.

2Kaküngi leha ehigükuẽgükope inhümingo, aitsükü leha inhünkgoingo kitagüi.

Hekite leha eitsomi eüilüingo uheke.

Tuhuti leha eititü tüilüingo uheke.

Hekite leha teloko tüilüingo uheke anügü atehe.

3Hekite leha akagoha hekite eüinimbüngü tüilüingo uheke,

hesinhüi leha hüle akagoha hesinhüi eüinimbüngü tüilüingo uheke.

Hekiteha tatute kitagü ngongohongoko

tüilüingo leha uheke anügü atehe", egea leha Deusu kilü Apagãu heke.

4Ülepei leha Apagãu telü KUKANETÜGÜ kipügüa iheke. Hagã tongopenginheha etelü 75iha sisũandühügü atai. Lo telü leha ike. 5Apagãu telü leha tühitsü Sagahi ake, ihisũügü mugupe Lo ake gehale. Tatute leha tüengüpe igelü iheke, ngeneko tuhugu tünginkgukilüpe kugiti tuhugu, ngingoku inhakugulalükope muke gehale Hagãte inhihipütepügüpe. Etelüko leha Kanahã ngongogu inhe, etimbelüko leha tigati. 6Tütemi geleha etelüko aetsingoi Sikẽina. Egituatelüko leha kitu Mogete, hakilaha i aetsingo heke. Egetaha uãke Kanahãko itagü itsagü ege ngongoguho.

7Tita leha KUKANETÜGÜ apakilü Apagãu inha, nügüha iheke: "Igeha ngongo ungunümingoi ehigükuẽgükope inha", nügüha iheke Apagãu heke. Ülepe tüaha aetsi tehu undagitsepügü tüilü iheke KUKANETÜGÜ akatsohoi. 8Titalüpenginhe leha Apagãuko telü aitsükü andüponhogupingona Beteu ngongoguna, giti ihatigoho inhe tatinhü, tita leha egituatelüko. Beteu ngongogu londaha egei tatinhü Ai ake. Tita gehale Apagãu heke tehu undagitsepügü tüilü KUKANETÜGÜ akatsohoi, egea leha KUKANETÜGÜ heke nügü iheke hekite aitügijüi. 9Titalüpenginhe leha etelüko tetimokialeni Negebi ngongogu inhe.

Ejituna Apagãu Tepügü

10Egetaha uãke Kanahãte aitsükü tagi tetagü. Ülepei leha Apagãu telü Ejituna, titaha itsomi tamitsila. 11Hakila leha etimbelü hata tigati, Apagãu kilü tühitsü Sagahi heke: "Tuhutiha uheke itaõ hekugui anügü", nügüha iheke. 12"Ejitu otomo hekeha eingigote, uhitsüi leha eihanümingo ihekeni. Uelüingo leha ihekeni angini heke leha einümingo ihitsüi eitsomi. 13Üle ateheha "ingadzu ugei" ekilüingoha ihekeni. Egea leha tingugi gele uinhümingo hekite leha uüilüingo ihekeni", nügü leha iheke tühitsü heke.

14Apagãu etimbegote leha Ejituna, titalüko heke leha Sagahi ingilü aitsükü atütüi. 15Aitsüküngoko Ejitu anetügü ngingokuguko heke leha ingilü, ülepei leha ihanügü ihekeni Ejitu anetügü inha, atütüiha anügü ihanügü. Üle atehe leha igelü ihekeni inha sütajühegü atati. 16Hekite leha Apagãu igetagü iheke Sagahi anügü pile. Ovelha tunügü tuhugu leha iheke Apagãu inha, tapigüko tuhugu, jumento utotogu tuhuguha jumento itãungu tuhugu gehale, ngingoku inhakugulalükope gehale utotokoha itaõko gehale, camelo tuhugu gehale.

17Apagãu hitsü Sagahi igepügü ateheha Ejitu anetügü heke tüngati, KUKANETÜGÜ heke leha Ejitu anetügü egitamitomi tüilü tülimo ake, ügühe hesinhügü humilü leha iheke. 18Üle atehe leha Ejitu anetügü heke Apagãu ingenügü, ülepei leha ijeginügü iheke: "Tütomima ege agage uüilü eheke?", nügüha iheke. "Tütomima ehitsüi ese anügü ihapungu eheke uinha? 19Tütomima 'uingadzu esei', ekilü uheke?", ta leha iheke. "Egeaha lala atai, inhalüha ehitsü ipolüi uheke. Andeha ehitsü, igekeha üngele, etekeha leha!", Ejitu anetügü kilü leha Apagãu heke. 20Ülepei leha Ejitu anetügü heke tatuko humilü Apagãu igelü inha tühitsü ake aetsingoiha Ejitu ngongogu upügüna. Apagãu heke leha tatute tüengikogupe igelü tuhugu.

Currently Selected:

GEN 12: KUI-BIBLE

Highlight

Copy

Compare