Obufwimbuli 3
3
Akaboolelwa ikanisa yeSaride
1Ohandiichile malaika weikanisa eyili eSaride, ori
Kano niko aka aboola, oyo ouli nAbaroho musaafu baNyasaye, nende tsinyininyini musaafu; mbu Emanyile ebikholebio, mbu ofumanga shinga olwa oli omulamu; nebutswa oli omufu. 2Obe meeso, notinyisia ako akashisikaale, akabeele nikeenya okhufwa. Okhuba shinyoolile omulimokwo kwosi kwosi nikuusiibwe imbeli waNyasaye wanje ta. 3Kho yitsulila akeenako aka waheebwa, naka wahulila, nokakhola, niwikalukhasia. Nebutswa noba noraba meeso ta, ndaleetsa shinga omwibi, kata shiolamanya isaa eya ndalakhwitsilakhwo tawe. 4Ne olikhwo nameera amatuutu muSaride kabandu abarayoonoonia tsingubo tsiabwe ta; nabo balachenda ninasi mutsindafu, shichila bakwanile bario. 5Oyo ouhula alafwalwa ario ebiifwalo ebilafu; kata shindalasiliisia eliiralie lirule mushitabu shiobulamu nahatuutu ta; ne ndaleeyama eliiralie imbeli waPapa, khandi imbeli wabamalaikabe. 6Ouli namarwi, ahulile aka Roho asuniila tsikanisa.
Akaboolelwa ikanisa yeFiladelefia
7Ohandiichile malaika weikanisa eyili eFiladelefia, ori
Kano niko aka aboola, oyo ouli omutakatifu, ouli owatoto, ouli neshibohololo shiaDaudi; owikulanga, mana abulaho owikala; owikalanga, nabulaho owikula; 8mbu Emanyile ebikholebio; ne lola, ereele imbeliwo omuliango okwikuushe, okwa omundu yesi aranyala okhwikala ta. Emanyile shinga olwa olikhwo namaani amatuutu, khandi shinga olwa wahulila likhuwa lianje, noreeyambakhana eliira lianje ta. 9Lola, ekhuheelesia abokhusinagogi yaSetani, abo ababoola mbu nabaYahudi, ne nibarali bario ta, habula babeehanga; lola, ndalabaleera nimbeenamia hamakuluko, nimbamanyia shinga olwa ndakhuheelilenje. 10Olwa wahulila lilako lianje niwifwila, nasi siesi ndalakhulinda iwe oleshe okhwinjila mushise shiobuteemwi eshili okhwitsila eshialo shiosi, okhubateema abamenya khushialo. 11Endi ahambi okhwitsa; handakhwo khukeenako aka oli ninako, omundu yesi aleshe okhukhunuula olusimbilwo. 12Oyo ouhula, ndalamukhola abe isiilo muhekalu yaNyasaye wanje, ne shialarulamwo khandi ta. Ndalahandiikha khuye eliira liaNyasaye wanje, nende eliira lielitookho liaNyasaye wanje, nilio Yerusalemu liyia, elirula mwikulu, okhurula ewaNyasaye wanje, khandi nende eliira lianje omwene liyia. 13Ouli namarwi, ahulile aka Roho asunjila tsikanisa.
Akaboolelwa ikanisa yeLaodikia
14Ohandiichile malaika weikanisa eyili eLaodikia, ori
Kano niko aka aboola, oyo ouli Amina, omurumbusi wobuloli omusuubilwa, owatoto, omuchaachilo kwobulonji bwosi bwaNyasaye; 15mbu Emanyile ebikholebio, shinga olwa orali omunyifu tsi kata ouyiile pia ta. Ndakhachama niwakhaba kata omunyifu kata ouyiile. 16Ne bulaano, olwa okholile butswa eshiyambala, norali kata ouyiile kata omunyifu ta, nekhufuutse orule mumunwa kwanje. 17Olwa oboolanga, mbu Endi omuyinda, akanje kakaasile; shindamba eshindu ta; ne noramanyile shinga olwa oli owamasila, owafuba, khandi omumanani, khandi omubofu, ouchendanga eshihechenye, ta; 18kho ekhuchesiyia mbu okule khwisie itsahaabu eyalabibwa mumulilo, mbu oyindihale; nende ebiifwalo ebilafu, mbu wifwalekhwo, tsisoni tsieshihechenyeshio nitsiramanyikha ta; namalesi ketsimoni, okhwibakha tsimoni, mbu olole. 19Abo bosi aba eheelanga embakondeshela nimbakuuma; kho rakhwo omwoyo, niwikalukhasia. 20Lola, esinjiile khumuliango nikhong'onda; omundu yesi naba nahulila omwoyo kwanje, niyeekula omuliango, ndaleenjilamwo, nindia ninaye ebiliibwa, naye ninasi. 21Oyo ouhula, ndalamufuchiilila okhwikhala ninasi khushifumbi shianje shioburuchi, shinga isie siesi olwa ndahula, ninzikhala nende Papa khushifumbishie shioburuchi. 22OuIi namarwi, ahulile aka Roho asunjila tsikanisa.
Currently Selected:
Obufwimbuli 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
