Obufwimbuli 2
2
Akaboolelwa ikanisa yeEfeso
1Omuhandiichile malaika weikanisa eyili eEfeso, ori
Kano niko aka aboola, oyo outiila tsinyininyini etsio musaafu mumukhonokwe musaatsa, oyo ouchenda hakari webichibi musaafu bieitsahaabu bietsitaha; 2mbu Emanyile ebikholebio, mbu okhunyakhanakhwo nende okhwifwilakhwo; khandi shinga abandu ababii olwa bakhusinyila elala; khandi shinga olwa wateema abo abeelanga mbu abanabii nibarali bario ta, nonyoolelesia obukaatii bwabwe. 3Oli nobwisimilisii; weefwila khulwanje, noratofuhala tawe. 4Nebutswa endi nelikhuwa lino khwiwe, mbu walekha obuheelibwo obwambeli. 5Kho witsulile aha warula niwaakukha, niwikalukhasia, nokhola shinga olwa wakholanga olwambeli; nebutswa noba noreekalukhasia ta, ndakheetse nirusia eshichibi shieitahayo habundu washio. 6Habula lino oli ninalio, mbu okiyanga ebiima biabaNikolai, ebia siesi engiyanga. 7Ouli namarwi, ahuliie aka Roho asunjila tsikanisa. Oyo ouhula, ndalamufuchiilila okhulia khumusaala kwobulamu, okuliho mumukunda kwaNyasaye.
Akaboolelwa ikanisa yeSimuririna
8Ohandiichile malaika weikanisa eyili eSimurina, ori
Kano niko aka aboola, oyo ouli owambeli, nowokhuhelelesia, owali omufu mana naba mwoyo; 9mbu Emanyile amasila aka oli ninako, nende obumananibwo, khane noli omuyinda, nende obunyechi bwa abo ababoola mbu nabaYahudi nibarali bario ta, habula nabeisinagogi yaSetani. 10Oraria aka oli ahambi okhusaalisilibwa ta; lole, Setani ali okhusukuna abandi khwinywe mumbohe, mbu muteemwe; mulaba mumasila tsindaalo ekhumi. Obeetsenje omwisiikwa okhuula khukhufwa, kho ndalakhuheelesia olusimbi Iwobulamu. 11Ouli namarwi, ahulile aka Roho asunjila tsikanisa. Oyo ouhula, okhufwa khwokhubili okhwo khubula likhuwa khuye ta.
Akaboolelwa ikanisa yePerigamo
12Ohandiichile malaika weikanisa eyili ePerigamo, ori
Kano niko aka aboola, oyo ouli nolukanga olumemu, olwamema tsimbeka tsiombi; 13mbu Emanyile aha omenyanga, mbu aha eshifumbi; shioburuchi shiaSetani shili. Ne ohandanga khuliira lianje. Shiwaambakhana akasuubilwa khwisie ta, kata mundaalo tsiaAndipa omuloli wanje, omwisiikwa wanje, oweerelwa hakari weenywe, aha Setani amenya. 14Nebutswa endikhwo namakhuwa amatuutu khwiwe; shichila ebweneyo oli nende abandi abahanda khumeebaalo kaBalaamu, oyo oweebaalila Balaki okhura eshiisichirasio imbeli wabaana baIsiraeli, mwikhuwa liokhulia ebindu biemisango echimaliilwe ebifwanani, nende obuheyi. 15Khandi oli nende abandi nabo abahanda bario khumeebaalo kabaNikolai. 16Kho wikalukhasie; nebutswa nekhwitsile bwangu nimbaseera lihe nende olukanga Iwomunwa kwanje. 17Ouli namarwi, ahulile aka Roho asunjila tsikanisa. Oyo ouhula, ndalamuheelesiakhwo khumana eyo eyamabiswi; khandi ndalamuheelesia lichina lilafu, ne khwichina elo lilabakhwo eliira liyia nilihandiichilwe, elia oundi yesi aramanyakhwo ta, habula oyo ouliheebwa.
Akaboolelwa ikanisa yaTsiatira
18Ohandiichile malaika weikanisa eyili eTsiatira, ori
Kano niko aka ahoola, Omwana waNyasaye, owa tsimonitsie tsiingana olumemu Iwomulilo, ebilenjebie nabio nibiingana emikasa echiaruutwa niching'inang'ina; 19mbu Emanyile ebikholebio, nobuheelibwo, nobusuubili nobukhalabani nobwisimilisii; khandi shinga ebikholebio ebihelelesia olwa bishila ebiambeli. 20Ne endi nelikhuwa lino khwiwe, mbu ofuchiililanga omukhasi oyo Yezebeli, owilanga mbu omunabii; naye yeechesinjia abasumba banje nabashiamia mbu bakhole akobuheyi nibalia ebindu biemisango echiamaliilwe ebifwanani. 21Ndamuheelesia obwiyangu okhwikalukhasia; ne shiachama okhwikalukhasia okhulekha obuheyibwe ta. 22Lola, emusukuna khubulili bwobusaalili; nabo aba aheyanga ninabo, embasukuna mumasila amakali, habula nibeekalukhasia okhulekha ebikholebie; 23khandi abaanabe ndalabeera bwira. Natsio tsikanisa tsiosi tsilamanya mbu isie nisie ourunilisinjia akemioyo nende amayililisio; ne ndalamurunga, ebikhole biabuli mundu shinga olwa bili. 24Ne bulaano emusunjila inywe abandi abasikala khubaTsiatira, abaralikhwo abameebaalo ako ta, abaramanya amakhuwa aka balanga mbu amakhuwa kaSetani akali musi bwene, ta; ndi Shimumeetela omusiiko kundi kwosi tawe. 25Nebutswa aka muli ninako, mukahandekhwo okhuula olwa ndaleetsa. 26Ne oyo ouhula nende oyo oulumilila okhukhola ebikhole bianje okhuula khubumaliilishi, ndalamuheelesia obunyali khumahanga 27shinga obwa ndaheebwa nende Papa; mana alabaruka nende indabushi yeshibia, natsiaraka shinga tsinyungu tsiomulonji; 28khandi ndalamuheelesia eyasulwe eyomumabwibwi. 29Ouli namarwi, ahulile aka Roho asunjila tsikanisa.
Currently Selected:
Obufwimbuli 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
