GEN 14

Apagãu heke Lo Inhankgipügü

1Egetaha Sina ngongogu anetügüpeha uãke ekisei Agapeui, Agiokiha ekisei Elasa ngongogu anetügüpe, Kedohilaomeha ekisei Elãu ngongogu anetügüpe, Tsidauha ekisei Goimi ngongogu anetügüpe. 2Tatakegeningoko anetão heke otonge tüilü nhatüingoko anetão imüto. Begaha ekisei Sodoma anetügüpe, Bihisaha ekisei Gomoha anetügüpe, Sinabiha ekisei Ajima anetügüpe, Semebehiha ekisei Seboi anetügüpe Bela anetügüpe gehale, tigatinhü gehaleha Soa. 3Akagoha nhatüingoko anetãoko heke tatuko tuhutelü Sijĩ akatagü, tigatinhüteha ipa Tapünginhüpe#14.3 Ipaha aitsükü inhetügü. Inhalüha itsua tingugingotsei.. 4Anetüha Kedohilaome heke leha takiko hügape isũa akagoha anetüko otonge itsote tüngigegatühügü anetegagü. Otohongo isũa leha hüle anetão heke Kedohilaome anetu ikeninügükinügü tingukugukoi.

5Otohongo isũa leha, Kedohilaome enhügü tüanetokongoko ake otonge inha. Hefa itagü gamakilü leha ihekeni Asitegoti-Kahanãi ngongogute, Susi itagü gamakilü gehale ihekeni Hã ngongogute, Emĩ itagü gamakilü gehale ihekeni Safe-Kigiatãi ngongogute, 6Hoge itagü gamakilü inenügü Kedohilaome andagü heke andüponhogu tuhugu Seihite aetsingoiha Eu-pagã ngongogunaha, hakilaha tatinhü ngongo kugepingo hüngü#14.6 Ngongo kugepingo hüngü, katohola unkguha i tita gehale, anginita ekugu hüle nhetune tsügütse inhügü. agitügü heke. 7Ülepene leha anetü Kedohilaome andagü ogopijü Kajisi ngongoguna. Egetaha titalü iganügükilüha Ẽ-Misipatei. Amaleki itagükope imbükilü leha ihekeni inhongogukoho, Amohe itagükope gehale Hasasão-Tama ngongogu tongokope.

8Ülepeiha Sodoma anetügüko telü Sijĩ akatagü, Gomoha anetügü, Ajima anetügü, Seboi anetügü, Bela anetügüko gehale, ete gehale tigatinhü Soa tongoko telü leha tüatatuguko ake Sijĩ akatagü gehale. Etelüko leha totolükoinha 9Elãu anetügü imütoha, Goĩ anetügü imütoha, Sina anetügü imütoha, Elasa anetügü imüto gehale. Tatakegeningoha akagoi anetükoi nhatüingoko anetüko imüto. 10Sijĩ akatagü tongoha uãke egei otongei, tüatainhü tuhugu ama akondohopingo tongo. Nhatüiha anetãoko ihiholü hata otongepenginhe, anginiha Sodoma anetügüko tikongoko ake etekeĩlüko leha üle tüatainhü atati tuhugu, anginiko gehale Gomoha anetügüko tikongoko ake. Teloko anetügükope ihilü leha andüponhoguna tuhugu. 11Anetãokoha tükenginhükope telü leha ete Sodomana Gomohana gehale, tatute leha titalüpe kuminhango tongitenhüpe inügü ihekeni, ngikope tihipükoinhüpe gehale, ülepei leha etelüko. 12Lo igelü leha ihekeni, Apagãu hisũügü mugupeha, tatute gehale inhengüpe kugiti tuhugu, Sodomateha uãke itu itsagü.

13Aetsingo ihilü leha hüle, etelü leha Apagãu inha tatute itsatühügü ihatigi. Apagãuha ekisei Hebegeu#14.13 Hebegeuha egei Isigaeu otomo ititü otohongo. itagüpe itupeha hakila i tsekegü heke tuhugu utotoha uãke otoi ititüha Mãhe, Amohe itagüpeha ekisei. Apagãu inhe leha uãke Mãheko ataĩpügü tühisũüdão ake Esikouha Anehi gehale. 14Apagãu heke leha tühisũügü mugupe Lo ihetühügü tagote tatakegeningoko anetão heke, utotoko ingenügü leha iheke tipanetinhükopeha otonge inha etegokomi. 318iha sakünginduko tatuteha tankginhükope Apagãu ituaha. Apagãu telü leha ikeni anetão tatakegeningoko hukehisale aetsingoiha ete Dãna. 15Titaha Apagãu heke tikongoko akenügü tetepagüi, timütongoko imbegunkgilü leha ihekeni koko, itsenguko leha, Apagãu inhügü umbege tuelükoti, ihilüko leha, ihukehijüko leha ihekeni Hobana, eteha tatinhü heĩgü inhe Damasiku heke. 16Ülepei leha Apagãu heke akagoha anetãoko ngimbigatühügü opijü tatute. Apagãu heke gehale Lo inginügü leha, tühisũügü tapünginhüpe mugupe, tatute leha inhengüpe gehale, itaõko tuhuguha, teloko inhihetühügükope tuhugu gehale.

Meukisedeki Opogipügü Apagãu ake

17Apagãu hekeha Kedohilaome igepügünginhe teloko anetãoko gehale, ogopijü hata leha tüngati, Sodoma anetügü telü leha ihogijü inha Safe akatagü, igatoho gehale Anetü akatagü.

18Ülepeiha, Meukisedekiha ekisei ete Salẽi anetügüpeha, Apagãu hogijü inha gehale etelü. Deusuha Aitsüküngo Tuatimbüngü sacerdotesüpeha ekisei. Meukisedeki heke leha kuminhango inginügü vinho gehale Apagãu inha. 19Meukisedeki hekeha hekite Apagãu tüilü, nügüha iheke:

"Deusuha Aitsüküngo Tuatimbüngü,

kahü Tüinimbüngü hekeha ngongo ake,

Apagãu tüitai hekite.

20Hekiteha tai Deusu Aitsüküngo Tuatimbüngü heke ailikügüi,

eimütongokope tundinhimbüngüha einhakugulati", ta leha iheke.

Ülepei leha Apagãu heke tatute timühoni tükengühügüpe akenügü otonge itsote, ülepeiha aetsingo gepagüpe tunügü leha iheke Meukisedeki inha.

21Ülepei leha Sodoma anetügü kilü Apagãu heke: "Ngikopei geleha eitse, kugekope tsügütse hüle uitagü enginhankgipügü engunkge uinha", nügü leha iheke Apagãu heke.

22Ülepeiha Apagãu heke itüjü. "Uinhatügü ihanümiha uheke kaenga KUKANETÜGÜ inha, ukilüha eheke Deusu imbata, Deusuha Aitsüküngo Tuatimbüngüha, kahü Tüinimbüngüha ngongo ake, 23inhalüha engikogupei uinhümingoi, inhalütse mukeha uinhümingoi aetsi ngiko inhotigüpei, atapügü ingü inhotigüpei gehale. Inhalüha 'Apagãu tüipügü leha uheke tüengikonkgoi' ekilüingoi uheke. 24Inhalü hüle ngikondi uanümi, tetinhamba leha hüle ungingokuguko anügü. Uakongokopeha Ane, Esikou, Mãheko inha hüle ngiko engunkge", Apagãu kilü leha hüle iheke.

Currently Selected:

GEN 14: KUI-BIBLE

Highlight

Copy

Compare